ពេលធ្វើការម្តងៗ បើចេះចែកអេក្រង់ដើម្បីបើកកម្មវិធីច្រើនដំណាលគ្នា ប្រកដណាស់ល្បឿននៃការងារក៏កើនឡើងទៅតាមនោះដែរ។ ថ្ងៃនេះសប្បាយនឹងបង្ហាញពីរបៀបចែកអេក្រង់ច្រើនរបៀបដែលអាចធ្វើបាននៅលើ Mac ទាំងអស់ដូចខាងក្រោម៖

វិធីចែកអេក្រង់ជាពីរ៖ បើកកម្មវិធីដែលអ្នកចង់ប្រើទាំងអស់ រួចគ្រវាស Mouse ទៅដាក់លើចំណុចពណ៌បៃតង រង់ចាំបន្តិចនោះអ្នកនឹងឃើញមានពាក្យថា

• Enter Full Screen បើកកម្មវិធីឲ្យធំពេញអេក្រង់

• The Window to left of screen បើកកម្មវិធីពេញមួយចំហៀងអេក្រង់ផ្នែកខាងឆ្វេង

• The Window to right of screen បើកកម្មវិធីពេញមួយចំហៀងអេក្រង់ផ្នែកខាងស្តាំ

បន្ទាប់ពីជ្រើសរើសរួច នោះកុំព្យូទ័រនឹងបង្ហាញកម្មវិធីបើកចោលដែលអាច ដំណើរការកម្មវិធីចែកអេក្រង់ ហើយអ្នកគ្រាន់តែជ្រើសរើសកម្មវិធីនោះជាការស្រេច។

វិធីចែកអេក្រង់ជាពីរតាមក្រុមនីមួយៗ៖ អ្នកក៏អាចបើកកម្មវិធីចែកអេក្រង់ទៅតាមក្រុមនៃកម្មវិធីបានផងដែរ។ វិធីធ្វើគ្រាន់តែយកម្រាមដៃទាំង៤ គ្រវាសលើ Touch Pad ទៅខាងលើដើម្បីបើករបារ Mission Control បន្ទាប់មកអូសកម្មវិធីដែលអ្នកចង់ចែកអេក្រង់ ទៅដាក់លើកម្មវិធីមួយទៀត នោះវានឹងចែកជាពីរដោយស្វ័យប្រវត្តិ។ អ្នកក៏អាចឆ្លាស់ពីក្រុមមួយចូលក្រុមមួយ គ្រាន់តែយកម្រាមដៃទាំង៤ គ្រវាសលើ Touch Pad ទៅខាងឆ្វេង ឬស្តាំតែប៉ុណ្ណោះ។

វិធីចែកទំហំអេក្រង់ និងទីតាំងនៃកម្មវិធី៖ នៅចំខ្សែបន្ទាត់កណ្តាលអ្នកឃើញមានរបារឆ្នូតមួយ របារនេះជាអ្នកកំណត់ទំហំដីឡូត៍នៃកម្មវិធីរបស់អ្នក។ វិធីប្រើគ្រាន់តែយក Mouse ចុចលើរួចអូសវាទៅតាមទំហំដែលអ្នកចង់បាន។ ប្រសិនបើអ្នកចង់ប្តូរទីតាំងនៃកម្មវិធី អ្នកត្រូវយក Mouse ចុចលើប៊ូតុងពណ៌បៃតងឲ្យជាប់ រួចអូសវាទៅតាមទៅតាំងដែលចង់បាន៕