នៅគ្រប់រថយន្តទាំងអស់​ ពេល​មាន​ភាព​ប្រក្រតីអ្វីមួយនៅលើរថយន្ត គឺតែងមានលោតសញ្ញា Check ក្នុងកុងទ័រ ដើម្បី​ឱ្យបើកបរ​បានដឹង។ សញ្ញា Check គឺ​មានច្រើនណាស់ ដែល​បញ្ជាក់​ពីបញ្ហាផ្សេងៗគ្នា តែក្នុងនោះ មាន​សញ្ញា Check ចំនួន៥ ដែល​លោកគួរចាប់អារម្មណ៍ ពេល​កំពុង​ធ្វើដំណើរតាមផ្លូវ ហើយបើអាច គួរស្វែងរក​យានដ្ឋាន​ជួសជុលសិនទៅ។ សញ្ញា Check ទាំង៥នោះមានដូចជា៖

១. សញ្ញា Check ម៉ាស៊ីន

សញ្ញានេះ​ តែងឧស្សាហ៍កើតឡើងជាងគេ ព្រោះ​តែវា​មានចំណុច​ពាក់ព័ន្ធច្រើននឹង​ម៉ាស៊ីន។ បញ្ហាភាគច្រើន​ដែល​បណ្តាល​ឱ្យ​លោតសញ្ញានេះ គឺជាបញ្ហាប៊ូស៊ី ឌុយស៊ឺមុំាង ចំហេះសាំង និង​សំបុកឃ្មុំ។ តែយ៉ាងណា ទោះពេលកំពុងបើករថយន្ត ហើយឃើញលោតសញ្ញានេះ ក៏កុំទាន់ស្លន់ស្លោពេកអី ពោលគឺ​លោកអ្នកនៅតែអាចបើករថយន្តធម្មតាបាន ប៉ុន្តែបើប្រទះឃើញហ្គារ៉ាសជួសជុលណាមួយហើយ គួរចូលឱ្យជាងឆែកមើលតែម្តងទៅ។

២. សញ្ញា​អាគុយ

បើឃើញលោតសញ្ញាអាគុយនេះ គឺ​មិនមែនមានន័យថា វា​អស់ ឬជិត​អស់អាគុយនោះទេ ប៉ុន្តែ​វាជា​បញ្ហា​ដំណើរការថាមពល ដែលអាចឈានដល់ការរលត់​ម៉ាស៊ីនរថយន្តតែម្តង។ យ៉ាងណាមិញ ប្រសិនរថយន្ត​មិនទាន់រលត់ គឺលោកអ្នកនៅមានក្តីសង្ឃឹម ហើយ​ត្រូវព្យាយាម​បើកទៅដល់​កន្លែងជួសជុលឱ្យទាន់ពេល។

៣. សញ្ញាព្រមាន​ប្រព័ន្ធ​ហ្រ្វាំង

នៅពេលឃើញលោតសញ្ញានេះ គឺ​ជាបញ្ហា​ហ្វ្រាំង​ដែលអាចបង្កគ្រោះថ្នាក់បានក្នុងកម្រិតខ្ពស់ ព្រោះ​អាចនឹង​ជាន់ហ្វ្រាំងមិនស៊ី ហើយជាមួយគ្នានេះ ប្រេងហ្វ្រាំង​ ក៏អាច​នឹង​ស្ថិតក្រោមកម្រិត​កំណត់។ វាក៏​អាច​ពាក់ព័ន្ធនឹង​បញ្ហា​សេនស័រ​ប្រព័ន្ធ ABS ផងដែរ។

៤. សញ្ញាឡើងកម្តៅខ្លាំង

វាជា​សញ្ញាទែម៉ូម៉ែត្រពណ៌ក្រហម​ដែលតំណាង​ឱ្យសីតុណ្ហភាព​ម៉ាស៊ីនរថយន្ត​កំពុងឡើងក្តៅខ្លាំង។ ភាគច្រើន​នៃការឡើងកម្តៅនេះ គឺ​ពាក់ព័ន្ធនឹង​ទឹកស្អំម៉ាស៊ីន​ដែលខ្វះ ឬរីងស្ងួតតែម្តង ក៏ដូចជា​ខូចកង្ហា​ធុងទឹកផងដែរ។ ពេលឃើញសញ្ញានេះភ្លាម លោកអ្នកគប្បី​ត្រូវអែបកៀនពន្លត់ម៉ាស៊ីនឱ្យបានកាន់តែលឿន តាម​ដែល​អាចធ្វើបាន ហើយបើកគម្របម៉ាស៊ីនត្រួតពិនិត្យមើលឱ្យបានជាក់លាក់​ដោយខ្លួនឯងបាន ធ្វើយ៉ាងណាកុំឱ្យកុបប៉េរលត់ម៉ាស៊ីនឱ្យសោះ។

៥. សញ្ញា​ពោងសុវត្ថិភាព

អាចនិយាយបានថា អាស្រ័យលើអ្នកបើកបរផ្ទាល់ថាតើ ត្រូវការជួសជុល​វាភ្លាមៗ ឬចាំពេល​ទំនេរ​យកទៅជួសជុលក៏បាន។ ​វាជាសញ្ញាព្រមានថា រថយន្តមាន​បញ្ហាពោងសុវត្ថិភាពដែលអាចនឹង​មិនដំណើរ​ការ។ ដូច្នេះ ប្រសិន​បើមានឧបទ្ទវហេតុ​បុកគ្នាកើតឡើង​ក្នុងអំឡុងពេលបើកបរ វាអាច​នឹងមិនផ្ទុះពោងសុវត្ថិភាពការពារជីវិតយើងឡើយ។

៦. សញ្ញា​ប្រេងម៉ាស៊ីនជិតអស់

ប្រេង​ម៉ាស៊ីន គឺ​ជា​បេះដូង​របស់រថយន្ត ហើយ​ប្រសិនបើ​ឃើញលោតសញ្ញានេះ មានន័យថា ប្រេងម៉ាស៊ីន​មានកម្រិតខ្វះខាតខ្លាំង ឬជិតរីងស្ងួតអស់ ដែល​តម្រូវឱ្យ​លោក​អ្នកត្រូវបញ្ឈប់​រថយន្ត​កាន់តែលឿនតាមដែលធ្វើបាន ព្រោះប្រសិនបើបន្តបើកបរទាំងបែបនេះ នឹង​អាចធ្វើឱ្យម៉ាស៊ីន​គាំងលែងដំណើរតែម្តង និងត្រូវចំណាយជួសជុលច្រើន។ តែចំពោះបញ្ហានេះ គឺងាយស្រួលទេបើលោកអ្នកយកប្រេងម៉ាស៊ីនសាគួរតាមមកជាមួយ គឺគ្រាន់តែចាក់បំពេញ​តាមកម្រិតស្តង់ដា ហើយចាំស្វែងរកយានដ្ឋានណាមួយ​ដើម្បី​ឆែកមូលហេតុដែលនាំ​ឱ្យមានការរីងស្ងួតប្រេងម៉ាស៊ីននេះ៕