ចង់ប្រើ Smartphone ថតរូប Portrait ស្អាតល្អ សាកគន្លឹះទាំង១០នេះ

2018-11-25 02:14:00
គន្លឹះ

2018-11-25 02:14:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ត្រឹមតែប្រើស្មាតហ្វូន ក៏អាចថតរូប Portrait បានស្អាតដូចកាមេរ៉ាអាជីពដែរ បើសិនជាអ្នកយល់ពីគន្លឹះសំខាន់មួយចំនួន ហើយខាងក្រោមនេះ ជាគន្លឹះទាំង ១០ ដែលអ្នកអាចអនុវត្តបាន។

១. រកកម្មវត្ថុដែលគួរឲ្យចាប់អារម្មណ៍មួយ ដើម្បីទាក់ភ្នែកអ្នកមើល

ក្នុងរូបមួយសន្លឹក Subject សំខាន់បំផុត ហើយក៏ជាកន្លែងដែលទាក់ទាញអ្នកមើលឲ្យផ្ដោតក្រសែភ្នែកទៅរក ផងដែរ។ Subject ដែលបង្កើតភាពទាក់ទាញបាន គួរតែនៅកន្លែងមានពន្លឺជាងគេ មានពណ៌ប្លែកពីគេ មានកិរិយា អាការៈ លេចធ្លោជាងគេ ប្រៀបដូចជាហង្សនៅកណ្ដាលហ្វូងទាដូច្នោះដែរ។

២. រក Background ដែលធ្វើឲ្យកម្មវត្ថុលេចធ្លោឡើង

នៅពីក្រោយ Subject គួរតែជា Background ដែលមិនរញ៉េរញ៉ៃ និងមានពណ៌ស្រអាប់ជាង និងខុសគ្នាពីSubject។ ឧទាហរណ៍ថា កម្មវត្ថុពាក់អាវក្រហម Background គួរតែពណ៌-ស។

៣. ថតរូបដោយប្រើពន្លឺចាំងចែង ដើម្បីឲ្យ Subject មើលទៅស្រស់ថ្លា

ត្រង់ចំណុចនេះ Subject មានទីតាំងនៅកន្លែងមានពន្លឺតិច ដូចជា ពន្លឺពេលព្រឹកថ្ងៃទើបរះ និងពន្លឺពេលល្ងាច ថ្ងៃជិតលិច ដែលពន្លឺទាំងនេះ មានលក្ខណៈស្រទន់ ធ្វើឲ្យសាច់មនុស្ស ឬស្លឹកឈើចាំងភ្លឺថ្លា។ អ្នកក៏អាចបង្កើតពន្លឺដោយអំពូលពិល ទាន ឬចង្កៀងផងដែរ។

៤. សម្រេចចិត្តប្រើ Composition ណាមួយ ដើម្បីធ្វើឲ្យមានភាពទាក់ទាញ

Composition ជាកត្តាសំខាន់ក្នុងការផលិតរូបភាព។ វាពឹងផ្អែកទៅលើស្ថានភាពអំណោយផលនៃទីតាំងរបស់អ្នក និងការច្នៃប្រឌិតរបស់អ្នក ថាតើអ្នកត្រូវប្រើទ្រឹស្ដី Composition មួយណាក្នុងការថតរូប។Composition ដែលពេញនិយមប្រើ និងស័ក្ដិសមជាងគេសម្រាប់ថតរូបតាមទូរស័ព្ទគឺ Rule of third និង Leading line ។

៥. ប្រើ Portrait Mode ដើម្បីជួយឲ្យ Blur Background

សម្រាប់កាមេរ៉ា iPhone គឺមាន Portrait Mode ប៉ុន្តែកាមេរ៉ាទូរស័ព្ទផ្សេងទៀត ប្រហែលជាអត់មាន។ ទោះបីជាអត់មានក៏ដោយ អ្នកនៅតែអាចថតបានជាធម្មតា ដោយប្រើវិធិសាស្ត្រដូចបានរៀបរាប់ខាងលើ។

៦.ចំណុចសំខាន់បំផុត គឺ Focus នៅត្រង់ភ្នែក

មិនថាថតរូបតាមទូរស័ព្ទ ឬកាមេរ៉ាទេ ចំណុចសំខាន់នៃការ Focus គឺត្រង់ភ្នែក (មនុស្ស) ចំណែកវត្ថុ ឬរុក្ខជាតិក៏មានចំណុចសំខាន់របស់វាដែរ ឲ្យតែអ្នកព្យាយាមស្វែងរក។ ភ្នែកមនុស្ស គឺជាចំណុចដែលបង្ហាញពីថាមពលខ្លាំងជាងគេ ព្រោះវាបានបង្ហាញមនោសញ្ចេតនា តាមក្រសែភ្នែកទៅកាន់អ្នកមើល។ ដូច្នេះអ្នកកុំរារែក ស្រពេចស្រពិលថា តើត្រូវចុច Focus ត្រង់ណា។ ចំណុចដំបូងបង្អស់ គឺភ្នែកហ្នឹងឯង បន្ទាប់មក ចាំគិតទៀតថា តើកន្លែងណាដែលអ្នកចង់ផ្ដោតសំខាន់។

៧. ថតឲ្យច្រើនប្លង់ខុសៗគ្នា

បើអ្នកឈរមួយកន្លែងដើម្បីថត រូបរបស់អ្នកមិនមានអ្វីប្លែកទេ ទោះថត ១០-២០ រូបក៏ដោយ មើលទៅដដែលៗ។ ប៉ុន្តែបើអ្នកផ្លាស់ឥរិយាបថតែបន្តិច អ្នកនឹងទទួលបានអ្វីដែលថ្មីប្លែកជាងមុន។ អ្នកឈរថត បន្ទាប់មក អង្គុយចុះ បន្ទាប់មកឱនទាបនឹងដី ឬចូលកៀក Subject ជាងមុន ថយឲ្យឆ្ងាយជាងមុន ថតពីខាងលើចុះមកក្រោម។ តាមរយៈឥរិយាបថទាំងអស់នេះ អ្នកនឹងទទួលបានរូបខុសគ្នាទាំងអស់ ហើយរូបនីមួយៗមានលក្ខណៈពិសេសផ្សេងៗគ្នា។

៨. ប្រើរបស់ជំនួយ (Props) ដើម្បីឲ្យរូបអ្នកកាន់តែទាក់ទាញ

ពេលខ្លះមនុស្ស ដែលជាកម្មវត្ថុ (Subject) របស់អ្នកពិបាកនឹងបញ្ចេញកាយវិការឲ្យស័ក្ដិសមតាមលក្ខណៈធម្មជាតិណាស់ ព្រោះពួកគេមិនដឹងថា ត្រូវធ្វើយ៉ាងម៉េចសម ឬមួយពេលខ្លះកម្មវត្ថុរអៀនខ្មាស់។ ត្រង់នេះអ្នកអាចប្រើ សម្ភារៈជំនួយ ដើម្បីឲ្យពួកគេសំដែងបានល្អ។

៩. ឱ្យ Subject បង្ហាញពីអារម្មណ៍ខាងក្នុងឲ្យលេចធ្លោឡើង ដើម្បីឲ្យមើលឃើញពីថាមពលរូប

វាពាក់ព័ន្ធនឹងភាពជាឯកជនរបស់តួអង្គអ្នក។ តើពួកគេចូលចិត្តអ្វី មានអារម្មណ៍បែបណា ហើយឲ្យពួកគេបញ្ចេញមកក្រៅតាមធម្មជាតិ។ រូបភាពបែបនេះ គឺប្រកបដោយថាមពល ដែលទាក់ទាញបំផុត។

១០. Edit រូបដោយប្រុងប្រយ័ត្ន

ប្រាកដណាស់ ថតរូបហើយចៀសមិនផុតទេគឺត្រូវការកែច្នៃបន្ថែមក្នុង App ដើម្បីបង្កើនសម្រស់។ តែកុំ Edit ជ្រុលពេកក្រែងខូចរូប។ ចំណុចដែលត្រូវធ្វើមុនគេ គឺធ្វើយ៉ាងណាឲ្យសាច់របស់តួអង្គ (កម្មវត្ថុ) មើលទៅស្រទន់ អ្នកត្រូវមើលទៅលើ Exposure និង Temperature ។ ចង់ឲ្យរ៉ូមេនទិកបន្តិច អ្នកគួរមើលទៅលើ Contrast ។ មាន App ច្រើនទៀត ដែលជួយឲ្យអ្នកអាចកែរូបបានស្អាត តាមរយៈទូរស័ព្ទដូចជា Snapseed, VSCO និង Mextures៕

អត្ថបទ៖ អ៊ុំ សុភក្តិ