ក្រុមហ៊ុនឈីបកូរ៉េ គ្រោងចាក់លុយ ១ពាន់លានដុល្លារ វិនិយោគនៅវៀតណាម ក្រោយទស្សនកិច្ចរបស់ ចូ បៃឌិន

2023-10-02 08:34:23
ព័ត៌មាន

2023-10-02 08:34:23
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមហ៊ុនឈីបកូរ៉េខាងត្បូង Hana Micron គ្រោងដាក់ទុនវិនិយោគ ១ពាន់លានដុល្លារ ចូលក្នុងផលិតកម្មឈីបនៅប្រទេសវៀតណាម ត្រឹមឆ្នាំ២០២៥ ដែលនេះគឺជារលកវិនិយោគលើឧស្សាហកម្មឈីបថ្មីមួយទៀតក្នុងប្រទេសកុម្មុយនីស្តមួយនេះ។

រោងចក្រនេះ នឹងដាក់នៅក្នុងខេត្ត Bac Giang ដើម្បីត្រៀមសម្រាប់ការផលិតឈីប ខណៈខេត្តនេះក៏មានក្រុមហ៊ុនផ្គត់ផ្គង់ឱ្យ Apple ចំនួន៣ ផងដែរ។ រោងចក្ររបស់ក្រុមហ៊ុននេះ នឹងដើរតួនាទីសំខាន់ក្នុងតំបន់ ព្រមទាំងបង្កើតឱកាសអូសទាញគម្រោងបច្ចេកវិទ្យាជាន់ខ្ពស់បន្ថែមទៀត ជាពិសេសប្រព័ន្ធអេកូនៃផលិតកម្មឈីប។

គួរកត់សម្គាល់ថា ផែនការវិនិយោគនេះ ធ្វើឡើងក្រោយពេលប្រធានាធិបតីអាមេរិក លោក ចូ បៃឌិន ប្រធានាធិបតីអាមេរិក បានធ្វើទស្សនកិច្ចនៅវៀតណាម កាលពីខែកញ្ញាកន្លងទៅ។ ក្នុងនោះ អាមេរិក បានសន្យាគាំទ្រវៀតណាម ក្នុងការអភិវឌ្ឍឧស្សាហកម្មឈីបឱ្យក្លាយជាអ្នកដើរតួនាទីជាអ្នកផ្គត់ផ្គង់ឈីបសាកលដ៏សំខាន់ទៀតផង។

គួរដឹងថា រដ្ឋាភិបាលវៀតណាមក៏បានស្នើឱ្យ Samsung វិនិយោគបង្កើតរោងចក្រឈីបផងដែរ ប៉ុន្តែត្រូវបានក្រុមហ៊ុនយក្សកូរ៉េនេះបដិសេធ ដោយសារខ្លួនបានវិនិយោគយ៉ាងក្រាស់ក្រែលរួចមកហើយក្នុងប្រទេសនេះ។ ម្យ៉ាងទៀត ក្រុមហ៊ុនឈីបអាមេរិក ដូចជា Intel ជាដើម ក៏នឹងត្រៀមចូលវិនិយោគនៅវៀតណាម៕

ប្រភព៖ Asia.Nikkei ប្រែសម្រួល៖ សំភី