កុំពឹងតែលើខាងប្រុស ពេលមានឡានជិះស្រីៗគួរចេះវិធីថែរក្សាសំខាន់ៗ៤យ៉ាងនេះ

2021-11-30 03:29:33
ចំណេះដឹង

2021-11-30 03:29:33
ចំនួនមតិ 0 | ចំនួនចែករំលែក 0

ចន្លោះមិនឃើញ

នេះគឺជាយុគសម័យដែលមនុស្សស្រីពោរពេញដោយសមត្ថភាព ហើយក៏មិនចាំបាច់ត្រូវពឹងលើមនុស្សប្រុសគ្រប់រឿងនោះដែរ។ សូម្បីតែបញ្ហាយានជំនិះក៏ដោយ កុំគិតថាវាពិបាកស្មុគស្មាញ ធ្វើមិនកើត។ ពេលមានឡានជិះ មិនគួរបណ្តែតបណ្តោយ ទុកទាល់តែខូចទើបទៅរកជាងទេ ត្រូវដឹងពីវិធីថែរក្សាសំខាន់ៗ ៤ យ៉ាង ដែលអ្នកអាចធ្វើដោយខ្លួនឯងបាន។

១. របៀបពិនិត្យមើលកម្រិតប្រេងម៉ាស៊ីនក្នុងឡាន

ស្តាប់ទៅដូចជាពិបាកបន្តិចមែន ប៉ុន្តែកុំបារម្ភអី។ ដំបូងគ្រាន់តែបើកគម្របឡានខាងមុខ បន្ទាប់មកអ្នកនឹងឃើញ ប្រអប់រាងជ្រុងមួយនៅចំកណ្តាលដែលអាចមូលនិងដកចេញបាន។ បន្ទាប់មកទៀត ត្រូវដាក់ឧបករណ៍វាស់ប្រេងចូលទៅឲ្យដល់បាតក្រោមនៃប្រអប់ ពេលលើកចេញមកវិញបើមើលឃើញដូចក្នុងរូបទី១ មានន័យថាប្រេងម៉ាស៊ីននៅដំណើរការប្រក្រតី រូបទី២ បង្ហាញថាប្រេងម៉ាស៊ីនមានកម្រិតទាប ត្រូវចាក់បំពេញបន្ថែម ចំណែកឯរូបទី៣ បញ្ជាក់ថាប្រេងម៉ាស៊ីនកង្វក់ណាស់ ត្រូវផ្លាស់ប្តូរចេញម្តងហើយ។

២. របៀបសាកអាគុយឲ្យពេញឡើងវិញ

ពេលបញ្ឆេះម៉ាស៊ីនឡានមិនឆេះដោយសារតែអស់អាគុយ មិនបាច់ស្លន់ស្លោឬអង្គុយស្មុគតែឯងទៀតទេ។ ត្រូវសម្លឹងមើលមនុស្សនៅជុំវិញខ្លួនដែលមានឡានជិះ ហើយសួររកខ្សែសាក (បើអ្នកមិនមាន) បើគេបានយកមកទុកសាគួរក្នុងឡាន អ្នកគ្រាន់តែខ្ចីគេសាកមួយភ្លែត ម៉ាស៊ីននឹងដំណើរការធម្មតាវិញហើយ។

** របៀបសាកអាគុយពីឡានដទៃ*

ដាក់ឡានទាំងពីរឲ្យនៅជិតឬទល់មុខគ្នា ដើម្បីងាយស្រួលក្នុងការផ្ទេរថាមពល។
យកដង្គៀបដែលមានសញ្ញាបូក (ពណ៌ក្រហម) ទៅកៀបឲ្យជាប់នឹងអាគុយប៉ូលបូកដូចគ្នា របស់ឡានដែលមិនអាចដំណើរការ។
បន្ទាប់មកយកដង្គៀបដែលមានសញ្ញាបូក (ពណ៌ក្រហម) ទៅកៀបឲ្យជាប់នឹងអាគុយប៉ូលបូកដូចគ្នា របស់ឡានដែលមានថាមពលពេញ។
យកដង្គៀបដែលមានសញ្ញាដក (ពណ៌ខ្មៅ) ទៅកៀបឲ្យជាប់នឹងអាគុយប៉ូលដកដូចគ្នា របស់ឡានដែលមានថាមពលពេញ។
នៅសល់ដង្កៀបពណ៌ខ្មៅចុងក្រោយគេ អាចយកទៅកៀបនៅត្រង់កន្លែងណាដែលជាលោហធាតុ។
ពេលកៀបរួចរាល់សព្វគ្រប់ហើយ ត្រូវបញ្ឆេះម៉ាស៊ីនឡានដែលមានថាមពលពេញ ទុកចោល៣-៥នាទី។

ពេលគ្រប់នាទីហើយត្រូវដកដង្កៀបចេកវិញតាមដំណាក់កាលទើបមិនបណ្តាលឲ្យមានគ្រោះថ្នាក់ ដូចជាផ្ទុះឬបែកផ្កាភ្លើងជាដើម។ របៀបដកគ្រាន់តែ ធ្វើបញ្ច្រាសពីដំណាក់កាលដែលបានបញ្ចូលខាងលើ គឺត្រឹមត្រូវហើយ (អាចមើលតាមវីដេអូខាងក្រោមនេះបាន)។

៣. របៀបលាងឡានឲ្យបានត្រឹមត្រូវ

ភាគច្រើនមនុស្សស្រីមិនចូលចិត្តលាងឡានដោយខ្លួនឯងនោះទេ ប៉ុន្តែយ៉ាងហោចណាស់ ក៏ត្រូវយកទៅឲ្យគេលាងសម្អាតឲ្យបានទៀតទាត់ដែរ។ អ្នកជំនាញ បានឲ្យយោបល់ថា ឡានគួរលាងឲ្យបានម្តងក្នុងមួយឬពីរអាទិត្យ។ បើអ្នករស់នៅជិតសមុទ្រ ត្រូវលាងឲ្យបានញឹកញាប់ជាងនេះ ព្រោះជាតិអំបិលអាចធ្វើឲ្យជាតិលោហៈរបស់ឡានឆាប់ពុកឬច្រែះ។ ជាពិសេសផ្នែកខាងក្នុងនៃឡាន ត្រូវមានរបៀបរៀបរយនិងអនាម័យល្អ ទើបមិនផ្ទុកមេរោគនិងក្លិនអាក្រក់។

៤. របៀបចាក់បំពេញទឹកសម្រាប់ផ្លិតបក់កញ្ចក់

កុំចាំដល់ពេលភ្លៀងទើបចាក់បំពេញ។ ត្រូវត្រៀមឲ្យបានរួចរាល់គ្រប់ពេលវេលា ដើម្បីទុកប្រើពេលកញ្ចក់ស្អាប់ពិបាកមើល។ ដំបូងត្រូវ ស្វែងរកគម្របជ័រមួយដែលមានរូបដូចកញ្ចក់និងមានដំណក់ទឹកភ្លៀងនៅចំកណ្តាល បន្ទាប់មកបើកគម្របចេញ ចាក់ទឹកចូល (អាចលាយជាមួយទឹកសាប៊ូក៏បាន)។ ពេលប្រើផ្លិតបក់លើកក្រោយ កញ្ចក់ឡាននឹងភ្លឺថ្លាចែងចាំង។

ប្រភព៖ howstuffworks | jelly