ហេតុអ្វី ឡានកាន់តែទំនើប តែម៉ាស៊ីនកាន់តែតូច?

2022-02-17 03:35:29
ចំណេះដឹង

2022-02-17 03:35:29
ចំនួនមតិ 0 | ចំនួនចែករំលែក 0

ចន្លោះមិនឃើញ

បច្ចេកវិទ្យាកាន់តែរីកចម្រើនខ្លាំង បានធ្វើឱ្យផលិតផលដែលធំៗពីមុន តួយ៉ាងដូចជា ឧបករណ៍អេឡិចត្រូនិច ត្រូវបានបង្រួមមកកាន់តែតូចប៉ុន្តែកាន់តែមានមុខងារច្រើនសម្បូរបែប និងមានប្រសិទ្ធភាព។ មិនខុសគ្នាទេ ដូចនឹងម៉ាស៊ីនរថយន្តដែរ ពោលគឺរថយន្តកាន់តែទំនើប តែទំហំម៉ាស៊ីនកាន់តែតូច ដោយបច្ចុប្បន្នក្រុមហ៊ុនផលិតនីមួយៗ បានចាប់ផ្តើមបោះបង់ម៉ាស៊ីនធំៗចោលហើយ ដោយសារកត្តាមួយចំនួនដូចជា វត្ថុធាតុដើម តម្លៃ ការប្រកួតប្រជែងចំពោះរថយន្តដែលស៊ីសាំងតិច ច្បាប់ ពិសេសគឺការកាត់បន្ថយផលប៉ះពាល់បរិស្ថាន ខណៈដែលរថយន្តអគ្គិសនីក៏កំពុងវាយលុកខ្លាំង។

កាន់តែគួរឱ្យកត់សម្គាល់ទៀតនោះ រថយន្តស៊េរីឆ្នាំ២០២២នេះ ពិសេសរថយន្តរបស់ Toyota, Lexus, និង Ford បានទម្លាក់ទំហំម៉ាស៊ីនពី V8 មកនៅត្រឹម V6 ជំនួសវិញ ដោយបំពាក់ជាមួយនឹងទាក់បូ (Turbo)។ ម៉ាស៊ីន Turbo នេះហើយ ដែលធ្វើឱ្យក្រុមហ៊ុនរថយន្តងាកមកប្រើប្រាស់វា ហើយឈប់ប្រើម៉ាស៊ីនធំដើមធម្មតា (Naturally Aspirated)។

Turbo មានតួនាទីជំនួយ ដែលបឺតខ្យល់ពីអ៊ែរចូលទៅស៊ីម៉ាំងជំរុញដល់ម៉ាស៊ីនស្ទុះខ្លាំង។ វាបំពាក់ជាមួយម៉ាស៊ីនទំហំល្មម ឬតូចៗ ប៉ុន្តែវាផ្តល់នូវកម្លាំងសេះ និងកម្លាំងរមួល ប្រហែល ឬខ្ពស់ជាងម៉ាស៊ីនធំទៀត ហើយស៊ីប្រេងតិច។

ជាក់ស្តែងរថយន្ត Lexus LX 600 ប្រើម៉ាស៊ីន Twin-Turbo V6 ចំណុះ ៣,៥លីត្រ ផលិតបានកម្លាំង ៤០៩សេះ និងកម្លាំងរមួល ៦៤៩ញ៉ូតុនម៉ែត្រ ខណៈរថយន្ត Lexus LX 570 ប្រើម៉ាស៊ីន V8 ចំណុះ ៥,៧លីត្រ ផលិតបានកម្លាំង ៣៨៣សេះ និងកម្លាំងរមួល ៥៤៦ញ៉ូតុនម៉ែត្រ។

ដូច Turbo ដែរ គឺនៅមានម៉ាស៊ីនមួយទៀតដែលកំពុងត្រូវបានប្រើប្រាស់លើរថយន្ត Ford ស៊េរីថ្មីៗ គឺម៉ាស៊ីន EcoBoost ដែលវាជួយជំរុញដល់កម្លាំងម៉ាស៊ីន និងជួយឱ្យរថយន្តសន្សំសំចៃដូចគ្នា។ តួយ៉ាង រថយន្ត Ford ដែលប្រើម៉ាស៊ីន EcoBoost V6 ចំណុះ ៣,៥លីត្រ គឺខ្លាំងប្រហែលនឹងរថយន្តប្រើម៉ាស៊ីនដើម Naturally Aspirated V8 ចំណុះ ៥លីត្រ គ្រាន់តែមានកម្លាំងសេះតូចជាងបន្តិច ប៉ុន្តែមានកម្លាំងរមួលធំជាង។

យ៉ាងណាក៏ដោយ ការបំពាក់ម៉ាស៊ីន Turboក៏ផ្តល់គុណវិបត្តិដល់រថយន្តផងដែរ បើប្រៀបធៀបនឹងរថយន្តប្រើម៉ាស៊ីនធម្មតា។ រថយន្តដែលប្រើ Turbo មិនមានសន្ទុះខ្លាំងពេលចេញដេប៉ាដំបូងឡើយ រហូតទាល់តែរថយន្តបើកបាន smooth ទើប Turbo ធ្វើការជំរុញម៉ាស៊ីនបន្ថែម។ មិនតែប៉ុណ្ណោះ បើរថយន្តបើកក្នុងល្បឿនយឺត វាក៏មិនអំណោយផលសម្រាប់ Turbo ដែរ។ ម្យ៉ាងវិញទៀត ការបំពាក់ Turbo គឺត្រូវការបំពាក់គ្រឿងបង្គុំច្រើនបន្ថែមទៀតទៅតាមហ្នឹងដែរ ដូច្នេះនៅពេលខូច ឬមានបញ្ហាម៉ាស៊ីន គឺសំាញុំា និងចំណាយច្រើនជាងរថយន្តប្រើម៉ាស៊ីនធម្មតា៕