- 2019-09-26 02:33:19
- ចំណេះដឹង
មាន ១០ម៉ឺន ១លាន ៤លាន View លើ YouTube អាចរកបានប៉ុន្មានលុយ?
- 2019-09-26 02:33:19
- ចំនួនមតិ 0 | ចំនួនចែករំលែក 0
មាន ១០ម៉ឺន ១លាន ៤លាន View លើ YouTube អាចរកបានប៉ុន្មានលុយ?
ចន្លោះមិនឃើញ
ប្រសិនបើគណនី YouTube មួយមានចំនួន Subscriber ដល់ ១ ពាន់នាក់ និងមានចំនួនទស្សនាស្មើនឹងរយៈពេល ៤ ពាន់ម៉ោង ម្ចាស់គណនីអាចដាក់ពាក្យចូលរួមក្នុងកម្មវិធី YouTube's Partner Program បាន។
នៅពេលចូលរួមក្នុងកម្មវិធី YouTuber អាចរកចំណូលដោយបញ្ចូលផ្ទាំងពាណិជ្ជកម្ម (Ads) ទៅលើវីដេអូរបស់ខ្លួន។ ផ្ទាំងពាណិជ្ជកម្មគឺចាត់ចែងឡើងដោយ Google ហើយទឹកប្រាក់ដែលអាចទទួលបានគឺផ្អែកលើចំនួនទស្សនា (View), រយៈពេលទស្សនានៃវីដេអូមួយ និងទីតាំងភូមិសាស្ត្រ រួមទាំងអាយុរបស់អ្នកទស្សនាទៀតផង។
វិបសាយ Business Insider បានប្រមូលផ្ដុំនូវតួលេខចំនួន ៣ ដែលជាចំណូលគេអាចរកបានពីវីដេអូដែលមានចំនួនទស្សនា ១០ម៉ឺនដង, ១លានដង និង ៤ លានដង ដែលដកស្រង់ពី YouTuber នៅសហរដ្ឋអាមេរិក។
Natalie Barbu ជាម្ចាស់គណនី YouTube ដែលមាន Subscriber ចំនួនជាង ២៣ ម៉ឺននាក់ នៅក្នុងមួយសប្ដាហ៍នាងតែងបង្ហោះវីដេអូ ២ បង្ហាញអំពីជីវិតប្រចាំថ្ងៃរបស់ខ្លួន។ គណនីរបស់នាងមានវីដេអូជាង ២០ ដែលមានអ្នកចុចទស្សនា ១០ ម៉ឺនដង។
ជាមធ្យមវីដេអូមានចំនួនទស្សនាជាង ១០ ម៉ឺនដង អាចជួយរកចំណូលឲ្យ Natalie បានចន្លោះពី ៥០០ ដុល្លារ ទៅ ១ ០០០ ដុល្លារ ដោយអាស្រ័យលើចំនួនផ្ទាំងពាណិជ្ជកម្ម។ ប៉ុន្មានឆ្នាំមុន វីដេអូមួយមានអ្នកចុចមើល ១០ ម៉ឺនដង ជួយឲ្យ Natalie រកចំណូលបានត្រឹម ១០០ ដុល្លារ ដោយសារមានបញ្ចូល (Ads) តែមួយប៉ុណ្ណោះ។
Shelby Church គឺជា YouTuber ដែលមាន Subscriber ចំនួន ១,៣ លាននាក់ ដែលនាងបានប្រាប់ថាវីដេអូមានចំនួនទស្សនាជាង ១ លានដង អាចឲ្យនាងបានចំណូលចន្លោះពី ២ ពាន់ដុល្លារ ទៅ ៥ ពាន់ដុល្លារ។
Shelby Church ដដែលបានបង្ហាញថានាងធ្លាប់ទទួលបានចំណូល ១៥ ០០០ ដុល្លារ មួយលើក ពីវីដេអូមួយដែលមានអ្នកទស្សនាដល់ ៤ លានដង។ វាជាចំណូលដ៏ច្រើនមួយដែលនាងទទួលបាន ក្រោយប្រកបមុខរបរនេះ ៩ ឆ្នាំ។
មិនត្រឹមតែអាចរកចំណូលបានច្រើននោះទេ ប៉ុន្តែក៏ជួយឲ្យគណនីរបស់ Shelby រីកធំផងដែរ។ ផ្អែកតាមស្ថិតិរបស់ YouTube គណនីរបស់នាងបានកើនចំនួន Subscriber ប្រមាណ ៥៨ ០០០ នាក់ ពីវីដេអូដែលមានអ្នកចុចមើលជាង ៤ លានដងនោះ៕