អ្នកនៅពីក្រោយ​នៃការឌីហ្សាញ​រថយន្ត Hyundai Ioniq 5 ដែលគ្រប់គ្នា​សុទ្ធតែភ្ញាក់ផ្អើល​ និងកោត​សរសើរ​រូបរាង​របស់​​រថយន្តនេះ បានទទួលការបោះឆ្នោត​ថា​ជាមនុស្សឆ្នើម​បំផុតម្នាក់​ក្នុង​ឧស្សាហកម្ម​រថយន្ត​ពិភពលោក។

លោក Sang Yup Lee អនុប្រធាន​ក្រុមហ៊ុន និង​ជា​នាយកឌីហ្សាញសាកល​របស់​ Hyundai និង Genesis ថ្មីៗនេះ ត្រូវបានជាប់ឈ្មោះ​ប្រចាំឆ្នាំនៅ World Automobile Award 2023។ នេះជាពានរង្វាន់​ដ៏មានតម្លៃ​បំផុតមួយ​ក្នុងឧស្សាហកម្មយានយន្ត ដែល​ជាការបោះឆ្នោត​ចេញ​អ្នកជំនាញ​ឧស្សាហកម្មនេះជាង ១០០នាក់ និង​អ្នកកាសែត​ល្បីៗ​មកពី ៣២ប្រទេស។

លោក​ត្រូវបាន​ទទួល​ស្គាល់ថា ​ជាអ្នកចូលរួម​ចំណែក​ដ៏សំខាន់​នៅក្នុងការឌីហ្សាញ​ពោរពេញ​ដោយការច្នៃប្រឌិតលើ​រថយន្តម៉ូឌែល​ដែលបាន​បញ្ចេញ​កន្លងមក ដូចជា Hyundai Ioniq 6, Konda និង N Vision 74 concept ជាដើម។ ជាពិសេស​ រថយន្តអគ្គិសនីដ៏ល្បីល្បាញបំផុត​ គឺ Hyundai Ioniq 5 ដែលលោកគឺ​ជា​អ្នកឌីហ្សាញ​ និងដឹកនាំការផលិតផ្ទាល់ ហើយ​ទទួលបានពានរង្វាន់ជាច្រើនទៀតផងដែរ៕