- 2017-05-05 04:54:50
- ព័ត៌មាន
អេស ស៊ី ជី បញ្ចេញផលិតផលច្នៃប្រឌិតថ្មី សម្រាប់ជីវិតរស់នៅបែបទំនើប
- 2017-05-05 04:54:50
- ចំនួនមតិ 0 | ចំនួនចែករំលែក 0
អេស ស៊ី ជី បញ្ចេញផលិតផលច្នៃប្រឌិតថ្មី សម្រាប់ជីវិតរស់នៅបែបទំនើប
ចន្លោះមិនឃើញ
ក្រុមហ៊ុន អេស ស៊ី ជីដែលជាក្រុមហ៊ុនសំណង់ដ៏ល្បីឈ្មោះរបស់ប្រទេសថៃ បានយកវេទិកាពិពណ៌ស្ថាបត្យកម្មឆ្នាំ២០១៧ បង្ហាញពីគ្រឿងបរិក្ខារសំណង់ ដែលមានការច្នៃប្រឌិតខ្ពស់ដើម្បីលើកកម្ពស់ការរស់នៅរបស់មនុស្សសម័យថ្មី។
ក្នុងសាលពិព័ណ៌ទំហំ ១៣០០ម៉ែត្រការ៉េនៅក្នុងមជ្ឈមណ្ឌលពិពណ៌ Impact Muangthong Thani ក្រុមហ៊ុនសំណង់ប្រេនដ៏ធំរបស់ថៃនេះ បានជ្រើសរើសប្រធានបទដ៏សំខាន់គឺ “គេហដ្ឋានក្នុងក្តីស្រមៃរបស់អ្នក” ដើម្បីទាញអ្នកទស្សនាចាប់អារម្មណ៍លើផលិតផលគ្រឿងបរិក្ខារសំណង់របស់ខ្លួន។
លើកឡើងក្នុងពិពណ៌ស្ថាបត្យកម្ម លោក Sanit Ketsuwan នាយកផ្នែកច្នៃប្រឌិត និងបច្ចេកវិទ្យា នៃក្រុមហ៊ុន អេស ស៊ី ជី ស៊ីម៉ង់ត៍ និងសម្ភារៈសំណង់ប្រចាំប្រទេសថៃមានប្រសាសន៍ថា ការរស់នៅបច្ចុប្បន្ននេះ ពលរដ្ឋតែងតែចង់បានគេហដ្ឋានក្នុងក្តីសុបិន្តដើម្បីផ្លាស់ប្តូររស់នៅទៅរកភាពទាន់សម័យ។
ពិពណ៌ស្ថាបត្យកម្មឆ្នាំនេះ ក្រុមហ៊ុនបាននាំគ្រឿងបរិក្ខារសំណង់ជាគំនិតច្នៃប្រឌិតថ្មីដើម្បីបម្រើតម្រូវការរបស់អ្នកប្រើប្រាស់ មានតាំងពីផលិតផលដំបូលប្រក់ឥដ្ឋការ៉ូ ក្តារបន្ទះ រហូតដល់សម្ភារៈប្រើប្រាស់ក្នុងផ្ទះ ដោយគិតដិតដល់លើគុណភាព ផាសុកភាពនិងការសន្សំសំចៃ។
ក្រោមប្រធានបទ “គេហដ្ឋានក្នុងក្តីស្រមៃរបស់អ្នក” ក្រុមហ៊ុន អេស ស៊ី ជី បានបង្ហាញពីផលិតផលថ្មីមួយទៀតក្នុងពិពណ៌ស្ថាបត្យកម្មឆ្នាំ ២០១៧ គឺ SCG Eldercare ដើម្បីសម្រួលដល់ការរស់នៅរបស់មនុស្សចាស់។ បន្ថែមពី SCG Eldercare ដែលផ្តោតលើការថែទាំមនុស្សចាស់ ក្រុមហ៊ុននេះក៏បានណែនាំផលិតផលថ្មីបំផុតផ្នែកសម្ភារៈសំណង់មានដូចជាស៊ីម៉ង់ត៍ម៉ាកខ្លា ការ៉ូ និងសម្ភារៈបន្ទប់ទឹកម៉ាក Cotto បង្អួច និងទ្វារម៉ាក Windsor បេតុងទម្ងន់ស្រាលប្រភេទ Q-CON និងដំបូលថ្លាម៉ាក Shinkolite ថ្មម៉ាបចង្ក្រានបាយម៉ាក GEOLUXE ដែលសុទ្ធជាម៉ាកប្រេនរបស់ក្រុមហ៊ុនដ៏ល្បីឈ្មោះនេះ។
ជាមួយគ្នានេះ ក្រុមហ៊ុនបានរំលេចផលិតផលសំខាន់មួយទៀតដែលហៅថា “SCG Living Tech” ដែលផ្តោតលើការសម្រួលការរស់នៅប្រកបដោយផាសុកភាព ក្នុងនោះមានដូចជាប្រព័ន្ធសម្រួលសីតុណ្ហភាពក្នុងផ្ទះមិនអោយក្តៅខ្លាំង ឬត្រជាក់ខ្លាំង ប្រព័ន្ធខ្យល់ដែលជួយកាត់បន្ថយជាតិសំណើមក្នុងផ្ទះ និងឱ្យមានលំហូរខ្យល់ល្អ ខណៈទប់ស្កាត់សំឡេងរំខានពីខាងក្រៅទៀតផង ក៏ដូចជា សម្ភារៈសំណង់ បំពាក់ក្នុងគេហដ្ឋានដែលជួយកាត់បន្ថយការប្រើប្រាស់អគ្គិសនីនៅក្នុងផ្ទះ និងសន្សំសំចៃថាមពល ។
ក្រៅពីនេះ ក្រុមហ៊ុនដែលមានមជ្ឈមណ្ឌលស្រាវជ្រាវនិងរោងចក្រផលិតស៊ីម៉ងត៍ដ៏ធំតាំងនៅខេត្តសុរ៉ាបូរី បានបង្ហាញពីបច្ចេកវិទ្យាព្រីនស៊ីម៉ង់ត៍ 3D ដែលជាការបោះជំហានមួយទៀតរបស់ក្រុមហ៊ុនសំណង់យក្សរបស់ថៃនេះ ក្នុងការអភិវឌ្ឍបច្ចេកវិទ្យាព្រីនស៊ីម៉ង់ត៍ 3D ដែលអតិថិជនអាចប្រើប្រាស់បង្កើតវត្ថុតូចធំដោយខ្លួនឯង។
ក្រុមហ៊ុនផលិតស៊ីម៉ងត៍ធំជាងគេរបស់ប្រទេសថៃ Siam Cement Group (SCG) បានអនុវត្តយុទ្ធសាស្រ្តពង្រឹងម៉ាកយីហោក្រុមហ៊ុនក្នុងទីផ្សារអាស៊ានពង្រីករោងចក្រផលិតកម្មក្នុងប្រទេសមួយចំនួនថៃ ភូមា ឡាវ ម៉ាឡេស៊ី ឥណ្ឌូណេស៊ី សិង្ហបុរី ហ្វីលីពិន វៀតណាម ហើយនៅប្រទេសកម្ពុជាបានបង្កើតរោងចក្រផលិតស៊ីម៉ង់មួយនៅខេត្តកំពត។
យោងតាមរបាយការណ៍ត្រីមាសទី៤ ឆ្នាំ២០១៦ចំណូលពីការលក់នៅកម្ពុជារបស់ក្រុមហ៊ុន អេស ស៊ី ជី គឺមានចំនួនទឹកប្រាក់ ១៦០ ពាន់លានរៀល (ឬ ៤០ លានដុល្លារអាមេរិក) កើនឡើង ៦% ធៀបនឹងឆ្នាំមុន ដែលទទួលបានពីអាជីវកម្មស៊ីម៉ង់ត៍ ។ សម្រាប់ ឆមាសទី២ ឆ្នាំ២០១៦ ប្រាក់ចំណូលពីការលក់សរុបនៅកម្ពុជា មានចំនួនទឹកប្រាក់ ៣៥៦ ពាន់លានរៀល (ឬ ៨៨ លានដុល្លារអាមេរិក)។
ទាក់ទងនឹងសកម្មភាពថ្មីចុងក្រោយបំផុត នៅក្នុងប្រទេសកម្ពុជា ក្រុមហ៊ុន CPAC Concrete បានប្តូរម៉ាកយីហោរបស់ខ្លួន មកជាម៉ាកយីហោ អេស ស៊ី ជី ស្របតាមយុទ្ធសាស្ត្រ “ម៉ាកយីហោតែមួយ” សម្រាប់ទីផ្សារអាស៊ាន។
