- 2020-02-04 09:33:09
- ចំណេះដឹង
ប្រព័ន្ធអនឡាញដែលចិនបានបង្កើត ជួយឲ្យគេដឹងអំពីការផ្ទុះវីរុសកូរ៉ូណា ក្នុងពេលត្រឹម ១សប្ដាហ៍
- 2020-02-04 09:33:09
- ចំនួនមតិ 0 | ចំនួនចែករំលែក 0
ប្រព័ន្ធអនឡាញដែលចិនបានបង្កើត ជួយឲ្យគេដឹងអំពីការផ្ទុះវីរុសកូរ៉ូណា ក្នុងពេលត្រឹម ១សប្ដាហ៍
ចន្លោះមិនឃើញ
នៅពេលដែលមនុស្ស ៣ នាក់ ទៅកាន់មន្ទីរពេទ្យមួយនៅទីក្រុង Wuhan ប្រទេសចិនកាលពីខែធ្នូ ដែលមានរោគសញ្ញាដូចនឹងជំងឺរលាកសួត ក្រុមគ្រូពេទ្យបានយកឈាមរបស់គេពិនិត្យនិងធ្វើតេស្តនីតិវិធីស្តង់ដារ។ ក្រុមគ្រូពេទ្យបានវាយបញ្ចូលព័ត៌មានអំពីទីតាំងភូមិសាស្ត្រ, ថ្ងៃខែកំណើត, ភេទ និងព័ត៌មានសំខាន់ផ្សេងទៀតរបស់អ្នកជំងឺ ចូលក្នុងប្រព័ន្ធ Database (ប្រព័ន្ធរក្សាទុកទិន្នន័យ) របស់រដ្ឋាភិបាលចិន។
ទិន្នន័យនោះក៏ត្រូវបានបង្ហោះចូលក្នុងប្រព័ន្ធតាមដានសុខភាពទូទាំងប្រទេសរបស់ចិន ដែលគេហៅថា ប្រព័ន្ធត្រួតពិនិត្យជំងឺឆ្លងជាតិ (ហៅកាត់ NIDMISD)។ នៅពេលដែលប្រព័ន្ធបង្ហាញអំពីកម្រិតឈឺខ្ពស់ខុសពីប្រក្រតីនៃជំងឺ ក្នុងតំបន់ណាមួយ វានឹងប្រាប់ដល់អ្នកវិភាគ និងមន្ត្រី ឲ្យធ្វើការពិនិត្យឲ្យល្អិតល្អន់ និងអាចមានការធ្វើតេស្តបន្ថែមទៀតផង។
នេះហើយ ជាមូលហេតុដែលចិនអាចដឹងអំពីការផ្ទុះនៃជំងឺរលាកផ្លូវដង្ហើមថ្មីនៅទីក្រុង Wuhan ក្នុងពេលត្រឹមមួយសប្ដាហ៍ ដែលជំងឺនេះមិនធ្លាប់កើតមានលើមនុស្សពីមុនមក។
វេជ្ជបណ្ឌិត Maria Van Kerkhove ជាអ្នកជំនាញខាងរោគរាតត្បាតម្នាក់ ដែលបានជួយដល់អង្គការសុខភាពពិភពលោកក្នុងការឆ្លើយតបនឹងជំងឺ MERS បាននិយាយអំឡុងបទសម្ភាសន៍មួយកាលពីសប្ដាហ៍មុនថា ៖ "វា (វីរុសកូរ៉ូណា) ត្រូវបានសមត្ថភាពកិច្ចចិនដឹងអំពីវា តាមរយៈប្រព័ន្ធតាមដានដែលបង្កើតឡើងក្រោយផ្ទុះជំងឺ SARS នៅឆ្នាំ ២០០៣។”
ការផ្ទុះនៃវីរុសកូរ៉ូណា ដែលអ្នកវិទ្យាសាស្ត្រឲ្យឈ្មោះថា 2019-nCoVគិតត្រឹមព្រឹកថ្ងៃទី ៤ កុម្ភៈនេះ ករណីអ្នកស្លាប់មានសរុបចំនួន ៤២៧ នាក់ ដែលអ្នកឆ្លងសរុបមាន ២០ ៦០៤ នាក់ ដោយបានរាលដាលដល់ ២៤ ប្រទេស បន្ថែមពីចិន។
ចំនួនអ្នកស្លាប់និងចំនួនអ្នកឆ្លងក្នុងអំឡុងពេលត្រឹមមួយខែនេះ គឺលើសពីការផ្ទុះនៃជំងឺ SARS រយៈពេល ៨ ខែក្នុងឆ្នាំ ២០០២ និង ២០០៣ ដែលសម្លាប់មនុស្ស ៧៧៤ នាក់ និងឆ្លងប្រមាណ ៨ ០០០ នាក់។
រដ្ឋាភិបាលចិនបានចាប់ផ្ដើមប្រព័ន្ធ Database សម្រាប់តាមដានជំងឺ ក្រោយពីការផ្ទុះនូវជំងឺ SARS ដើម្បីទប់ស្កាត់ជំងឺឆ្លងដទៃទៀត ពីការរាលដាលបែបនេះ។
ប្រព័ន្ធតាមដានជំងឺរបស់ចិន តាមពិតទៅគឺជាការអាប់ដេតថ្មីនៃប្រព័ន្ធតាមដានដែលមានស្រាប់រយៈពេលជាង ៥០ ឆ្នាំមកហើយ។ រដ្ឋាភិបាលចិនបានបង្កើតជំនាន់ដំបូងនៃប្រព័ន្ធក្នុងឆ្នាំ ១៩៥៩ ក្រោយពីការរាតត្បាតជំងឺ H2N2 មានប្រភពចេញពីចិន ក្នុងឆ្នាំ ១៩៥៧។ ជំងឺនេះសម្លាប់មនុស្សអស់ប្រមាណ ១,១ លាននាក់ នៅជុំវិញពិភពលោក។
ប៉ុន្តែត្រឹមឆ្នាំ ២០០២ នៅពេលប្រទេសចិនជួបប្រទះនឹងករណីដំបូងនៃជំងឺ SARS ប្រព័ន្ធតាមដានបានហួសសម័យ។ មន្ត្រីសុខភាពនៅធ្វើការរាយការណ៍អំពីជំងឺឆ្លង តាមការបំពេញឯកសារដោយដៃ និងផ្ញើសារ ឬ បញ្ជូនទូរសារទៅការិយាល័យកណ្ដាល។ វាធ្វើឲ្យពិបាកក្នុងការប្រមូលទិន្នន័យ និងរៀបចំទិន្នន័យ ដែលធ្វើឲ្យមានការឆ្លើយតបយឺតយ៉ាវ។
ហេតុនេះ ក្រោយពីការផ្ទុះជំងឺ SARS រដ្ឋាភិបាលបង្កើតប្រព័ន្ធអនឡាញថ្មី ដែលអាចឲ្យគ្លីនិក និងមន្ទីរពេទ្យរាយការណ៍អំពីករណីភ្លាមៗ បន្ទាប់ពីបានដឹងពីវា។
ប្រព័ន្ធនេះក៏អាចឲ្យអ្នកវិទ្យាសាស្ត្រចិនកំណត់អំពីកូដនៃហ្សែនរបស់វីរុសកូរ៉ូណា បានរហ័ស និងបញ្ចេញនូវការធ្វើតេស្តនៃវីរុស ដល់មន្ទីរពិសោធន៍នៅជុំវិញពិភពលោកផងដែរ៕
