កាលពីសប្តាហ៍មុន ក្រុមហ៊ុនផលិតរថយន្តវៀតណាម VinFast បានដាក់បង្ហាញរថយន្តអគ្គិសនីរបស់ខ្លួនជាផ្លូវការ នៅលើទីផ្សារសហរដ្ឋអាមេរិក ក្នុងកម្មវិធី 2021 Los Angeles Auto Show ដោយក្នុងនោះមានម៉ូដែល VF E35 និង VF E36។

អ្វីដែលគួរឲ្យចាប់អារម្មណ៍នោះគឺ VinFast VF E36 ដែលជា SUV កៅអី ៣ជួរ ដំណើរការដោយថាមពលអគ្គិសនីសុទ្ធ នឹងក្លាយជាគូប្រជែងរបស់ Tesla Model Y ដែលជាម៉ាករថយន្តអគ្គិសនីល្បីឈ្មោះខ្លាំងទូទាំងពិភពលោក។

រថយន្ត VinFast VF E36 មានបំពាក់ម៉ូទ័រអគ្គិសនីចំនួន ២ ដែលអាចបង្កើតកម្លាំងបានសរុប ៤០២សេះ ខណៈក្រុមហ៊ុន VinFast គ្រោងផ្តល់ជម្រើសអាគុយចំនួន ២ ប្រភេទ ដោយមួយផ្តល់ចម្ងាយបើកបរ ៣០០ម៉ាយ៍ (៤៨០គីឡូម៉ែត្រ) និង មួយទៀតផ្តល់ចម្ងាយ ៤០០ម៉ាយ៍ (៦៤០គីឡូម៉ែត្រ) នៅពេលសាកភ្លើងពេញម្តង។

បើប្រៀបធៀបគ្នាវិញ រថយន្ត Tesla Model Y មានកម្លាំង ៤៥០សេះ ហើយមានជម្រើសអាគុយចំនួន ៣ គឺ ៣០០ម៉ាយ៍ (៤៩០គីឡូម៉ែត្រ), ៣២៥ម៉ាយ៍ (៥២៥គីឡូម៉ែត្រ) និង ២៤៥ម៉ាយ៍ (៣៩០គីឡូម៉ែត្រ)។ វាត្រូវបានដាក់លក់នៅលើទីផ្សារសហរដ្ឋអាមេរិក ក្នុងតម្លៃខ្ទង់ ៦ម៉ឺនដុល្លារ។

ដោយឡែកចំពោះរថយន្ត VinFast VF E36 វិញ មិនទាន់មានតម្លៃផ្លូវការនៅឡើយទេ ប៉ុន្តែពាក្យគេរំពឹងថា វានឹងមានតម្លៃខ្ទង់ ៦ម៉ឺនដុល្លារដែរ សម្រាប់ទីផ្សារសហរដ្ឋអាមេរិក ដោយតម្លៃនេះគឺប្រហាក់ប្រហែលជាមួយនឹង Tesla Model Y ដែរ។

យ៉ាងណាមិញ រថយន្ត VinFast VF E36 នឹងត្រូវចេញលក់ ហើយដឹកឲ្យអតិថិជននៅសហរដ្ឋអាមេរិកជាផ្លូវការ នាឆ្នាំ២០២២ ខាងមុខនេះតែម្តង៕