ប្រសិន​បើលោកអ្នកមានគម្រោង​ និងកំណត់ថ្ងៃច្បាស់លាស់ធ្វើដំណើរកម្សាន្ត​ទៅលេង​ទីជិតទីឆ្ងាយហើយ លោកអ្នកគួរ​តែ​ត្រួតពិនិត្យ និង​ធ្វើតេស្ត​រថយន្ត​ឱ្យបាន​មួយថ្ងៃ​មុន​ចេញដំណើរ ក្រែងលោឃើញមានបញ្ហាអ្វីមិនស្រួល គឺ​អាចយកទៅហ្គារ៉ាស់ជួសជុលទាន់ពេល។

អ្វីដែល​ត្រូវធ្វើដំបូងនោះ គឺពិនិត្យមើលសភាព​សំបកកង់ និងសម្ពាធខ្យល់ បើកគម្របម៉ាស៊ីន ដើម្បី​មើលកម្រិត​ប្រេងម៉ាស៊ីន ទឹកស្អំ ប្រេងបូមចង្កូត ប្រេងប្រអប់លេខ ប្រេងហ្វ្រាំង សភាព​អាគុយ និង​ទឹក​បាញ់កញ្ចក់ជាដើម ក៏ដូចជាសង្កេតមើលការដាច់ខ្សែ ឬលេចធ្លាយកន្លែងណាមួយ។

ប្រសិនបើ​មិនមានបញ្ហាអ្វីទេ បន្ទាប់មកគឺ​បញ្ឆេះរថយន្ត​ដើម្បីដឹងច្បាស់ថា មាន​បញ្ហានៃការដេរ​បញ្ឆេះ​រថយន្ត​ឬអត់។ ក្រោយពេល​បញ្ឆេះរថយន្តហើយ មើលកុងទ័រ​ថាតើ​គាំងទ្រនិចណាមួយឬអត់ ជាពិសេសកុងទ័រសាំង និង​មាន​សញ្ញា Check ឬអត់ មើលកម្រិតសាំង ធ្វើតេស្ត​បើក​ចង្កៀង​ និង​ស៊ីញ៉ូឆ្វេងស្តាំមុខក្រោយ ដំណើរការផ្លិតទឹក និងបាញ់ទឹក ស៊ីផ្លេ ប៊ុតុងចុចកញ្ចក់ និងចាក់សោ​ ក៏ដូចជាការសារ៉េ​កញ្ចក់មើលក្រោយ​សងខាងជាដើម។ ក្រៅពីនេះ ក៏ត្រូវត្រួតពិនិត្យ​ម៉ាស៊ីនត្រជាក់​ ដូចជាធុំក្លិន​ចម្លែក ឬមិនសូវត្រជាក់ជាដើម។

តមកទៀត គឺលោកអ្នកគួរ​បើករថយន្ត​សាកល្បង​បន្តិច ដើម្បីស្ទាបស្ទង់​បញ្ហា​ផ្សេងៗដូចជា ហ្វ្រាំង​ថាតើជាន់ស៊ីឬអត់ ឆេះញាក់ៗ និងមានសំឡេងលាន់ខុសធម្មតាឬអត់ ក៏ដូចជា​ត្រូវចាប់អារម្មណ៍​លើ​ប្រព័ន្ធជើងក្រោមផងដែរ។

បន្ទាប់ពី​បាន​ត្រួតពិនិត្យ​​រថយន្ត​នៅ​គ្រប់ចំណុច​សំខាន់ៗ​អស់ហើយ លោកអ្នក​នឹង​មាន​អារម្មណ៍​ទំនុកចិត្ត​ក្នុងពេល​បើកបរ​ធ្វើដំណើរ។ តែយ៉ាងណាក្តី យើងសូម​បន្ថែម​នូវការណែនាំ២ចំណុចទៀត មុនដាក់អក្សរ D បើករថយន្តចេញដំណើរ។

ទីមួយ គឺ​ឯកសារ​ដែល​ត្រូវយកតាមខ្លួន មាន​ដូចជា បណ្ណបើកបរច្បាប់ដើម កាតគ្រីថតចម្លង (មាន QR Code) និង​ឆៀក​ថតចម្លង។ ចំណែក​សន្លឹកពន្ធលើ​មធ្យោបាយ​ដឹកជញ្ជូន ត្រូវបិទនៅកញ្ចក់​ខាងមុខ។

ទីពីរ គឺ​អ្នកបើកបរ​ត្រូវសារ៉េ​កៅអីអង្គុយ​ឱ្យបានស្រួលបួល ពាក់ខ្សែក្រវាត់ និង​កញ្ចក់ចំហៀង និងកញ្ចក់មើលក្រោយ​ឱ្យបានត្រឹមត្រូវងាយស្រួល​មើល ព្រមទាំងដោះហ្វ្រាំងដៃ។ ជាមួយគ្នានេះ ត្រូវពិនិត្យមើលលើដំណើរការរបស់​កាមេរ៉ារថយន្ត​ (បើមាន) ផងដែរ។

ទន្ទឹមនឹង​នេះដែរ លោកអ្នកក៏គួរតែ​ពិនិត្យមើល​កង់សាគួរ និង​ឧបករណ៍​ដោះដូរ ត្រៀម​បម្រុង​ប្រេង​ម៉ាស៊ីន​ និងទឹកស្អ​ និង​របស់​របរ​សំខាន់​ៗផ្សេងទៀតផងដែរ៕