Ford បាន​បញ្ចេញ​រថយន្ត Ford Ranger 2025 ដែល​ប្រើម៉ាស៊ីន Plug-in Hybrid ជាលើកដំបូង សម្រាប់ទីផ្សារអឺរ៉ុប និង​អូស្ត្រាលី ដែល​រថយន្តនេះ​អាចចាក់សាំង​បានផង និង​សាកភ្លើងផង ហើយពេល​សាកពេញ​អាច​ធ្វើដំណើរបាន​ចម្ងាយ ៤៥គីឡូម៉ែត្រ។

លោក Hans Schep អគ្គនាយក​ក្រុមហ៊ុន Ford ប្រចាំ​អឺរ៉ុប បាននិយាយថា រថយន្ត Ford Ranger Plug-in Hybrid នេះ នឹង​ជួយ​ឱ្យអតិថិជន​អាចបោះជំហាន​ចូល​ក្នុងអនាគត​នៃរថយន្ត​អគ្គិសនី ជាមួយ​ទំនុកចិត្ត និងសមត្ថភាព​កាន់តែប្រសើរជាងមុន។ ជាមួយគ្នានេះ Ranger នៅតែ​ជាអ្នកនាំមុខភីកអាប់ធុនកណ្តាល​លើ​ការច្នៃប្រឌីតជានិច្ច។

លោក​អះអាងថា Ford Ranger នេះ គឺ​ជាដំណោះស្រាយ​ដ៏ល្អបំផុត​សម្រាប់​ការងារ ការកម្សាន្ត និងគ្រួសារ ដោយផ្តល់​នូវការមិនបញ្ចេញ​ផ្សែង​ក្នុង​ចម្ងាយខ្លី​ ហើយ​ផ្តល់ការ​បើកបរ off-road ការដឹក និង​សណ្តោង​ដ៏មិនគួរឱ្យជឿ។ ជាមួយ​នឹង​បច្ចេកវិទ្យា Pro Power Onboard ដែល​បំពាក់លើភីកអាប់នេះ គឺ​អាច​ផ្តល់ថាមពលដល់​ប្រើប្រាស់វិញ​​នៅកន្លែងការងារ និងការបោះតង់​យ៉ាងងាយស្រួល ពោលគឺ​វាដើរតួជាម៉ាស៊ីនភ្លើង ដូច​ F-150 Lightning ដែរ។

Ford Ranger 2025 ប្រើម៉ាស៊ីនទាក់បូចំណុះ ២,៣លីត្រ EcoBoost ៤ស៊ីឡាំង បំពាក់​ជាមួយ​ម៉ូទ័រអគ្គិសនី​ ១ ដែល​អាចផលិត​បានកម្លាំងសរុបលើសពី ២៧០សេះ។ តែយ៉ាងណាក៏ដោយ Ford មិនបាន​បញ្ជាក់ពីកម្លាំងរមួល និង​ទំហំអាគុយ​ពិតប្រាកដ​របស់​រថយន្ត​នេះនៅឡើយទេ។

ការផលិត​រថយន្ត​ភីកអាប់នេះ នឹងធ្វើឡើង​នៅចុងឆ្នាំ​២០២៤ ហើយ​នឹង​ប្រគល់ជូន​អតិថិជន​នៅក្នុងឆ្នាំ​២០២៥៕