- 2022-05-20 04:15:12
- ព័ត៌មាន
នារីបម្រើការលើយន្តហោះម្នាក់ប្រាប់ថា Elon Musk ស្ទាបអង្អែលនាងក្នុងបំណងមិនល្អ
- 2022-05-20 04:15:12
- ចំនួនមតិ 0 | ចំនួនចែករំលែក 0
នារីបម្រើការលើយន្តហោះម្នាក់ប្រាប់ថា Elon Musk ស្ទាបអង្អែលនាងក្នុងបំណងមិនល្អ
ចន្លោះមិនឃើញ
រឿងរ៉ាវកំពុងក្តៅគគុកទាក់ទិននឹងលោក Elon Musk ដែលជាមហាសេដ្ឋីលេខមួយលើពិភពលោក ត្រូវបានសារព័ត៌មាន Business Insider ចុះផ្សាយថា លោកបានស្ទាបអង្អែលក្នុងបំណងមិនល្អទៅលើអ្នកបម្រើការលើយន្តហោះជានារីភេទម្នាក់។
ករណីនេះត្រូវបានភាគីខាងគណៈគ្រប់គ្រងជាន់ខ្ពស់ម្នាក់នៃក្រុមហ៊ុន SpaceX បានបង់ប្រាក់សងជម្ងឺចិត្តចំនួន ២៥ ម៉ឺនដុល្លាររួចរាល់ហើយ។ យោងតាមប្រភពពីសារព័ត៌មានខាងលើបានស្រង់សម្ដីមិត្តភក្តិរបស់នារីរងគ្រោះដែលធ្វើការដូចគ្នានៅក្នុងយន្តហោះមួយគ្រឿងនោះ (មិនបង្ហាញឈ្មោះ) ដែលជាដៃគូសហការនឹងក្រុមហ៊ុន SpaceX មកធ្វើសាក្សីសារភាពថា៖ «អំឡុងពេលហោះហើរមិត្តភក្តិរបស់នាងត្រូវបានក្រុមការងារលោក Elon Musk មកអញ្ជើញនាងឲ្យទៅ ម៉ាស្សាខ្លួន ក្នុងបន្ទប់ផ្ទាល់របស់លោក Elon ជាលក្ខណៈ VIP ។ ពេលនោះមិត្តភក្តិនាងថា លោក Elon ស្រាតខោខ្លួនឯងសល់ត្រឹមជង្គង់ និងថែមទាំងយកជើងគាត់ មកត្រដួសនឹងខ្លួនប្រាណនាង។ លើសពីនេះទៀត មិត្តភក្តិនាងថា បើសិននាងព្រម លោកនឹងចំណាយឲ្យនាង [....]។ (ប្រភពក៏បញ្ចប់សាច់រឿងត្រឹមនេះទៅ…)។»
ប្រភពដដែលបានបន្ថែមទៀតថា រំលងប៉ុន្មានថ្ងៃក្រោយ នារីរងគ្រោះក៏បានដាក់ពាក្យបណ្ដឹងមក HR Department ដេប៉ាតឺម៉ង់ធនធានមនុស្សនៃក្រុមហ៊ុន SpaceX ប៉ុន្តែភាគីក្រុមហ៊ុនបានដោះស្រាយសងជាទឹកប្រាក់ចំនួន ២៥ មុឺនដុល្លារអាមេរិក ជាថ្នូរនឹងការឡើងតុលាការ និងបិទបញ្ចប់រឿងហាមកុំឲ្យនាងនិយាយអាក្រក់ពីលោក Elon Musk ដែលអាចប៉ះពាល់ដល់កិត្តិយសនៃក្រុមហ៊ុន SpaceX និង Tesla ។
ទោះជាយ៉ាងណាមិញ ភាគីសាមីខ្លួនលោក Elon Musk បានចេញមកបកស្រាយជុំវិញករណីនេះថា៖ «អ្នកដឹងរឿងរ៉ាវទើបដឹង។ វាមានបញ្ហាជាប់ទាក់ទងនឹងនយោបាយ។ បើសិនខ្ញុំចេះបៀតបៀនផ្លូវភេទទៅលើនារី នេះប្រហែលជាមិនមែនលើកទីមួយក្នុងបទពិសោធន៍ហោះហើរជាង ៣០ ឆ្នាំរបស់ខ្ញុំនោះទេ។»
សូមបញ្ជាក់ផងដែរថា ករណីនេះបានកើតឡើងតាំងពីឆ្នាំ ២០១៨ មកម្ល៉េះ ប៉ុន្តែថ្មីៗនេះត្រូវបានសារព័ត៌មានបរទេសលើកមកចុះផ្សាយ រហូតដល់សាមីខ្លួនបង្ហោះកាលពីថ្ងៃទី ១៨ ខែឧសភាថា៖ «មានគេវាយប្រហារមកខ្ញុំបែបនយោបាយ ក្នុងរយៈកាលប៉ុន្មានខែខាងមុខនេះ៕»
ប្រែសម្រួលដោយ៖ រក្សា | ប្រភព៖ Theverge