កុំសួររឿងតម្លៃ ទូទឹកកកទាំង ៥ ម៉ូដែលនេះ គ្រាន់តែឃើញ អ្នកអត់លុយក៏ហ៊ានចំណាយដែរ

2018-06-07 08:16:25
ប្រវត្តិបច្ចេកវិទ្យា

2018-06-07 08:16:25
ចំនួនមតិ 0 | ចំនួនចែករំលែក 0

ចន្លោះមិនឃើញ

មេផ្ទះភាគច្រើនបច្ចុប្បន្នចូលចិត្តទិញម្ហូបអាហារស្ដុកទុក ដោយមិនចង់ចំណាយពេលទៅផ្សាររាល់ថ្ងៃ នាំឲ្យខាតពេល ខាតអារម្មណ៍។ ការមានទូទឹកកកនៅផ្ទះ ពិតជារឿងសំខាន់សឹងមិនអាចខ្វះបាន ព្រោះវាអាចឲ្យយើងរក្សាម្ហូបអាហារបានយូរ និងមិនខូចគុណភាព។

ចំពោះទូទឹកកកសម័យថ្មីនេះវិញ មិនត្រឹមតែអាចរក្សាទុកម្ហូបឲ្យបានយូរនោះទេ ប៉ុន្តែក៏មានបច្ចេកវិទ្យាទំនើបៗជួយសម្រួលការងារផ្សេងៗទៀត ដូចជាប្រាប់ថាមានម្ហូបអ្វីខ្លះនៅសល់ក្នុងទូទឹកកកជាដើម។ ខាងក្រោមនេះ ជាទូទឹកកកមានបច្ចេកវិទ្យាដ៏ទំនើបក្នុងទូទឹកកកនាឆ្នាំ ២០១៨ ដែលអ្នកអាចមិនដឹង៖

១. ទូទឹកកក Samsung Family Hub

បើសិនអ្នកជាមនុស្សឧស្សាហ៍ភ្លេចភ្លាំងក្នុងការបើកមើលទូទឹកកក ដើម្បីដឹងថាត្រូវទិញឥវ៉ាន់អ្វីខ្លះនោះ ទូទឹកកក Samsung ប្រភេទ Family Hub អាចជួយអ្នកបានច្រើនក្នុងបញ្ហានេះ។ នៅក្នុងទូទឹកកកនោះមានកាមេរ៉ា ដែលអាចចាប់យករូបភាពពីខាងក្នុងទូទឹកកក ហើយផ្ញើចេញទៅកាន់ទូរសព្ទដៃបានតាមកម្មវិធី។ មិនត្រឹមតែប៉ុណ្ណោះ អ្នកក៏អាចកំណត់សីតុណ្ហភាពតាមទូរសព្ទដោយប្រើ Wifi ហើយបើសិនជាទូទឹកកកអ្នកចំហទ្វារ វានឹងផ្ដល់ជាដំណឹងដល់អ្នកភ្លាមៗ។

ចំណុចលេចធ្លោមួយទៀត គឺទូទឹកកកនេះមានអេក្រង់ទំហំ ២១,៥ អ៊ីញជា Tablet អាចបញ្ជាដោយសំឡេង ដែលអាចឲ្យអ្នកធ្វើការបញ្ជាទិញគ្រឿងទេស ឬម្ហូបបាននៅលើអ៊ីនធឺណិត។ ម៉្យាងទៀត ក៏អាចចាក់តន្ត្រីពីកម្មវិធីស្ដាប់ចម្រៀងលើអ៊ីនធឺណិតបានផងដែរ។

តម្លៃប្រហាក់ប្រហែល ៥ ៦០០ ដុលា្លរ (ទីផ្សារបរទេស)

២. ទូទឹកកក LG Smart InstaView Door-In-Door

ទូទឹកកក LG Smart InstaView Door-In-Door ជាទូទឹកកកឆ្លាតវៃ ដែលវាអាចដឹងនៅពេលមានមនុស្សនៅជិត ហើយវានឹងបើកទ្វារនៅពេលដែលដាក់ជើងនៅក្បែរ Sensor របស់វា។ វាមានអេក្រង់ Tablet ទំហំ ២៩ អ៊ីញ ដែលប្រើប្រាស់ Windows 10 មកជាមួយ។ Tablet នេះមានអេក្រង់ប្រភេទរាងថ្លាដែលអាចឲ្យមើលឃើញផ្នែកខាងក្នុងបាន។ វាមានកម្មវិធីមកដើម្បីដាក់ឈ្មោះលើម្ហូបអាហារថាវាជារបស់នរណា ហើយវាផុតកំណត់នៅថ្ងៃណា។ យើងក៏អាចប្រើទូរសព្ទ ដើម្បីបញ្ជាទូទឹកកកនេះបានផងដែរ។

តម្លៃប្រហាក់ប្រហែល ៧ ០០០ ដុលា្លរ (ទីផ្សារបរទេស)

៣. ទូទឹកកក Whirlpool Smart French Door

ទូទឹកកករបស់ក្រុមហ៊ុន Whirlpool ជំនាន់ចុងក្រោយនេះមានមុខងារ ឆ្លាតវៃអាចបញ្ជាតាមទូរសព្ទ ហើយវានឹងផ្ដល់ដំណឹងទៅកាន់អ្នកប្រើប្រាស់នៅពេលដាច់ Wi-Fi។ មិនត្រឹមតែប៉ុណ្ណោះ វាក៏ជួយក្រើនរំលឹកអ្នកឲ្យផ្លាស់ប្ដូរ តម្រងខ្យល់ និងទឹកផងដែរ។

លើសពីនេះទៅទៀត អ្នកក៏អាចកំណត់យកម៉ូតផ្សេងៗ ឧទាហរណ៍ Party Mode ត្រូវកំណត់នៅពេលមានពិធីជប់លៀង ហើយមានការបិទបើកទូទឹកកកច្រើនដង។ ទូទឹកកកនេះនឹងបន្ទាបសីតុណ្ហភាពក្នុងទូបង្កកឲ្យចុះខ្លាំង ដើម្បីធ្វើទឹកកកឲ្យបានលឿន និងបញ្ចុះសីតុណ្ហភាពទូក្លាស្សេផងដែរ ព្រោះមានការបិទបើកច្រើនដង។

តម្លៃប្រហាក់ប្រហែល ៣ ៣០០ ដុលា្លរ (ទីផ្សារបរទេស)

៤. Smarter Fridge Cam និង Smarter Mats

ក្រុមហ៊ុន Smarter ដែលល្បីខាងធ្វើកំសៀវអគ្គិសនី ដែលអាចភ្ជាប់បានទៅនឹងទូរសព្ទនោះ បានបង្កើតជាឧបករណ៍បន្ថែមប្រើប្រាស់សម្រាប់ទូទឹកកករបស់អ្នក។ Smarter Fridge Cam ជាកាមេរ៉ាដាប់ភ្ជាប់ទៅនឹងទ្វារផ្នែកខាងក្នុងទូទឹកកកដើម្បីមើលថាមានអ្វីនៅសល់ខ្លះតាមទូរសព្ទដៃ ពេលអ្នកភ្លេចមើលមុនចេញពីផ្ទះ។ ចំណែកឯ Smarter Mats វិញជាទ្រនាប់ដែលអាចដាក់ក្នុងទូទឹកកក ដើម្បីទ្រដបនានាបាន ដូចជាដបទឹកដោះគោ។ Smarter Mats នឹងថ្លឹងទម្ងន់វត្ថុនោះថាតើវាមាននៅសល់ទឹកដោះគោឬទេ ហើយបើសិនជាអស់ ឧបករណ៍ដែលភ្ជាប់នឹង Wi-Fi មួយនេះនឹងប្រាប់អ្នកតាមរយៈទូរសព្ទដៃភ្លាមៗ។

តម្លៃប្រហាក់ប្រហែលរបស់ Smarter Fridge Cam ២០០ ដុលា្លរ (ទីផ្សារបរទេស)
តម្លៃប្រហាក់ប្រហែលរបស់ Smarter Mats ៨០ ដុលា្លរ (ទីផ្សារបរទេស)

៥. ទូទឹកកក Liebherr ដែលប្រើបច្ចេកវិទ្យារបស់ Microsoft

ខុសពីទូទឹកកកនានា ដែលប្រើកាមេរ៉ាហើយផ្ញើរូបភាពផ្ទាល់មកឲ្យអ្នកប្រើប្រាស់ ក្រុមហ៊ុន Liebherr និង Microsoft បានសហការគ្នាផលិតទូទឹកកកមួយ ដែលអាចថតរូបមកហើយវិនិច្ឆ័យដឹងថាអ្នកនៅសល់ម្ហូបអាហារតាមមុខ ចំនួនប៉ុនណា។ Cortana នឹងជាជំនួយការក្នុង SmartDeviceBox នេះដោយវានឹងផ្ញើជាបញ្ជីមុខម្ហូបនឹងអាហារ ដែលជិតអស់ហើយគួរតែទិញ។

តម្លៃប្រហាក់ប្រហែល ៥ ៣៥០ ដុលា្លរ (ទីផ្សារបរទេស)

ចុចអាន៖

ប្រភព៖ home.bt ប្រែសម្រួល៖ ផាត សុវត្ថិ