វីដេអូ​មួយ​លើ YouTube បាន​ប្រៀប​ធៀប​ល្បឿន​ម៉ាស៊ីន​រវាង iPhone 7 Plus, LG G6 និង OnePlus 3T ហើយ​លទ្ធផល​បង្ហាញ​ថា iPhone 7 Plus មាន​ល្បឿន​លឿន​ជាង​គេ​ក្នុង​ចំណោម​ស្មាតហ្វូន​កំពូល​ទាំង​បី​ម៉ូដែល។

តាម​ពិត​ទៅ Apple បាន​បង្ហាញ iPhone 7 Plus តាំង​ពី​ចុង​ឆ្នាំ ២០១៦ ម្ល៉េះ ដោយ​បំពាក់ RAM 3GB និង​បន្ទះ​ឈីប​ប្រភេទ A10 Fusion។ ចំណែក​ឯ LG G6 បាន​បង្ហាញ​ខ្លួន​កាល​ពី​ខែ​មីនា​ឆ្នាំ ២០១៧ ដោយ RAM របស់​វា​មាន​ទំហំ​ដល់​ទៅ 4GB តែ​រក្សា​ឈីប​ជំនាន់​ចាស់ Snapdragon 821 ដដែល។ ដោយ​ឡែក OnePlus 3T បំពាក់​ RAM ធំ​ជាង​គេ​ដល់​ទៅ 6GB និង​មាន​ឈីប Snapdragon 821 និង​បាន​បង្ហាញ​ខ្លួន​កាល​ពី​ខែ​វិច្ឆិកា​ឆ្នាំ​ទៅ។

សរុប​ក្រោយ​ការ​សាកល្បង​បើក​ដំណើរការ​កម្មវិធី ហ្គេម​មួយ​ចំនួន​ធំ នៅ​លើ​ស្មាតហ្វូន​ទាំង ៣ រួច​មក​ លទ្ធផល​បាន​បញ្ជាក់​ថា iPhone 7 Plus នៅ​តែ​បន្ត​រក្សា​តំណែង​ស្មាតហ្វូន​ល្បឿន​លឿន​ជាង​គេ​ដដែល ដោយ​ចំណាយ​ពេល​នៅ​ជុំ​ទី ១ ត្រឹម​តែ ១ នាទី​ ១៧ វិនាទី ឯ OnePlus 3T ប្រើ​ពេល ១ នាទី ៣២វិនាទី ខណៈ G6 ស្ថិត​នៅ​ចំណាត់​ថ្នាក់​ចុង​ក្រោយ​គេ ស៊ី​ពេល ១នាទី ៤៥វិនាទី៕