បន្ទាប់ពី Honda បាន​បញ្ចេញ​គំរូ​រថយន្ត​អគ្គិសនី SUV ​ទីមួយរបស់ខ្លួន​ម៉ូឌែល e:N1 នាពេលកន្លងមក ទើបតែពេលនេះវាបានចូលក្នុងសង្វាក់​ផលិតកម្មហើយ គឺ​ផលិត​នៅរោងចក្រ​ Honda ក្នុងសួនឧស្សាហកម្ម Rojana ខេត្ត Prachinburi ប្រទេសថៃ។ នេះ​គឺជាលើកដំបូង​ហើយ​ដែលក្រុមហ៊ុនជប៉ុន​ផលិតរថយន្តអគ្គិសនី​ក្នុងប្រទេសថៃ។

ក្រុមហ៊ុន Honda បាន​បញ្ជាក់​ថា ការបើកខ្សែសង្វាក់ផលិតកម្ម​រថយន្តអគ្គិសនី​នេះនៅក្នុងប្រទេសថៃ គឺ​ជាជំហាន​ដ៏សំខាន់មួយ​សម្រាប់​ Honda ដែលបង្ហាញ​ពីទំនុកចិត្តរបស់ខ្លួន​ ក្នុងការបន្ត​អាជីវកម្ម​នៅប្រទេសនេះ។ វា​ក៏បានបង្កើតតម្លៃបន្ថែម​សម្រាប់​ឧស្សាហកម្ម​រថយន្ត​នៅក្នុងប្រទេសថៃផងដែឬ ទាំងការផលិត និងការប្រើប្រាស់​គ្រឿងបង្គុំក្នុងស្រុក។

ការចាប់ផ្តើម​ប្រកាស​លក់​រថយន្ត​អគ្គិសនី e:N1 នេះ នឹងធ្វើឡើង​នៅ​ត្រីមាសទី១ ឆ្នាំ​២០២៤។

យ៉ាងណាមិញ Honda មិនទាន់​បាន​ប្រកាស​ពី Spec របស់​រថយន្តអគ្គិសនី​នេះនៅឡើយទេ។ ប៉ុន្តែ​បើតាម​គំរូ e:N1 ដែលបង្ហាញកន្លងមក​ គេប៉ាន់ស្មានថា វាអាច​នឹងបំពាក់អាគុយ ៦៨,៨គីឡូវ៉ាត់ម៉ោង ម៉ូទ័រអគ្គិសនីកម្លាំង ២០១សេះ និងកម្លាំងរមួល ៣១០ញូតុនម៉ែត្រ។ ពេលសាកពេញម្តង វាអាចនឹង​ធ្វើដំណើរបានចម្ងាយជាង ៤០០គីឡូម៉ែត្រ។

គួរដឹងថា ក្នុងឆ្នាំ២០២៣នេះ ការប្រើប្រាស់​រថយន្តអគ្គិសនី​នៅក្នុងប្រទេសថៃ ត្រូវបាន​រំពឹងថា នឹង​ឈានដល់ ៨,៧% នៃ​គ្រប់​រថយន្ត​ទាំងអស់​ ពោលគឺ​កើនឡើង​ពី ៣,៨% ក្នុងឆ្នាំ​២០២២។ រដ្ឋាភិបាល បាន​ជំរុញ​យ៉ាងខ្លាំង​ទៅលើ​ការប្រើប្រាស់​រថយន្តអគ្គិសនី។ កាលពីខែមុន នាយករដ្ឋមន្រ្តីថៃ បាន​បញ្ជា​ឱ្យគ្រប់​ក្រសួង​ស្ថាប័ននានា​ ទិញ​រថយន្ត​អគ្គិសនី​ប្រើប្រាស់ ដើម្បី​ជំនួស​រថយន្តចាស់ៗ ហើយ​បង្កើត​ស្ថានីយសាកភ្លើង​ឱ្យកាន់តែច្រើន​នៅទូទាំង​ប្រទេស។ ជាមួយគ្នានេះ គ្រប់​សេវាដឹកជញ្ជូនសាធារណៈ ដូចជា រថយន្តក្រុង តាកស៊ី និងតុក-តុក ក៏​នឹង​ត្រូវប្រើអគ្គិសនី​ផងដែរ៕

SabayOne កម្មវិធីកម្សាន្តថ្មីរបស់ Sabay បើកឲ្យប្រើសាកល្បងពីពេលនេះ! ចុះឈ្មោះតាមរយៈតំណភ្ជាប់នេះ https://bit.ly/3QVlYVB