Samsung បើកវគ្គបង្រៀនបច្ចេកទេស ពិសេសផ្ដល់ឱកាសការងារទៀត

2017-08-16 11:10:46
ព័ត៌មាន

2017-08-16 11:10:46
ចំនួនមតិ 0 | ចំនួនចែករំលែក 0

ចន្លោះមិនឃើញ

ពីមួយជំនាន់ទៅមួយជំនាន់ វគ្គបណ្ដុះបណ្ដាល Samsung Tech Institute កាន់តែទទួលបានការគាំទ្រ និងការចាប់អារម្មណ៍ខ្លាំងពីនិស្សិតជំនាញបច្ចេកទេស ដោយសារវគ្គសិក្សានេះ បានផ្ដោតសំខាន់លើវិស័យអប់រំ និងបច្ចេកវិទ្យានៅកម្ពុជា ព្រមទាំងជួយឧបត្ថម្ភសម្ភារៈបរិក្ខារសិក្សាផ្សេងៗដល់និស្សិតដើម្បីប្រើប្រាស់ក្នុងពេលកំពុងសិក្សាផងដែរ។

លោក ជា ចាន់ណា និស្សិតឆ្នាំទី២ ផ្នែកបរិក្ខារម៉ាស៊ីនត្រជាក់ ដែលកំពុងរៀនក្នុងវគ្គបណ្ដុះបណ្ដាលនេះ បានឲ្យដឹងថា៖ "អ្វីដែលធ្វើឲ្យខ្ញុំចាប់អារម្មណ៍ពីវគ្គនេះ ព្រោះ Samsung សម្បូរផលិតផលថ្មីៗ មានបច្ចេកវិទ្យាខ្ពស់ ដូចជាទូទឹកកក ម៉ាស៊ីនបោកគក់ និងម៉ាស៊ីនត្រជាក់ជាដើម ដែលជាឱកាសសិក្សាពីឧបករណ៍ទំនើបៗទាំងនេះ"។

ក្នុងវគ្គបណ្ដុះបណ្ដាលនេះ សិស្សទាំងអស់នឹងត្រូវឆ្លងកាត់ការប្រលងបញ្ចប់ការសិក្សាដើម្បីទទួលវិញ្ញាបនបត្រ ហើយសិស្សពូកែ ៨នាក់នឹងទទួលបានឱកាសការងារ ព្រមទាំងការបណ្ដុះបណ្ដាលការងារពី Samsung និងបណ្ដាញដៃគូក្រុមហ៊ុនធំៗជាច្រើនទៀតរបស់ Samsung នៅកម្ពុជា។

លោក រឿង ថៃ ជាគ្រូបណ្ដុះបណ្ដាលជំនាញទូរសព្ទដៃ និងធ្លាប់ជាសិស្សជំនាន់ទី១ បាននិយាយថា៖ "បើប្រៀបធៀប Samsung Tech Institute កាលពីជំនាន់ទី១ និងជំនាន់ទី៤នេះ មានការខុសប្លែកគ្នាច្រើន ដោយក្នុងជំនាន់ទី១ ទូរសព្ទដៃមិនទាន់ជឿនលឿន និងមានចំនួនតិច ប៉ុន្តែសម្រាប់ជំនាន់ទី៤ វិញ ខ្ញុំសង្កេតឃើញថា Samsung បានជួយឧបត្ថម្ភទូរសព្ទដៃថ្មីៗជាច្រើនគ្រឿង ដែលមានបច្ចេកវិទ្យាទំនើបសមស្របទៅនឹងទីផ្សារបច្ចុប្បន្ន"។

វគ្គបណ្ដុះបណ្ដាល Samsung Tech Institute ជាសកម្មភាពប្រកបដោយការទទួលខុសត្រូវមួយទៀតរបស់ Samsung ដោយបានជួយជ្រោមជ្រែង និងបណ្ដុះបណ្ដាលធនធានមនុស្សនៅកម្ពុជាស្របទៅនឹងតម្រូវការខ្ពស់ក្នុងទីផ្សារការងារនាពេលបច្ចុប្បន្ន និងអនាគត។

ព័ត៌មានបន្ថែមចូលទៅវិបសាយ http://news.samsung.com៕