រថយន្ត​ Hyundai Palisade បាន​ចាប់ផ្តើម​លេចធ្លោ​ខ្លាំង​នៅទីផ្សារ​កូរ៉េ ចាប់តាំងពីឆ្នាំ​២០២០មក ហើយ​ថ្មីៗនេះ Hyundai ក៏​បាន​បញ្ចេញ​ម៉ូដែល​នេះទៀត ស៊េរីឆ្នាំ​២០២៣ នៅ​ក្នុង​ពិព័រណ៌​ក្រុងញ៉ូវយ៉ក ដែល​រូបរាង​របស់វា​ឌីហ្សាញ​កាន់តែស្អាត និង​បំពាក់​បច្ចេកវិទ្យា​កាន់តែទំនើប។

រូបរាង​ផ្នែកខាងមុខ Hyundai Palisade 2023 មើលទៅ​កាន់តែកាច​ដោយ​វាមាន​ប៉ាណាធំ​ជារាងចតុកោណ ចង្កៀង​បញ្ឈរ LED នៅសងខាង។ ឯផ្នែក​ខាងក្នុងវិញ ដៃចង្កូត​ត្រូវបាន​ឌីហ្សាញ​បែបថ្មី កុងទ័រឌីជីថល និង​ប្រព័ន្ធកម្សាន្ត Touchscreen ទំហំ ១២អ៊ីញ។ វាបំពាក់​កៅអី៣ជួរ ដោយកៅអីនីមួយសុទ្ធតែបំពាក់​មុខាងារពិសេស។

កាន់តែគួរឱ្យចាប់អារម្មណ៍នោះ វា​បំពាក់​សោឌីជីថល ដែល​ម្ចាស់​រថយន្ត​អាច​ប្រើប្រាស់ iPhone, Apple Watch ឬ Samsung Galaxy ក្នុងការចាក់សោ ដោះសោ និងបញ្ឆេះម៉ាស៊ីន។ វាក៏ជារថយន្ត​ដំបូង​របស់ Hyundai ដែល​ផ្តល់​នូវ Wi-Fi hotspot ផងដែរ។

តែយ៉ាងណារថយន្ត​នេះ​នៅតែបន្ត​ប្រើ​ម៉ាស៊ីន V6 ចំណុះ ៣,៨លីត្រ ផលិតបានកម្លាំង២៩១សេះ និង​កម្លាំងរមួល ៣៥៥ញ៉ូតុនម៉ែត្រ ប្រអប់លេខអូតូ៨វគ្គ និងមានជម្រើស​ប៉ុងមុខ និងប៉ុង២។

រថយន្ត SUV ស៊េរីថ្មីនេះ បំពាក់​ប្រព័ន្ធ​សុវត្ថិភាព​ច្រើនជាងស៊េរីមុន ក្នុងនោះ​ក៏មាន​ប្រព័ន្ធ​ជំនួយ​អ្នកបើកបរ ដូចជា ប្រព័ន្ធ​ជំនួយ​នូវការបញ្ចៀសការប៉ះទង្គិចគ្នា, ប្រព័ន្ធ​គ្រប់គ្រង​ល្បឿន​វៃឆ្លាត​, ប្រព័ន្ធ​ជំនួយ​អ្នកបើកបរ​លើផ្លូវហាយវេ និង​ប្រព័ន្ធ​ជំនួយ​ចូលចត​វៃឆ្លាតបញ្ជា​ពីចម្ងាយជាដើម។

Hyundai នឹង​ដាក់​លក់​រថយន្ត​នេះ​នាពេលឆាប់ៗខាងមុខ ដោយតម្លៃរបស់វា​ត្រូវបានរំពឹងថា ប្រហែលជាង ៤៨ ០០០ដុល្លារ៕