ក្រៅពីការដឹងពីកម្លាំងសេះ និងប្រភេទនីមួយៗច្បាស់លាស់ របស់ម៉ាស៊ីនត្រជាក់រួចមក ប្រិយមិត្តមួយចំនួនរបស់ Sabay ប្រាកដជាមានការងឿងឆ្ងល់ជាក់ជាមិនខាន ថាតើមុននឹងត្រូវសម្រេចចិត្តទិញម៉ាស៊ីនត្រជាក់តម្លៃរាប់រយដុល្លារនោះ មានគន្លឹះតែ ២ ទេឬ ដើម្បីជាជំនួយក្នុងការសម្រេចចិត្ត?

ចម្លើយនោះគឺ នៅមានទៀត ហើយថ្ងៃនេះ Sabay សូមនាំជូនចំណុចសំខាន់មួយទៀត ក្នុងការសម្រេចចិត្តជ្រើសយកម៉ាស៊ីនត្រជាក់ប្រភេទណាមកប្រើប្រាស់ ដោយចំណុចនេះ វាមានទាក់ទងទៅនឹងទម្លាប់នៃការប្រើប្រាស់ម៉ាស៊ីនត្រជាក់។

ប្រសិនបើអ្នក មិនសូវនៅផ្ទះទេនោះ អាចថាអ្នកទៅប្រកបរបរ ធ្វើការពេញមួយថ្ងៃ ហើយត្រឡប់មកផ្ទះវិញនៅពេលយប់នោះ ការចំណាយលុយទៅលើម៉ាស៊ីនត្រជាក់ ដែលមានកម្លាំងសេះធំដូចជា​ ១,៥ ទៅ ២ សេះ​ អាចផ្ដល់ផលចំណេញជាងម៉ាស៊ីនត្រជាក់ ដែលមានកម្លាំងតូចត្រឹម ១ សេះ ព្រោះថា ម៉ាស៊ីនត្រជាក់ដែលមានកម្លាំងសេះខ្លាំង អាចបញ្ចុះសីតុណ្ហភាពបានលឿន​ ក្នុងទីតាំងដែលមានផ្ទៃក្រឡាធំ។ ដូច្នេះហើយ បើអ្នកនៅក្រៅពេញមួយថ្ងៃទៅហើយ ការប្រើម៉ាស៊ីនត្រជាក់ទំហំធំ​ អាចជួយសន្សំសំចៃ ពេលវេលាអ្នក និងបានពេញមួយតួផ្ទះទៀត ហើយបើអ្នកដាក់កម្រិតវិលរបស់កង្ហារ ជាប្រភេទស្វ័យប្រវត្តិ (Auto Fan Speed) ទៀតនោះ វានឹងជួយសន្សំសំចៃថ្លៃចំណាយអគ្គិសនីអ្នកបានមួយកម្រិតថែមទៀត។

ចំពោះផ្ទះ ដែលមានសមាជិកនៅពេញមួយថ្ងៃ និងតម្រូវឲ្យមានការប្រើប្រាស់ម៉ាស៊ីនត្រជាក់ជាប់រហូតនោះ ការជ្រើសរើសម៉ស៊ីនត្រជាក់ ដែលមានកម្លាំងសេះតូចជារឿងប្រសើរជាង​ ព្រោះវាអាចជួយសន្សំសំចៃថ្លៃភ្លើងបានច្រើនខ្លាំង ពេលប្រើរយៈយូរលើសពី ១២ ម៉ោងក្នុងមួយថ្ងៃ។​ ម៉្យាងទៀត ការប្រើប្រាស់ពេញមួយថ្ងៃ អាចតម្រូវតាមតែកន្លែង ដែលកំណត់តែប៉ុណ្ណោះ​ ដូចជាបន្ទប់ទទួលភ្ញៀវជាដើម។ បែបនេះហើយ ការប្រើប្រាស់ម៉ាស៊ីនត្រជាក់មានកម្លាំងសេះធំ នឹងធ្វើឲ្យចំណាយលើថាមពលអគ្គិសនីមានការកើនឡើង ជាពិសេសក្នុងការប្រើប្រាស់ពេញមួយថ្ងៃនេះតែម្ដង។

ចុចអាន៖

• មិន​ធម្មតា​ទេ រថយន្ត​ដឹក​មេដឹកនាំកូរ៉េខាង​ជើង​ក្នុងប្រទេសសិង្ហបុរី
• ម៉ាស៊ីន​ត្រជាក់​​​មាន​​ច្រើន​ប្រភេទ​ខុសៗ​គ្នា​ មួ​យ​ណា​គួរ​​ទិញ​ប្រើ​នៅ​ផ្ទះ​?