- 2020-02-12 03:36:59
- ចំណេះដឹង
Galaxy S20 Ultra ជាទូរសព្ទដំបូងគេក្នុងលោកមាន RAM 16GB ប៉ុន្តែសួរថាចាំបាច់អត់?
- 2020-02-12 03:36:59
- ចំនួនមតិ 0 | ចំនួនចែករំលែក 0
Galaxy S20 Ultra ជាទូរសព្ទដំបូងគេក្នុងលោកមាន RAM 16GB ប៉ុន្តែសួរថាចាំបាច់អត់?
ចន្លោះមិនឃើញ
Galaxy S20 Ultra បានបង្ហាញខ្លួនជាផ្លូវការជាមួយជម្រើស RAM ចំនួនពីរប្រភេទ ដែលតូចបំផុតគឺ ១២GB និងធំបំផុតគឺ ១៦GB ជាស្មាតហ្វូនដំបូងគេក្នុងលោកមានប្រើ RAM ធំដល់ថ្នាក់នេះ។ ប៉ុន្តែសួរថា RAM ទំហំ ១៦GB នេះចាំបាច់ដែរឬអត់?
បើតាមការសិក្សារបស់ Android Authority បានឲ្យដឹងថា ការប្រើប្រាស់កម្មវិធីធម្មតា (ដូចជាបណ្ដាញសង្គម, ការកែរូបភាព និងកិច្ចការប្រចាំថ្ងៃ) ឬការលេងហ្គេមធម្មតា គឺប្រើប្រាស់ RAM ប្រមាណ ៤០០MB។ ប្រសិនបើទូរសព្ទអ្នកមាន RAM ទំហំ ៦GB ហើយមាន RAM ទំហំ ៣,៥GB នៅសេសសល់ នោះអ្នកអាចដំណើរការកម្មវិធីចំនួន ៩ ក្នុងពេលតែមួយបាននៅលើ RAM មានន័យថាអ្នកអាចប្ដូរពីកម្មវិធីមួយទៅកម្មវិធីមួយទៀតដោយកម្មវិធីនោះមិនចាំបាច់បើកសាឡើងវិញ (Reload) ឡើយ។
ប៉ុន្តែមានកម្មវិធីមួយចំនួនដែលប្រើប្រាស់ RAM ធំ ដូចជាហ្គេម Asphalt 9 ឬ Real Racing 3 អាចប្រើ RAM ចន្លោះពី ១GB និង ១,៤GB។ នេះមានន័យថាកម្មវិធី ៣ ឬ ៤ នឹងត្រូវផ្អាកដំណើរការដើម្បីទុកចន្លោះសម្រាប់ហ្គេម ករណីដែលអ្នកបានដំណើរការកម្មវិធីចំនួន ៩ រួចហើយ ហើយស្មាតហ្វូនមាន RAM ទំហំ ៦GB។
ប្រសិនបើទូរសព្ទមាន RAM ទំហំ ៨GB ហើយនៅសល់ RAM ទំហំ ៥GB នោះអ្នកអាចមាន RAM គ្រប់គ្រាន់សម្រាប់ដំណើរការកម្មវិធីចំនួន ១០ និងហ្គេមទំហំធំមួយ នៅក្នុង RAM។ អ្នកអាចប្ដូរពីហ្គេមទៅកាន់កម្មវិធីបណ្ដាញសង្គម រួចអាចទៅឆែកមើលអ៊ីមែល រួចទៅកាន់កម្មវិធីបណ្ដាញសង្គមផ្សេងទៀត ផ្ញើសារទៅកាន់នរណាម្នាក់ អានអត្ថបទមួយចំនួនលើវិបសាយ ឆែកមើលធាតុអាកាស រួចហើយអាចវិលត្រឡប់ទៅលេងហ្គេមវិញដោយវាមិនបាច់ដំណើរការឡើងវិញ (Reload)។ ដូចនេះ RAM ទំហំ ៨GB គឺជាទំហំល្អមួយសម្រាប់ស្មាតហ្វូន។
ជាមួយ RAM ទំហំ ១២GB អ្នកនឹងមានសល់ RAM ទំហំ ៨GB សម្រាប់ដំណើរការកម្មវិធី។ មានន័យថាអ្នកអាចដំណើរការកម្មវិធីជាច្រើន និងបើកហ្គេមទំហំធំបានចំនួនពីរ ឲ្យវាដំណើរការលើ RAM ក្នុងពេលដំណាលគ្នា។ ឈានដល់ករណីនេះវាគឺលើសពីការប្រើប្រាស់ធម្មតាទៅហើយ ដោយអ្នកដែលលេងហ្គេមមួយហើយ មិនអាចបកទៅលេងហ្គេមផ្សេងមួយទៀតនោះឡើយ។
ចំណែក RAM ទំហំ ១៦GB វាកាន់តែច្រើនលើសលប់សម្រាប់ការប្រើប្រាស់ប្រចាំថ្ងៃទៅទៀត លុះត្រាតែអ្នកប្រើប្រាស់ លេងហ្គេមច្រើនក្នុងពេលតែមួយ និងប្រើប្រាស់កម្មវិធីដទៃទៀតលើសពី ២០ កម្មវិធីក្នុងពេលតែមួយ។
បញ្ជាក់ថា RAM ធំលើស្មាតហ្វូន មិនអាចជួយឲ្យកម្មវិធីដើរលឿន មិនជួយបង្កើនល្បឿននៃ UI មិនជួយដល់ដំណើរការ GPU មិនជួយបង្កើនថាមពលថ្ម មិនជួយឲ្យដោនឡូដលឿនជាងមុន និងមិនជួយឲ្យទូរសព្ទសាកថ្មលឿនជាងមុននោះដែរ។ តួនាទីដ៏ធំរបស់ RAM គឺរក្សាទុកកម្មវិធីឲ្យដំណើរការនៅ Background តែប៉ុណ្ណោះ៕