ឆ្ងល់ទេបច្ចេកវិទ្យាអ្វី អាចឲ្យអ្នកដឹងល្បឿនរត់កីឡាករលើទីលាននៅ World Cup?

2018-07-05 01:30:00
ចំណេះដឹង

2018-07-05 01:30:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ព្រឹត្តិការណ៍ប្រកួតបាល់ទាត់ពិភពលោក World Cup ឆ្នាំ ២០១៨ បានប្រមូលផ្តុំទៅដោយបច្ចេកវិទ្យាទំនើបជាច្រើន ដើម្បីជួយជំរុញឲ្យការប្រកួតប្រព្រឹត្តិទៅដោយរលូននិងមានភាពសុក្រឹត។ ជាលើកទីមួយ សហព័ន្ធ FIFA បានផ្តល់ជូននូវបច្ចេកវិទ្យាប្រមូលទិន្នន័យឆ្លងកាត់គ្នារវាងជំនួយការគ្រូបង្វឹកនិងអ្នកវិភាគទិន្នន័យ។

ឧបករណ៍ Tablet ដែលអ្នករមែងឃើញជំនួយការគ្រូបង្វឹកកាន់ជាប់នឹងដៃក្នុងការប្រកួត មានបំពាក់នូវបច្ចេកវិទ្យា Electronic Performance & Tracking Systems (EPTS) អាចបង្ហាញចេញនូវទិន្នន័យរបស់កីឡាករលើទីលានប្រកួត ពោលដូចជាចម្ងាយនៃការរត់ឬល្បឿនជាដើម។

ដំណាក់កាលដំបូងដំណើរការក្នុងកុំព្យូទ័ររបស់អ្នកវិភាគទិន្នន័យ ឆ្លងកាត់ប្រព័ន្ធកាមេរ៉ា Optical Tracking ចាប់សកម្មភាពលើទីលាន មុនក្រុមនេះធ្វើការបញ្ជូនបន្តទៅឲ្យជំនួយការគ្រូបង្វឹកដែលអង្គុយនៅទីតាំងកៅអីបម្រុង និងដំណាក់កាលចុងក្រោយប្រើសម្រាប់បង្ហាញទិន្នន័យពីការប្រកួត។ FIFA ក៏សង្ឃឹមថាបច្ចេកវិទ្យានេះសោត អាចជាស្ពានចម្លងប្រព័ន្ធឌីជីថលទំនើបរវាងជាតិសាសន៍ទាំងពីរ។

ប្រធានផ្នែកបច្ចេកវិទ្យានិងភាពច្នៃប្រឌិតរបស់ FIFA លោក Johannes Holzmuller បានមានប្រសាសន៍ថា៖ "យើងដឹងច្បាស់ពីទីតាំងនៃកីឡាករនិងបាល់ដែលកំពុងធ្វើសកម្មភាពគ្រប់ពេលទាំងអស់ក្នុងការប្រកួត ដោយយើងមានរង្វាស់ច្រើនប្រភេទសម្រាប់ការវិភាគ ហើយក៏អាស្រ័យទៅលើពួកគេក្នុងការសម្រេចចិត្តប្រើប្រាស់ ប៉ុន្តែយ៉ាងណាមិញយើងពិតជាចង់ឲ្យមានការកំណត់យករង្វាស់ច្បាស់លាស់ណាមួយដើម្បីប្រើរួមគ្នាសម្រាប់ក្រុមទាំងអស់"។

បន្ថែមពីផលប៉ះពាល់ដែលអាចកើតមានដោយសារបច្ចេកវិទ្យាខាងលើ ក៏ដូចជាបច្ចេកវិទ្យាថ្មី Goal Line Technology និង VAR លោកបានឆ្លើយតបថា៖ "តាមពិតទៅនៅទីបញ្ចប់ កីឡាករ ២២ រូប និងអជ្ញារកណ្តាលមួយរូប នៅតែជាតួអង្គលើទីលាន ប៉ុន្តែការប្រើបច្ចេកវិទ្យាទាំងនេះគ្រាន់ជាការបន្ថែមនិងជួយសម្រួល ការផ្តល់ទិន្នន័យមួយផ្នែកធំប៉ុណ្ណោះ"។