ក្រុមហ៊ុនផលិតរថយន្តអគ្គិសនីប្រណីតរបស់ចិន Zeekr បានប្រកាសបញ្ចេញរថយន្តថ្មី នៅក្នុងទីផ្សារប្រទេសចិននូវរថយន្ត MPV ប្រភេទ Zeekr 009 Grand Collector Edition ដែលត្រូវបានគេហៅថាជា “រថយន្ត MPV ប្រណីតបំផុតដែលផលិតនៅចិន” ដោយមានតម្លៃចាប់ពី ១២៣,២០០ ដុល្លារអាមេរិក (៨៩៩,០០០ យ័ន)។

រថយន្ត Zeekr 009 Grand Collector Edition ត្រូវបានតុបតែងដោយមាស ២៤ ការ៉ាត់ ទម្ងន់ ៣ ក្រាម ដែលស្រោបលើនិមិត្តសញ្ញាទាំងប្រាំពីរនៅលើតួរថយន្ត រួមទាំងនិមិត្តសញ្ញាខាងមុខ ខាងក្រោយ ស៊ុមបង្អួច ចំណុចដៃទ្វារ ផ្នែកចំហៀង និងកង់។ រថយន្តនេះនឹងត្រូវដាក់បង្ហាញជាផ្លូវការនៅក្នុងពិព័រណ៍រថយន្តសៀងហៃឆ្នាំ២០២៥ នៅថ្ងៃទី២៣ ខែមេសា ខាងមុខនេះ ហើយការដឹកជញ្ជូនទៅដល់អតិថិជន នឹងចាប់ផ្តើមនៅខែមិថុនា។

រថយន្ត MPV ប្រភេទនេះ ត្រូវបានបំពាក់ដោយម៉ូទ័រអគ្គិសនីពីរគ្រឿង (ខាងមុខ និងខាងក្រោយ) ដែលផ្តល់ថាមពលរួម ៥៨០ គីឡូវ៉ាត់ (៧៧៨ សេះ) និងកម្លាំងបង្វិលជុំ ៨១០ ញូតុនម៉ែត្រ ដែលអនុញ្ញាតឱ្យរថយន្តបង្កើនល្បឿនពី ០ ទៅ ១០០ គីឡូម៉ែត្រ ក្នុងរយៈពេល ៣.៩ វិនាទី។ ថ្មលីចូម ១០៨ គីឡូវ៉ាត់ម៉ោង បច្ចេកវិទ្យា ៥ស៊ី ពីក្រុមហ៊ុន CATL ផ្តល់ចម្ងាយបើកបរបាន ៧០២ គីឡូម៉ែត្រក្នុងស្តង់ដារ CLTC និងអាចសាកថ្មពី ១០% ទៅ ៨០% ក្នុងរយៈពេល ១១.៥ នាទី។

នៅខាងក្នុង រថយន្តនេះមានកៅអីបួនកន្លែងដ៏ប្រណីត បំពាក់ដោយអេក្រង់ ៤៣ អ៊ីញ ប្រព័ន្ធសំឡេង Yamaha ១៨ គ្រឿង និងទូរទឹកកក ចំណុះ១៨ លីត្រ។ បច្ចេកវិទ្យាកម្រិតខ្ពស់រួមមានបន្ទះឈីប Qualcomm Snapdragon និងប្រព័ន្ធ Zeekr OS ៦.០ ដែលគាំទ្រការទំនាក់ទំនងតាមផ្កាយរណប។ កៅអីខាងក្រោយ មានមុខងារម៉ាស្សា ៨ ប្រភេទ។ យោងតាម Zeekr រថយន្តនេះត្រូវបានរចនាឡើងសម្រាប់អ្នកជំនួញ និងនាយកប្រតិបត្តិ ដោយផ្តល់នូវភាពប្រណីត និងបច្ចេកវិទ្យាទំនើបដើម្បីបំពេញតម្រូវការទីផ្សារប្រណីត៕