3D Animation ឱកាសការងារខ្ពស់ ប្រាក់ខែច្រើនតែខ្វះអ្នកជំនាញ

2014-12-02 16:52:03
ព័ត៌មាន

2014-12-02 16:52:03
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្នុងចំណោមមុខជំនាញជាច្រើន ដែលសិស្សនិស្សិតកំពុងសិក្សា នៅតាមសាកលវិទ្យាល័យនានា 3D Animation ជាជំនាញដ៏ថ្មីសន្លាង តែកំពុងមានសក្ដានុពលខ្ពស់សម្រាប់ទីផ្សារការងារ។ បច្ចុប្បន្ន មានសាលាមិនច្រើនទេដែលមានបណ្ដុះបណ្ដាលមុខជំនាញ 3D Animation ដល់សិស្សនិស្សិតកម្ពុជាសិក្សា។

លោក ហ៊ាង ស៊ូហាន សាស្ត្រាចារ្យនិងជាអ្នកគ្រប់គ្រងនៅវិទ្យាស្ថាន ស៊ី ហ្គេក ដែលមានការបណ្ដុះបណ្ដាលមុខជំនាញ 3D Animation ចាប់តាំងពីឆ្នាំ ២០០៦ បានចូលខ្លួនមកបកស្រាយលើការសិក្សាជំនាញ 3D Animation ដល់ប្រិយមិត្ត និងមិត្តយុវវ័យសិក្សាស្វែងយល់។

Sabay៖ តើជំនាញ 3D Animation គេសិក្សាយ៉ាងដូចម្ដេច ហើយការសិក្សាមានរយៈពេលប៉ុន្មានឆ្នាំ? សាស្ត្រាចារ្យ៖ ជំនាញ 3D Animation គេសិក្សាផ្តោតសំខាន់ទៅលើការបង្កើតភាពយន្តគំនូរជីវចល 3D, Spot Commercial, 3D Film ជាដើម។ ជំនាញនេះគេសិក្សាអំពីការគូស ដែលមានការគូសជារូបតួអង្គ, គូសជាសាច់រឿង, ដាក់ពណ៌ដាក់ពន្លឺ, បច្ចេកទេសនៃការថត, បច្ចេកទេសនៃការបញ្ចូល 3D ទៅក្នុងវីដេអូ, បច្ចេកទេសនៃការចងឆ្អឹងឲ្យតួអង្គ, តិចនិកនៃការធ្វើចលនាឲ្យតួអង្គ រួមមានមុខវិជ្ជាជាច្រើនទៀត។ ជំនាញ 3D Animation ការសិក្សាអាចមានរយៈពេល ១៨ ខែ, ២ឆ្នាំ និង ៤ឆ្នាំ។

Sabay៖ តើអ្វីជាសក្ដានុពលក្នុងការជ្រើសរើសជំនាញនេះសិក្សា បើប្រៀបធៀបមុខជំនាញដទៃទៀត? សាស្ត្រាចារ្យ៖ ជំនាញ 3D Animation ជាជំនាញមួយដែលមានសក្ដានុពល ពីព្រោះអ្នកដែលមានជំនាញ 3D Animation អាចធ្វើការបានច្រើនមុខដូចជា៖ បង្កើតគំនូរជីវចល, បង្កើតជាភាពយន្ត, បង្កើតស្ពតពាណិជ្ជកម្ម រួមទាំងវិស័យជាច្រើនទៀតដែលទាក់ទងសិល្បៈ។

Sabay៖ តើអាចមានបញ្ហាប្រឈមណាមួយកើតឡើងទេ សម្រាប់ការសិក្សាជំនាញ 3D Animation ក្នុងអំឡុងពេលសិក្សា ហើយដែលអាចនាំឲ្យនិស្សិតបោះបង់ចោលការសិក្សាកណ្ដាលទី? សាស្ត្រាចារ្យ៖ ប្រាកដណាស់ ការសិក្សាជំនាញអ្វីក៏ដោយក៏មានឧបសគ្គដែរ។ យ៉ាងណាមិញ ការ សិក្សាជំនាញ 3D Animation នេះក៏មិនខុសគ្នាដែរ។ វាត្រូវការភាពអត់ធ្មត់ ព្យាយាមនិង ការអនុវត្តន៍ច្រើន។ ឧទាហរណ៍ ការសិក្សាមុខវិជ្ជាគូររូប, ដំឡើងរូបតួអង្គ, ចងឆ្អឹងនិងបង្កើតចលនាឲ្យតួអង្គ សិក្សា ដែលត្រូវការភាពអត់ធ្មត់ និងការអនុវត្តន៍ច្រើនជារៀងរាល់ថ្ងៃ ។ បើនិស្សិតគ្មានការព្យាយាម អត់ធ្មត់និងមានពេលអនុវត្តន៍ឲ្យបានច្រើនទេ និស្សិតមិនអាចសិក្សាបានល្អ និងអាចបោះចោលការសិក្សាកណ្ដាលទីជាមិនខាន។

Sabay៖ តើពួកគេគួរតែត្រៀមខ្លួន និងមានចំណេះដឹងមូលដ្ឋានអ្វីខ្លះដើម្បីឲ្យការសិក្សាជំនាញ 3D Animation មានភាពរលូន និងទទួលបានជោគជ័យ? សាស្ត្រាចារ្យ៖ ជាការពិតណាស់ ជំនាញ 3D Animation សិស្សដែលចង់រៀនជំនាញនេះ ទោះជាគ្មានមូលដ្ឋានក៏អាចសិក្សាបានដែរ ឲ្យតែមានទឹកចិត្តស្រលាញ់និងការព្យាយាម។ តែល្អបំផុតសិស្សដែលចង់រៀនជំនាញ 3D Animation គួរមានមូលដ្ឋានខ្លះៗខាងគូររូប ដែលវានឹងធ្វើឲ្យការសិក្សាមានដំណើរការល្អ និងរលូន។

Sabay៖ តើក្រៅពីស៊ីហ្គេក មានគ្រឹះស្ថានណាខ្លះទៀត ដែលកំពុងបណ្ដុះបណ្ដាលជំនាញ 3D Animation ដល់សិស្សនិស្សិតកម្ពុជា ហើយការសិក្សាយ៉ាងដូចម្ដេចដែរ? សាស្ត្រាចារ្យ៖ ក្រៅពីវិទ្យាស្ថាន ស៊ី ហ្គេក នៅក្នុងប្រទេសយើងសព្វថ្ងៃមានគ្រឹះស្ថានមួយចំនួន ដែរដែលកំពុងបណ្ដុះបណ្ដាលជំនាញ 3D Animation ដល់សិស្សនិស្សិតដូចជា Objectif 3D, Limkokwing តែគ្រឹះស្ថានជនជាតិខ្មែរបង្កើត មានតែវិទ្យាស្ថាន ស៊ី ហ្គេកតែមួយគត់ដែលកំពុងបណ្ដុះបណ្ដាលជំនាញ 3D Animation នេះ។ ការសិក្សាជំនាញ 3D Animation នៅឆ្នាំដំបូង ផ្តោតសំខាន់លើការគូររូប, ដំឡើងរូបតួអង្គ, បំពាក់ពណ៌ Texture ឲ្យតួអង្គ។ ចូលដល់ឆ្នាំទី២ ចាប់ផ្ដើមសិក្សាពីការចងឆ្អឹង, សិក្សាពីមូលដ្ឋានគ្រឹះនៃការធ្វើចលនារូបភាព និងម៉ូហ្សិន។ ឆ្នាំទី៣ និងទី៤ សិក្សាពីតិចនិកនៃការធ្វើចលនាដាយណាមិច, វីហ្សូលអេហ្វិច, ម៉ូហ្សិនខាប់ឆើ និងធ្វើសារណាបញ្ចប់ការសិក្សា។

Sabay៖ តើការរីកដុះដាលនៃវិស័យ Animation បានរួមចំណែកយ៉ាងណាខ្លះសម្រាប់សិក្សាជំនាញ 3D Animation? សាស្ត្រាចារ្យ៖ ការរីកដុះដាលនៃវិស័យ Animation បានរួមចំណែកយ៉ាងខ្លាំងដល់ការសិក្សាជំនាញ Animation។ និស្សិតដែលសិក្សាជំនាញនេះ មានកម្លាំងចិត្ត និងសុទិដ្ឋិនិយមចំពោះជំនាញដែលខ្លួនសិក្សា ជាមួយអត្រាការងារខ្ពស់។ ជាការពិតណាស់ជំនាញ3D Animation នេះនៅក្នុងប្រទេសដែលរីកចម្រើនជំនាញ 3D Animation មានការវិវឌ្ឍជាយូរណាស់មកហើយ។ ដោយឡែកនៅប្រទេសកម្ពុជាយើង ជំនាញនេះទើបតែរីកចម្រើនខ្លាំងក្លានាប៉ុន្មានឆ្មាំចុងក្រោយ ប៉ុណ្ណោះ។

Sabay៖ តើលោកមើលឃើញបច្ចេកវិទ្យា 3D Animation ចាប់ផ្ដើមវិវឌ្ឍនៅក្នុងប្រទេសកម្ពុជាចាប់ពីពេលណា ហើយកំពុងស្ថិតនៅក្នុងដំណាក់កាលអភិវឌ្ឍបែបណាដែរនាពេល បច្ចុប្បន្ន បើប្រៀបធៀបប្រទេសក្នុងតំបន់ និងពិភពលោក? សាស្ត្រាចារ្យ៖ បើតាមដែលខ្ញុំដឹងក្នុងប្រទេសកម្ពុជាយើង បច្ចេកទេស Animation ចាប់ផ្ដើមវិវឌ្ឍតាំងពីឆ្នាំ ២០០០ មកម្ល៉េះ ដែលនៅពេលនោះបច្ចេកទេសនេះនៅមានកម្រិតតិចតួចប៉ុណ្ណោះ។ ប៉ុន្តែបន្តិចម្តងៗវិស័យ Animation នេះត្រូវបានវិវឌ្ឍយ៉ាងខ្លាំងគួរឲ្យកត់សំគាល់ ពិសេសនៅក្នុងពេលបច្ចុប្បន្នជំនាញ Animation នេះ ត្រូវបានប្រើប្រាស់យ៉ាងទូលំទូលាយស្ទើរគ្រប់វិស័យ ជាពិសេសលើវិស័យសិល្បៈកម្សាន្ត, ស្ពតពាណិជ្ជកម្ម, វិស័យភាពយន្ត, វិស័យគំនូរជីវចល រួមទាំងការងារយ៉ាងច្រើនទៀត ដែលត្រូវការជំនាញនេះ។ ទោះជានៅក្នុងប្រទេសកម្ពុជាយើងសព្វថ្ងៃ វិស័យនេះមានការរីកដុះដាលជាមួយការធនធានមនុស្សមួយចំនួន តែប្រៀបធៀបទៅប្រទេសមួយចំនួននៅក្នុងតំបន់និងពិភពលោក ដែលមានការអភិវឌ្ឍលើវិស័យ 3D Animation រយៈពេលជាយូរនោះ ចំណេះដឹងនិងសមត្ថភាពរបស់យើងគឺនៅមានកម្រិតនៅឡើយ ហើយដែលត្រូវការពេលវេលាយូរច្រើនឆ្នាំទៀត ដើម្បីឲ្យមានសមត្ថភាព និងប្រកួតប្រជែងប្រទេសដទៃ។

Sabay៖ ចុងក្រោយ លោកមានពាក្យពេចន៍អ្វីផ្ដាំផ្ញើដល់មិត្តនិស្សិត ដែលកំពុងសិក្សានិងចង់ចាប់ជំនាញ 3D Animation សិក្សា? សាស្ត្រាចារ្យ៖ ជាចុងក្រោយខ្ញុំមានពាក្យពេចន៍ខ្លះៗសូមផ្ដាំផ្ញើទៅដល់និស្សិតដែល កំពុងតែសិក្សាជំនាញ 3D Animation នេះ គឺត្រូវតែខិតខំប្រឹងប្រែងរៀនសូត្រ ជាពិសេសការស្រាវជ្រាវបន្ថែមឲ្យបានច្រើន ដើម្បីឲ្យទទួលបានសមត្ថភាពខ្ពស់ ចំណេះដឹងទូលំទូលាយក្នុងការប្រកួតប្រជែងយកទីផ្សារការងារទាំងក្នុង ស្រុកនិងក្នុងតំបន់។ ជាមួយគ្នានេះ សម្រាប់អ្នកដែលមានបំណងចង់សិក្សាជំនាញ 3D Animation សូមសម្រេចចិត្តឲ្យបានច្បាស់ ហើយប្រញាប់មកសិក្សាពីព្រោះ 3D Animation ជាជំនាញមួយដែលល្អ មានទីផ្សារការងារខ្ពស់ សំបូរបែបនិងអាចរកចំណូលបានច្រើននាពេលបច្ចុប្បន្ននិងអនាគត។ ម៉្យាងទៀតអ្នកដែលមានជំនាញ និងមានសញ្ញាប័ត្រផ្នែកនេះក៏នៅមានចំនួនតិចតួច ហើយការងារមានច្រើនដែលកំពុងរង់ចាំ។

បន្តអាន៖ ជនជាតិខ្មែរឡើងធ្វើជាអគ្គនាយកថ្មីក្រុមហ៊ុនលំដាប់ពិភពលោក RMA ប្រចាំកម្ពុជា

បន្តអាន៖ Smart ចេញមុខជម្រះការចោទប្រកាន់នាំ iPhone ថៃមកលក់

បន្តអាន៖ ចប់យុទ្ធនាការលក់អាវយឺត និស្សិតខ្មែររៀននៅជប៉ុនចាប់ធ្វើក្ដារចុចឆ្លាតវៃលើប្រព័ន្ធ Android

បន្តអាន៖ កំពូលស្មាតហ្វូនទាំង ៤ គីឡូធ្ងន់ហ៊ានតតាំង iPhone 6/6Plus

អត្ថបទ៖ ប៊ុណ្ណារ៉ា