ក្នុងអំឡុងរដូវកាលចូលឆ្នាំនេះ លោកអ្នកប្រហែលជាសប្បាយ​នឹង​ការលេងបាញ់ទឹក ជះទឹក ឬ​ទៅលេងកន្លែង​ជុំៗមនុស្ស​ដែលគេបាញ់ស្រោចទឹកជាដើម។ ​បើ​អ្នកបានដាក់ថង់ការពារការជ្រាបទឹកចូល​ទូរសព្ទ ប្រហែល​វាមិនមានបញ្ហាអ្វីទេ តែជួនកាល​ភ្លេចខ្លួន ឬចៃដន្យណាមួយ​ ទូរសព្ទត្រូវទឹកសើមជោគជាំដែរនោះ គួរសាកអនុវត្ត​តាមវិធីមួយចំនួន ដើម្បីអាចបង្ការ​បញ្ហា​កុំឱ្យកាន់តែធ្ងន់ធ្ងរ។

១. បិទទូរសព្ទភ្លាម៖ ពេលដឹងខ្លួនថា ទូរសព្ទចូលទឹកហើយ គឺ​ត្រូវបិទទូរសព្ទភ្លាមៗតាមគ្រប់​វិធីដែល​អាចធ្វើបាន ដើម្បីកាត់ផ្តាច់​ចរន្ត​ក្នុងគ្រឿងបង្គុំទូរសព្ទ។

២. ដកស៊ីមកាត និង Memory៖ សម្រាប់​ទូរសព្ទដែល​មានស៊ីមកាត និង Memory គួរដកវា​ចេញ​សិន ហើយបើអាចដកថ្មបានទៀត គួរដកចេញផងដែរ ក្រែងលោវា​ត្រូវទឹកដែរ ដូច្នេះយើងអាចជូតសម្អាតវា និង​រង់ចាំឱ្យវាស្ងួត។

៣. សម្ងួតទូរសព្ទ៖ អ្នកអាចយកកន្សែង​ដែលមិនសើមទឹក យកទៅជូតទូរសព្ទទាំងមូល និងគ្រប់កន្លុកកន្លៀត​តាមដែលអាចធ្វើបាន រួចទុកយូរបន្តិចឱ្យវាស្ងួតបាន​គ្រប់កន្លែងសិន។ តែ​យ៉ាងណា ត្រូវ​ប្រុងប្រយ័ត្ននៅកន្លែងរន្ធសាកថ្ម បើសិន​ជូតត្រង់នេះ គឺមិនត្រូវឱ្យមានជាប់​កម្ទេចកម្ទីឬសរសៃ​អំបោះណាមួយឡើយ។ ជាមួយគ្នានេះដែរ មិនគួរប្រើម៉ាស៊ីនផ្លុំខ្យល់​ដែលក្តៅ​ ទៅបាញ់​សម្ងួត​ទូរសព្ទនោះទេ។

៤. បើកទូរសព្ទដើម្បីតេស្ត៖ ប្រសិនបើអ្នកច្បាស់ថា ទូរសព្ទ​អ្នកបាន​ស្ងួត​គ្រប់កន្លែង​អស់ហើយ អាច​សាកល្បងបើកទូរសព្ទវិញបាន ដោយត្រូវពិនិត្យ​មើលភាព​មិនប្រក្រតីណាមួយកើតឡើង។ ប្រើប្រាស់វា​ឱ្យបានយូរបន្តិចសិនទៅ បើឃើញ​ថា មិនមានបញ្ហាអ្វីទេនោះ គឺអ្នកអាច​បន្តធ្វើតេស្ត​​សាកថ្ម​ទូរសព្ទ​បាន៕