កំពូល​រថយន្ត​វ៉ែន​ដ៏ល្បីល្បាញបំផុត Hyundai STARIA ពេលនេះត្រូវ​បន្ថែម​ option ថ្មីមួយ​ទៀត ដែល​មាន​លក្ខណៈកាន់តែប្រណិតខ្លាំង​ជាង option នានា​នោះគឺ option Premium នៅក្នុងប្រទេសថៃ ដើម្បីប្រជែង​នឹងគូប្រកួតធំៗ ខណៈដំបូងឡើយ​​ក្នុងប្រទេស​នេះគឺមានតែ option S និង SEL។

STARIA Premium ត្រូវបាន​ឌីហ្សាញ​បន្ថែមដូចជា ប៉ាណា​ត្រូវបានតុបតែង​ជាមួយ​ពណ៌ពិសេស ចង្កៀងមុខជាប្រភេទ LED Projector ដែល​ភ្ជាប់មកជាមួយប្រព័ន្ធភ្លើងហ្វាអូតូ និង​កញ្ចក់ Acoustic ដែល​កាត់​សំឡេង​រំខានពីខាងក្រៅបាន​ល្អបំផុត។ ឯចង្កៀង​ក្រោយ​បញ្ឈរ​វែង​ហៅថា Panametric Pixel LED ហើយកាងក្រោយ និង​យ៉ាន់កង់ alloy ទំហំ​ ១៨អ៊ីញ ជាមួយ​ពណ៌ដ៏ពិសេស ជាមួយគ្នានោះ ទ្វារក្រោយ​វៃឆ្លាត​បិទបើកដោយ​ប្រើSmart key ទ្វាស្លាយអូតូទាំងសងខាង ដោយអាច​ប្រើ​ជាមួយ​ Smart key ផងដែរ។

ផ្នែក​ខាងក្នុង​កាប៊ីន​វិញ វា​បំពាក់​កៅអី៤ជួរ ឬ១១កៅអីឯណោះ ដែល​អាចបត់សារ៉េចុះឡើងបាន ដំបូលកញ្ចក់​ Sunroof ២ អំពូល Ambient Mood lighting ដៃចង្កូតស្បែក ឈ្នាន់ហ្គែរ និង​ហ្វ្រាំង ជាប្រភេទអាលុយមីញ៉ូម។ ក្រៅពីនេះ វាបំពាក់​ប្រព័ន្ធ Touchscreen ទំហំ ៨អ៊ីញ ដែលអាចភ្ជាប់ Apple CarPlay និង​ Android Auto ប្រព័ន្ធសំឡេង BOSE ជាមួយ​ Speaker ១២គ្រាប់, ប្រព័ន្ធ​ត្រជាក់​អូតូ និង​ហ្វ្រាំងដៃ​ដែល​ភ្ជាប់មកជាមួយ​ប្រព័ន្ធ Auto Hold។

រថយន្ត​ Hyundai STARIA Premium ប្រើម៉ាស៊ីន​ម៉ាស៊ូតស៊ីឡាំង៤ ចំណុះ ២,២លីត្រ ផលិតបាន​កម្លាំង ១៧៧សេះ និង​កម្លាំង​រមួល ៤៣១ញ៉ូតុនម៉ែត្រ រត់ប៉ុងមុខ ជាមួយ​ប្រអប់លេខអូតូ ៨វគ្គ និងមាន Paddle Shift ទៀតផង។

រថយន្ត​នេះ ក៏បានបំពាក់​ប្រព័ន្ធសុវត្ថិភាព​ស្តង់ដាជាច្រើនផងដែរ ដោយត្រូវបាន​ដាក់​លក់​ក្នុងតម្លៃ​ ២,២៤លានបាត ឬជាង ៦៧ ០០០ដុល្លារអាមេរិក៕