ក្រុមហ៊ុន Ford គ្រោង​នឹង​ដកមុខងារ​ខ្លះចេញពីរថយន្ត​របស់ខ្លួន​ ដើម្បីជួយបន្ទាបតម្លៃរថយន្ត និងជួយសន្សំសំចៃ​ការចំណាយ​របស់ក្រុមហ៊ុន ក្នុងនោះរួមមានទាំង​មុខងារចូលចតអូតូរាងអក្សរ P ទៀតផង។

បើតាមការបញ្ជាក់​របស់​លោក Kumar Galhotra ប្រធាន​មន្រ្តីប្រតិបត្តិការ​របស់ Ford បាន​ឱ្យដឹងថា មានអតិថិជនតិចតួចប៉ុណ្ណោះ ដែលបាន​ប្រើមុខងារ​ចូលចត​អូតូ​នូវចំណត​អក្សរ P ដែល​មុខងារ​នេះ​ក្រុមហ៊ុន​ត្រូវចំណាយប្រហែល ៦០ដុល្លារ ក្នុងការដំឡើង​លើរថយន្តមួយគ្រឿង។ ដូច្នេះ បើដកមុខងារ​នេះចេញ Ford នឹង​សន្សំបាន ១០លានដុល្លារក្នុង១ឆ្នាំ។

លោកបន្តថា Ford កំពុងប្រើប្រាស់​ទិន្នន័យ​រថយន្ត​ដែល​បាន​ភ្ជាប់​ក្នុងការ​វិភាគ​នូវ​មុខងារ​ណាខ្លះ​ដែលម្ចាស់រថយន្ត​ប្រើប្រាស់ និងមិនប្រើ ដើម្បី​ជាមូលដ្ឋាន​ក្នុងការសម្រេច​ចិត្ត​ ថាតើ​នឹងដកវាចេញ ឬធ្វើឱ្យកាន់តែប្រសើរឡើង​នូវមុខងារទាំងនោះ។

គួរដឹង​ថា មុខងារ​ចូលចតអក្សរ P នេះ គឺ​ជាផ្នែកមួយ​នៃ​កញ្ចប់បច្ចេកវិទ្យា​ជំនួយអ្នកបើកបរ​ Active Park Assist របស់ Ford ខណៈក្រុមហ៊ុនអាមេរិកនេះ គឺ​ជាអ្នកនាំមុខម្នាក់​ដែល​បំពាក់​ប្រភេទបច្ចេកវិទ្យា​នេះ ក្នុងគោលបំណង​ជួយ​កាត់​បន្ថយ​ការពិបាក​សម្រាប់​អ្នកបើកបរ​ក្នុងការ​ចូលចត​នៅតំបន់ទីប្រជុំជន និងទាក់ទាញ​អតិថិជន។

យ៉ាងណាមិញ មុខងារ​ចូលចតនេះ​បែរជាត្រូវ​គេមិនសូវប្រើទៅវិញ ដោយហេតុនេះអ្នកបើកបរ​ចង់​ចូលចត​ដោយ​ការបើកផ្ទាល់របស់ពួកគេ មិនប្រើបច្ចេកវិទ្យាទេ៕

SabayOne កម្មវិធីកម្សាន្តថ្មីរបស់ Sabay បើកឲ្យប្រើសាកល្បងពីពេលនេះ! ចុះឈ្មោះតាមរយៈតំណភ្ជាប់នេះ https://bit.ly/3QVlYVB