ប្រធាន​ប្រតិបត្តិ​ក្រុមហ៊ុន Mercedes-Benz លោក Ola Kaellenius បាន​និយាយ​ក្នុងព្រឹត្តិការណ៍ពិព័រណ៍រថយន្ត IAA នៅក្រុងមូនិច​ ប្រទេសអាល្លឺម៉ង់​ថា តម្លៃ​រថយន្តអគ្គិសនី​នាពេលអនាគត​ នឹង​កាន់តែថ្លៃ បើប្រៀបធៀប​ជាមួយ​រថយន្ត​ប្រើម៉ាស៊ីនចំហេះក្នុងដូចជាសាំង-ម៉ាស៊ូត។

លោកអះអាងថា តម្លៃ​រថយន្តអគ្គិសនី​កាន់តែខ្ពស់ នឹង​មិនអាច​ក្លាយ​ជាតម្រូវការ​របស​អតិថិជន​បានឡើយ។ ការឡើងថ្លៃរថយន្ត EV នេះ ក៏ព្រោះតែតម្លៃ​វត្ថុធាតុដើម​សម្រាប់ផលិតអាគុយ​ ការអភិវឌ្ឍ​ Software និង​ថ្លៃអគ្គិសនី។

ការលើកឡើង​ខាងលើនេះ ធ្វើឡើង​ក្នុងពេល​ក្រុមហ៊ុន Mercedes-Benz បាន​បង្ហាញ​ព័ត៌មាន​លម្អិត​អំពី​រថយន្តអគ្គិសនី​ថ្មីបំផុតរបស់ខ្លួន​ម៉ូឌែល CLA ប្រភេទស៊ីដេន និងគ្រោង​បញ្ចេញ​នៅឆ្នាំក្រោយ ជាមួយនឹង​ចម្ងាយ​បើកបរ​ឆ្ងាយជាងមុន ៣០% ទៅ ៣៥% ពោលគឺ​អាច​បើកដល់ចម្ងាយ ៧៥០គីឡូម៉ែត្រ​ពេល​សាកពេញ។

បើតាម​លោក Ola Kaellenius ក្រុមហ៊ុន​កំពុង​ធ្វើការ​លើ​តម្លៃផលិតរថយន្តអគ្គិសនីនេះហើយ និងលៃលក​ធនធាន ដើម្បី​ឈានដល់​ការទទួល​បាន​ប្រាក់ចំណេញដូចគ្នា​ជាមួយ​នឹង​រថយន្ត​ចំហេះក្នុងដែរ។

សូមជម្រាបដែរ​ថា ថ្មីៗនេះ Mercedes-Benz ទើបតែ​បញ្ចេញ​រថយន្តអគ្គិសនី ២ម៉ូឌែល គឺEQA ជាប្រភេទ Crossover និង EQB ជាប្រភេទ SUV ដែល​ជាស៊េរី​ឆ្នាំ​២០២៤៕