ធ្លាប់តែហៅកង់បីឥណ្ឌា ឬទុកទុក ពេញៗមាត់ តិចអត់ដឹងថាប្រភពមកពីណាទៅ?

2021-08-02 09:39:14
ចំណេះដឹង

2021-08-02 09:39:14
ចំនួនមតិ 0 | ចំនួនចែករំលែក 0

ចន្លោះមិនឃើញ

នាពេលបច្ចុប្បន្ន កង់បីឥណ្ឌា ឬទុកទុក កំពុងតែវាយលុកយ៉ាងខ្លាំងនៅលើទីផ្សារអាស៊ី។ ហើយក៏មានកម្មវិធីហៅកង់បីជាច្រើនបានផ្តល់ភាពងាយស្រួល មិនត្រឹមតែចំពោះអ្នកប្រើប្រាស់ ប៉ុន្តែវាក៏ជួយដល់ភាពស្រួលដល់អ្នកបើកបរផងដែរ។ ជាមួយនឹងបច្ចេកវិទ្យាទំនើប អ្នកអាចធ្វើដំណើរទៅតំបន់ណាក៏បាន ដោយគ្រាន់តែដៅនៅតំបន់នោះលើផែនទីក្នុងទូរសព្ទរបស់អ្នក មិនតែប៉ុណ្ណោះវាមានតម្លៃសមរម្យទៀតផង។

កង់បីឥណ្ឌា ទទួលបានចំណាប់អារម្មណ៍ខ្លាំងណាស់ ប៉ុន្តែពុំសូវជាមានអ្នកដឹងអំពីប្រវត្តិរបស់យានជំនិះនេះឡើយ។ តើវាមានប្រភពមកពីណាទៅ?

ចុច Subscribe ឆានែល Telegram របស់ Sabay ដើម្បីទទួលបានព័ត៌មានថ្មីៗទាន់ចិត្ត

យានជំនិះប្រភេទនេះកើតចេញដំបូងពីការអូសរទេះដឹកមនុស្ស (ឆៃកែវ) នៅពាក់កណ្ដាលសតវត្សទី ១៩ នៅប្រទេសជប៉ុន ហើយទទួលបានប្រជាប្រិយភាពយ៉ាងខ្លាំង។ ចំពោះអ្នកបង្កើតរម៉កនេះពុំដឹងច្បាស់នៅឡើយទេ។

មានប្រភពខ្លះថា លោក Jonathan Scobie ជនជាតិអាមេរិកជាអ្នកផលិតនៅជប៉ុន ដើម្បីដឹកប្រពន្ធលោក នៅឆ្នាំ ១៨៦៩។ ឯប្រភពខ្លះទៀតថា ជាការសហការគ្នារវាងជនជាតិជប៉ុនបីនាក់ ឈ្មោះ Izumi Yosuke, Suzuki Tokujiro និង Takayama Kosuke នៅឆ្នាំ ១៨៦៨។

បន្ទាប់មកមានការប្រែប្រួលបន្តិចម្តងៗ ពីការប្រើកម្លាំងមនុស្សអូស មកការជិះកង់អូស រហូតដល់អំឡុងទសវត្សរ៍ទី ៦០ ទើបមានការប្រែប្រួលខ្លាំងទៅលើរចនាបថរបស់កង់បីនេះ។

ក្រោយមកទៀត អ្នករត់កង់បីជនជាតិថៃម្នាក់ឈ្មោះ Jumrush Vhooonsri បានធ្វើការកែលម្អ ដោយបន្ថែម ម៉ូទ័រ ដំបូល និងកៅអីអង្គុយត្រឹមត្រូវ។ ការកែសម្រួលទៅលើរម៉កនេះ ធ្វើឲ្យមានការគាំទ្រច្រើន ហើយទុកទុក បានក្លាយជាយានជំនិះល្បីមួយប្រចាំប្រទេសថៃ។ រម៉កនេះត្រូវបានគេហៅថា "Tuk-Tuk" ពីព្រោះពេលបញ្ឆេះម៉ាស៊ីន វាលឺសម្លេងថា "Tuk-Tuk-Tuk-Tuk" អ្នកជិះនៅប្រទេសថៃក៏នាំគ្នាប្រើឈ្មោះនេះ ហើយជាប់ឈ្មោះនេះមកដល់សព្វថ្ងៃ។

ចំណែកឥណ្ឌាវិញ ជាប្រទេសដែលនាំចេញនូវ Tuk-Tuk ច្រើនជាងគេ ហើយកង់បីជាច្រើននៅកម្ពុជា ជាផលិតផលរបស់ក្រុមហ៊ុនឥណ្ឌាឈ្មោះ Bajaj Auto ។

នៅឆ្នាំ ២០១៦ ការហៅកង់បីតាមរយ:កម្មវិធីទូរសព្ទដំបូងគេបង្អស់នៅកម្ពុជាក៏ចាប់ផ្ដើមពេញនិយម ដែលអនុញ្ញាតឲ្យអ្នកហៅ កង់បីឥណ្ឌា ហើយកម្មវិធីនេះ ជាមូលហេតុចម្បង ដែលធ្វើឲ្យកង់បីឥណ្ឌានិយមនៅប្រទេសកម្ពុជា៕

ប្រភព៖ The Economist | Tripsavvy ប្រែសម្រួល៖ អ៊ឹម ដេវីដ