ក្រុមហ៊ុនជប៉ុន ispace បាន​ប្រកាស​នៅថ្ងៃនេះថា យានអវកាស​របស់ខ្លួន​ដែលប៉ុនប៉ង​ចុះ​ចត​លើ​ផ្ទៃដី​ភព​ព្រះចន្ទ គឺ​ត្រូវបរាជ័យហើយ។

ispace បញ្ជាក់ថា យានចុះចត Hakuto-R Mission 1 បានបាត់ការទាក់ទង​នៅពេល​កំពុងចុះចត​លើផ្ទៃដីភពព្រះចន្ទ ដូច្នេះ​ក្រុមហ៊ុន​នេះ​បាន​សន្និដ្ឋាន វា​ទំនង​ជាធ្លាក់នៅលើផ្ទៃដី​ភពនេះតែម្តង។

តែទោះ​ជាយ៉ាងណាក៏ដោយ យាន Hakuto-R Mission 1 បាន​សម្រេចបេសកកម្ម​របស់​ខ្លួន​ចំនួន៨រួចស្រេចទៅហើយ ក្នុងចំណោម ១០កម្មវត្ថុ ដែល​វាបានជួយ​ផ្តល់ទិន្នន័យ​យ៉ាងច្រើន សម្រាប់​ការប៉ុនប៉នចុះចត​លើភពព្រះចន្ទម្តងទៀត​នៅឆ្នាំ​ក្រោយ។

ជារួមមកដល់ពេលនេះ នៅមិនទាន់មានក្រុមហ៊ុនឯកជន​ណាមួយ​ដែល​អាចបញ្ជូនយាន​ទៅចុះចត​លើផ្ទៃដីភពអង្គារ​បាន​នៅឡើយទេ ហើយ​ប្រទេសដែល​បាន​ជោគជ័យ​គឺ អាមេរិក សហភាពសូវៀត និងចិន ដែលសុទ្ធតែ​បញ្ជូន​ដោយ​ភ្នាក់ងារ​អវកាស​របស់​រដ្ឋទាំងអស់។

សូម​រំលឹក​ថា កាលពីឆ្នាំ​២០១៩ មាន​ប្រទេស​៣ ដែល​បាន​បញ្ជូន​យាន​របស់ខ្លួន​ទៅ​ចុះចត​លើផ្ទៃដី​ភពព្រះចន្ទ គឺ​ប្រទេសចិន អ៊ីស្រាអែល និង​ឥណ្ឌា។ ក្នុង​ចំណោម​៣ប្រទេស​នេះ គឺ​មានតែ​ចិន​ប៉ុណ្ណោះ ដែល​ទទួលបាន​ជោគជ័យ។ ចិន​បាន​សម្រេច​ជោគជ័យ​លើក​ដំបូង​ជា​ប្រវត្តិសាស្រ្ត​ ក្នុងការ​ចុះចត​យាន​ Yutu-2 នៃ​បេសកកម្ម Chang'e-4 នៅ​លើ​ផ្នែកម្ខាង​ទៀត​នៃ​ភពព្រះចន្ទ (តំបន់​ងងឹត​ដែល​មនុស្ស​លើ​ផែនដី​មិនអាច​មើលឃើញ និង​ជា​តំបន់​ដែល​មិនទាន់​មាន​ប្រទេស​ណា​បញ្ជូន​យាន​អវកាស​ទៅដល់) កាលពី​ថ្ងៃទី​៣ ខែ​មករា ឆ្នាំ​២០១៩​។ 

យានអវកាស​របស់​អ៊ីស្រាអែល ឈ្មោះ Beresheet បាន​ធ្លាក់​លើ​ភព​ព្រះចន្ទ ដោយ​សារ​បញ្ហា​បច្ចេកទេស​​គ្រឿង​ម៉ាស៊ីន ក្នុង​អំឡុង​ពេល​ព្យាយាម​ចុះ​ចត​លើ​ផ្ទៃដី​ភពនេះ នៅថ្ងៃទី​១២ ខែ​មេសា ឆ្នាំ​២០១៩។

អង្គការ​អវកាសឥណ្ឌា (ISRO) កាលពីថ្ងៃទី៧ ខែកញ្ញា ឆ្នាំ​២០១៩ បាន​ប្រកាស​ពីការ​បាត់​ទំនាក់ទំនង​ជាមួយ​យាន​ Vikram នៃ​បេសកកម្ម​ Chandrayaan ដែល​ប៉ុនប៉ងចុះចតលើ​ផ្ទៃដី​ប៉ូល​ខាងត្បូង​នៃ​ភពព្រះចន្ទ៕