ក្រុមហ៊ុន​ Tesla បាន​ចាប់ផ្តើម​ផ្តោត​ទៅលើការផលិត​រថយន្ត​អគ្គិសនី​តម្លៃធូរថ្លៃដែរហើយ បន្ទាប់ពីមើលឃើញ​រថយន្តរបស់​ក្រុមហ៊ុនចិន ជាពិសេសគឺ BYD កំពុង​ឡើងកូដខ្លាំង។

ស្ថាបនិក Tesla លោក Elon Musk បាន​ប្រកាស​ក្នុងអំឡុងពេល​ទៅទស្សនកិច្ច​រោងចក្រ​យក្ស​របស់​ក្រុមហ៊ុន​លោក​នៅក្រុង​ប៊ែរឡាំង ប្រទេស​អាល្លឺម៉ង់ កាលពីសប្តាហ៍មុន​ថា រថយន្តតម្លៃ ២៥ ០០០អឺរ៉ូ ឬប្រហែលជិត ២៧ ០០០ដុល្លារ នឹង​ត្រូវផលិត​ក្នុងរោងចក្រ​មួយនេះ។

បច្ចុប្បន្ន​រថយន្ត Model 3 គឺ​ជារថយន្ត​ធូរថ្លៃជាងគេ​បំផុត​ និងលក់ដាច់បំផុត​របស់ Tesla នៅអឺរ៉ុប តម្លៃ ៤៦ ២០០ដុល្លារ។

យ៉ាងណាមិញ លោក Elon Musk មិនបាន​បញ្ជាក់​ពី​ពេលវេលា​នៃការផលិតរថយន្ត​តម្លៃធូរថ្លៃនេះឡើយ ប៉ុន្តែគេរំពឹងថា វានឹងអាចត្រូវបាន​ផលិនៅដើមឆ្នាំក្រោយ។

គួរដឹងថា ក្នុងត្រីមាសទី៣ នៃឆ្នាំ​២០២៣ Tesla នៅតែ​នាំមុខគេ​ក្នុងការលក់​រថយន្ត​អគ្គិសនី ជាមួយនឹង​ចំនួន ៤៣៥ ០៥៩គ្រឿង (កើនឡើង ២៧%) ប៉ុន្តែត្រូវបាន BYD ប៊ិះតាមទាន់ ដោយលក់បាន ៤៣១ ៦០៣គ្រឿង (កើនឡើង ៦៧%)។ នេះ​គឺ​ជាចំនួន​លក់​ដែល​ស្ទើរតែស្មើគ្នា​រវាង Tesla និង​ BYD ជាលើកដំបូង។ បន្ទាប់ពីគឺ Volkswagen លក់បាន​ចំនួន ២០៩ ៣៩៤​គ្រឿង (កើនឡើង៤១%)។

បើគិត​ក្នុងរយៈពេល ៩ខែ​នៃឆ្នាំ២០២៣នេះ Tesla លក់បាន​ចំនួនជាង ១,៣លានគ្រឿង (កើនឡើង ៤៦%), BYD ជាង ១,០៤លានគ្រឿង (កើនឡើង ៨០%) និង Volkswagen ជាង ៥៣ម៉ឺនគ្រឿង៕