សាកភ្លើងទូរសព្ទទុកចោល មួយយប់ទល់ភ្លឺ ជាទង្វើត្រឹមត្រូវទេ?

2021-01-14 10:20:23
ចំណេះដឹង

2021-01-14 10:20:23
ចំនួនមតិ 0 | ចំនួនចែករំលែក 0

ចន្លោះមិនឃើញ

រៀងរាល់យប់ មុនបិទភ្នែកចូលដេក យុវវ័យបច្ចុប្បន្ននិយមចុចទូរសព្ទបណ្ដើរ សាកភ្លើងបណ្ដើរ មានពេលខ្លះដេកលក់ចោលទូរសព្ទ ហើយឲ្យវាសាកចោលពេញមួយយប់ទល់ភ្លឺក៏មានដែរ រហូតមានអ្នកខ្លះធ្វើសកម្មភាពដដែលៗនេះទៅជាទម្លាប់ប្រចាំថ្ងៃទៀតផង។ តើទង្វើនេះ ជារឿងត្រឹមត្រូវដែរទេ? តោះ! មកអានការបកស្រាយបែបបច្ចេកទេសពីអ្នកជំនាញ។

រូបតំណាង

លោក Edo Campos វិស្វករផ្នែកផលិតថាមពលថ្មប្រចាំនៅក្រុមហ៊ុន Anker ដែលជាម៉ាក PowerBanks ដ៏ល្បីនៅសហរដ្ឋអាមេរិកបាននិយាយថា៖ សព្វថ្ងៃឧបករណ៍ឆ្លាតវៃស្ទើរតែទាំងអស់ ពួកវាពិតជាឆ្លាតៗមែន។ លោកសំដៅទៅដំណើរការផ្នែកខាងក្នុងរបស់វា ជាក់ស្តែងដូចជា ស្មាតហ្វូនបច្ចុប្បន្ន គេផលិតមកមានបន្ថែមស្រទាប់ការពារ និងកម្រិតថាមពលថ្មច្បាស់លាស់ ទោះជាអ្នកសាកភ្លើងដាក់ចោលរហូតពេញ ក៏ពួកវាលែងសាកបន្ថែមដែរ។

លោក Edo Campos

ឧទាហរណ៍៖ បើអ្នកប្រើប្រាស់ឆ្នាំងសាកដើម(Original) របស់ក្រុមហ៊ុនទូរសព្ទដែលអ្នកទិញ នៅពេលដែលអ្នកសាកពេញ 100% នោះស្រទាប់ឬបន្ទះការពារនៅខាងក្នុង វានឹងបញ្ចប់ចរន្ត ហើយការសាកក៏រលត់ដោយស្វ័យប្រវត្តិ។

ជាទូទៅ ប្រភេទថ្មដែលបំពាក់លើស្មាតហ្វូនបច្ចុប្បន្នទាំង iPhone ឬ Android Phone ភាគច្រើនជាប្រភេទថ្ម Lithium-ion (Li-ion)។ Li-ion ជាប្រភេទថ្មជំនាន់ថ្មីដែលមានសមត្ថភាពអាចសាកបានលឿនជាងជំនាន់ចាស់(ជំនាន់ចាស់គេប្រើថ្ម rechargeable)។ ថ្ម Li-ion រួមជាមួយនឹងការបំពាក់បច្ចេកវិទ្យាលើខ្សែសាកដែលបញ្ជូនថាមពលបានលឿនដូចគ្នាផងនោះ ធ្វើឲ្យស្មាតហ្វូនអ្នកចំណាយពេលតែកន្លះម៉ោង អាចសាកបានដល់ 50% ឬ 80% ផងក៏មានដែរ។

ថ្មប្រភេទថ្មីនេះ អ្នកមិនចាំបាច់ត្រូវសាករហូតដល់ពេញ 100% ទើបអាចប្រើបាននោះទេ ពោលគឺ សាកបានប៉ុណ្ណា វានឹងបញ្ឈប់ចរន្តត្រឹមនោះ ហើយក៏មិនធ្វើឲ្យថ្មខូចដែរ ទោះជាដោតចោលមួយយប់ទល់ភ្លឺក៏ដោយ។ លោក John Bradshaw អ្នកគ្រប់គ្រងផ្នែកទីផ្សារនិងជាអ្នកជំនាញផ្នែកថាមពលប្រចាំនៅក្រុមហ៊ុន Cadex Electronics បញ្ជាក់៖

លោក John Bradshaw

លោក Bradshaw បន្តថា ពិតហើយ! ទាំងគេទាំងខ្ញុំពេលកាន់ទូរសព្ទម្ដងៗចុចបើកមុខងារច្រើនក្នុងពេលតែមួយដូចជា លេងឆាត ប្រើប្រាស់កម្មវិធី លេងហ្គេម មើលវីដេអូ ឬស្ដាប់ចម្រៀងជាដើម។ ប្រការនេះហើយដែលធ្វើឲ្យថ្មទូរសព្ទមិនអាចទ្រាំបានដល់ពេញមួយថ្ងៃ ទាមទារឲ្យអ្នកប្រើត្រូវសាកភ្លើងច្រើនដងក្នុងមួយថ្ងៃ រហូតហៀរដល់យប់ និងដល់ទល់ភ្លឺទៀតផង។

ឯលោក Campos ក៏បន្ថែមពីលើនេះថា បើអ្នកក្រឡេកមើលអតីតកាល ដែលមិនទាន់ជឿនលឿនដូចសព្វថ្ងៃ ស្ថាប័នផលិតទូរសព្ទបានរចនារូបរាងទូរសព្ទមានសន្ទះខាងក្រោយ អាចដោះចេញបាន តួយ៉ាងដូចជា Nokia, Samsung, Motorola, LG ជាដើម។ ប្រភេទថ្មដែលគេប្រើប្រាស់ភាគច្រើនជាប្រភេទថ្ម Rechargeable (អាចដោះយកមកសាកភ្លើងបាន)។ ជាហេតុធ្វើឲ្យថ្មបាត់បង់ថាមពលខ្លះ នៅពេលអ្នកដោះចុះឡើង ហើយអ្វីដែលធ្វើឲ្យអ្នកទាំងអស់គ្នាខ្លាចរអានោះគឺ វាគ្មានស្រទាប់ការពារចរន្តដូចរៀបរាប់ខាងលើនោះទេ ប្រការនេះហើយដែលអាចបណ្ដាលឲ្យថ្មទូរសព្ទហើមប៉ោង ឬអាចផ្ទុះ អំឡុងពេលសាកភ្លើងទៀតផង។

ចុះបើមានការអះអាងបែបនេះ ហេតុអ្វីក៏មានករណីផ្ទុះថ្មស្មាតហ្វូនដែលជាប្រភេទថ្ម Li-ion?

ចម្លើយពីអ្នកជំនាញបកស្រាយថា វាមកពីកត្តាអ្នកប្រើប្រាស់។ ឯកត្តារួមផ្សំផ្សេងទៀត អាចបណ្ដាលមកពីក្រុមហ៊ុនផលិតទូរសព្ទមិនបានពិនិត្យឲ្យម៉ត់ចត់ក្នុងពេលតេស្តសាកល្បង មុនចេញលក់លើទីផ្សារ។

រូបតំណាង

ឥឡូវងាកមកប្រធានបទវិញ ការសាកភ្លើងទូរសព្ទទុកចោល មួយយប់ទល់ភ្លឺ វាជាទម្លាប់របស់អ្នកប្រើប្រាស់ ដែលអ្នកជំនាញក៏មិនបែងចែកបានថាជា ទង្វើត្រឹមត្រូវ ឬមិនត្រឹមត្រូវបាននោះទេ ប៉ុន្តែគេបានណែនាំវិធីខ្លះៗ ប្រសិនបើចង់ឲ្យទម្លាប់សាកភ្លើងទុកចោលនេះ ប្រែមកជាទម្លាប់ល្អ ឬទង្វើត្រឹមត្រូវ៖

កុំទុកឲ្យទូរសព្ទអស់ភ្លើងរហូតដល់ 0% បានសាកភ្លើង
បើឃើញថ្មនៅសល់ត្រឹម 35% ប្រញាប់សាកឲ្យពេញ
កុំប្រើប្រាស់ឆ្នាំងសាកក្លែងក្លាយ ឬជារបស់គ្មានធានាពីក្រុមហ៊ុននាំចូល
បើទូរសព្ទក្តៅខ្លាំង ត្រូវទុកឲ្យត្រជាក់ចាំសាកភ្លើង
ហាមសាកភ្លើងពេលទូរសព្ទកំពុងក្ដៅខ្លាំង
ត្រូវរកកន្លែងសាកទូរសព្ទឲ្យសមរម្យ ដោយដាក់នៅលើតុក្បែរក្បាលដំណេក(ហាមដាក់នៅលើភួយឬខ្នើយ អាចបណ្ដាលឲ្យឆេះ ករណីទូរសព្ទក្តៅខ្លាំង)

ចំពោះប្រិយមិត្តវិញយល់ថា ការសាកភ្លើងទូរសព្ទទុកចោល មួយយប់ទល់ភ្លឺ ជារឿងត្រឹមត្រូវដែរទេ? អាចបញ្ចេញមតិខាងក្រោមបាន៕

ប្រភព៖ Time