Google ជាក្រុមហ៊ុនយក្សខាងបច្ចេកវិទ្យា ដែលបច្ចុប្បន្នកំពុងកាន់កាប់ក្រុមហ៊ុននាឡិកា Fitbit ក្នុងដៃ ហើយទន្ទឹមនឹងនោះ Google ក៏មានប្រព័ន្ធប្រត្តិបត្តការណ៍នាឡិកាវៃឆ្លាតផ្ទាល់ខ្លួន Wear OSផងដែរ។ ផ្ទុយពីនេះ Google បែបជាមិនបញ្ចេញនាឡិកាផ្ទាល់ខ្លួនទៅវិញ។ កន្លងមកយើងក៏ធ្លាប់បានលឺព័ត៌មានពីវាតាំងពីឆ្នាំ ២០១៨ មកម្លេះ តែគួរឲ្យស្តាយ ព័ត៌មានទាំងនោះ គ្រាន់តែជាពាក្យចចាអារ៉ាមប៉ុណ្ណោះ។

ថ្មីៗនេះ យោងតាមគណនី Twitter មួយឈ្មោះថា Jon Prosser បានឲ្យដឹងថា Pixel Watch នឹងលេចរូបរាងនៅថ្ងៃទី២៦ ខែឧសភាខាងមុខនេះហើយ។ បើតាមរូបបែកធ្លាយនោះ Pixel watch មានរាងមូល ស្រដៀងនឹង Galaxy Watch 4 មានអេក្រង់លាតពេញគែម ជាមួយនឹងប៊ូតុងមួយនៅផ្នែកចំហៀង។

គួរបញ្ជាក់ផងដែរថា កន្លងមកក៏ធ្លាប់មានពត៌មានថា Pixel Watch នេះនឹងចេញជាផ្លូវការកាលពីឆ្នាំ ២០២១កន្លងទៅដែរ ប៉ុន្តែបែជាស្ងាត់ទៅវិញ។ ហើយលើកនេះ អ្នកវិភាគជាច្រើនក៏មិនរំពឹងថាបានឃើញវាជាផ្លូវការដែរ ចំណែកឯការពិតទៅជាយ៉ាងណានោះ យើងមានតែរង់ចាំមើលថ្ងៃទី២៦ ខែឧសភាខាងមុខនេះតែប៉ុណ្ណោះ៕