រូបិយបណ្ណអេឡិចត្រូនិច Dogecoin បានកែប្រែមុខមាត់ខ្លួន ពីកាក់លុយដែលគេលេងសើចលើអ៊ីនធឺណិត ទៅជាលុយដែលមានឥទ្ធិពលក្នុងវិស័យលុយអេឡិចត្រូនិច (Cryptocurrency) ដោយនៅឆ្នាំ២០២១ គិតពីដើមឆ្នាំមក តម្លៃលុយនេះបានឡើងថ្លៃប្រមាណជា ១៣,០០០%។

• ចុច Subscribe ឆានែល Telegram របស់ Sabay ដើម្បីទទួលបានព័ត៌មានថ្មីៗទាន់ចិត្ត

ដែលថា Dogecoin ជាលុយដែលគេលេងសើចនោះ ព្រោះតែលុយអេឡិចត្រូនិចមួយនេះ ត្រូវបានបង្កើតចេញពី Doge meme ដែលជាអម្បូរឆ្កែ Shiba មានមុខគួរឱ្យស្រលាញ់ និងកំប្លែងផងដែរ។

Cryptocurrency មួយនេះត្រូវបានបង្កើតដោយ វិស្វករកុំព្យូទ័រ លោក Billy Markus និងអ្នកជំនាញទីផ្សាររបស់ក្រុមហ៊ុន Adobe លោក Jackson Palmer នៅក្នុងឆ្នាំ២០១៣ ដើម្បីប្រកួតប្រជែងនឹង Bitcoin ដែលកំពុងឡើងថ្លៃឥតឈប់ឈរនៅអំឡុងពេលនោះ។

បច្ចុប្បន្ន Dogecoin កំពុងទាក់ទាញចិត្តអ្នកវិនិយោគក្នុងវិស័យលុយអេឡិចត្រូនិចយ៉ាងខ្លាំង ដោយតម្លៃរបស់វាបានឡើងខ្ពស់ដល់ទៅ ០,៧៩ ដុល្លារ ក្នុង១កាក់ ដែលស្មើនឹងកំណើន ១៣,០០០% ចាប់តាំងពីដើមឆ្នាំ២០២១មក។

ការឡើងដ៏គំហុកនេះ ធ្វើឱ្យ Dogecoin ក្លាយទៅជា រូបិយបណ្ណអេឡិចត្រូនិចធំជាងគេលំដាប់ទី៤ និងមានតម្លៃមូលធនទីផ្សារ (តម្លៃរបស់ក្រុមហ៊ុន) ប្រមាណជា ៧០ ពាន់លានដុល្លារ។

មានហេតុផលជាច្រើនធ្វើឱ្យរូបិយបណ្ណមួយនេះឡើងថ្លៃឥតឈប់ឈរ ប៉ុន្ដែហេតុផលចម្បងមួយគឺថា ក្រុមហ៊ុន SpaceX របស់មហាសេដ្ឋី Elon Musk នឹងទទួលយកលុយ Dogecoin ជាមធ្យោបាយក្នុងការទូទាត់ ក្នុងបេសកកម្មឆ្ពោះទៅភពព្រះចន្ទ ដែលហៅថា «DOGE-1 Mission to the Moon» នៅត្រីមាសទី១ ឆ្នាំក្រោយនេះ។

មិនតែប៉ុណ្ណោះ Elon Musk បានឲ្យដឹងនៅលើបណ្តាញសង្គម Twitter កាលពី ខែមេសា ថា SpaceX នឹងប្រើប្រាស់និមិត្តសញ្ញា Dogecoin នៅលើនិមិត្តសញ្ញារបស់ព្រះចន្ទ ថែមទៀតផង។