កាល​ពី​ចុង​ខែ​មករា​ដំណឹង​មួយ​ពី​តម្លៃ​របស់​ Huawei P10 និង P10 Plus បាន​លើក​ឡើង​ថា​ស្មាតហ្វូន​ទាំង​ពីរ​​នឹង​ជា​​​ស្មាតហ្វូន​ត្រកូល​ P ដែល​មាន​តម្លៃ​ថ្លៃ​ជាង​គេ​អាច​ដល់​ក្បែរ​ ១ ពាន់​ដុល្លារ។ ប៉ុន្តែ​បើ​តាម​ឯកសារ​លេច​ធ្លាយ​មួយ​បាន​បង្ហាញ​ថា​តម្លៃ​ P10/ P10 Plus មិន​ថ្លៃ​ខ្លាំង​ប៉ុន្មាន​ឡើយ។

តាម​ឯកសារ​បង្ហាញ​ពី​ព័ត៌មាន​ផលិតផល​ដែល​មាន​ប្រភព​ចេញ​ពី​ប្រទេស​ចិន​បង្ហាញ​ថា​ P10 មាន​ដល់​ទៅ​ ៣ ជម្រើស​​ដោយ​រួម​មាន​ជម្រើស​ RAM 4 GB / អង្គ​ផ្ទុក​ទិន្នន័យ​ 32 GB តម្លៃ​ប្រមាណ​ ៥០៨ ដុល្លារ។ ជម្រើស​ RAM 4 GB / អង្គ​ផ្ទុក​ទិន្នន័យ​ 64 GB តម្លៃ​ប្រមាណ​ ៥៩៥ ដុល្លារ​ និង ជម្រើស​ចុង​ក្រោយ​ RAM 6 GB / អង្គ​ផ្ទុក​ទិន្នន័យ​ 128 GB តម្លៃ​​ប្រមាណ​ ៦៨២ ដុល្លារ។

ចំណែក P10 Plus មាន​ពីរ​ជម្រើស​ ដោយ​ជម្រើស​ RAM 4 GB / អង្គ​ផ្ទុក​ទិន្នន័យ​ 64 GB តម្លៃ​ប្រហែល​ ៧២៦ ដុល្លារ និង​ ជម្រើស​ RAM 6 GB / អង្គ​ផ្ទុក​ទិន្នន័យ​ 128 GB តម្លៃ​ប្រហែល​ ៨២៨ ដុល្លារ។ ទូរសព្ទ​ទាំង​ពីរ​ម៉ូដែល​​នឹង​មាន​បំពាក់​ដោយ​កាមេរ៉ា​ភ្លោះ​ទំហំ​ 12 MP នៅ​ផ្នែក​ខាង​ក្រោយ​ និង ​រូបរាង​ខាង​ក្រៅ​​មាន​ចំណុច​ខុស​គ្នា​មួយ​គឺ​ មួយ​មាន​អេក្រង់​រាប​ស្មើ​ និង មួយ​មាន​អេក្រង់​រាង​កោង​​នៅ​គែម​សង​ខាង។

ទាំង​ P10 និង P10 Plus រំពឹង​ថា​នឹង​បង្ហាញ​វត្តមាន​ផ្លូវ​ការ​នៅ​ក្នុង​ព្រឹត្តិការណ៍​ MWC នា​ទីក្រុង​ Barcelona នៅ​ថ្ងៃ​ទី​ ២៦ ខែ​កុម្ភៈ​ ឆាប់ៗ​នេះ៕​​​​