នេះគឺជា LED Projector ថ្មីពី Samsung ដែលមានរូបរាងតូច និងស្រាល សម្រាប់ប្រើប្រាស់បែបគ្រួសារ។ រូបរាងរបស់វាត្រូវបានឌីហ្សាញឡើងមក រាងជាស៊ីឡាំង ស្រដៀងនឹងកាមេរ៉ាសុវត្ថិភាព អាចបង្វិលបាន ១៨០ដឺក្រេ។

សមត្ថភាពរបស់វាអាចបញ្ចាំងរូបភាពបានដល់កម្រិត 1080p ក្នុងទំហំចាប់ពី ៣០ អ៊ីញ ដល់ ធំបំផុត ១០០ អ៊ីញ ទៅតាមចម្ងាយពី Projector ទៅជញ្ជាំង។ វាក៏មានមុខងារតម្រង់ និងមុខងារ Focus ដោយស្វ័យប្រវត្តិផងដែរ ដើម្បីជួយសម្រួលកុំឲ្យអ្នកប្រើប្រាស់ហត់ក្នុងការសារ៉េ។

ជាមួយនឹង Projector នេះ អ្នកប្រើប្រាស់ក៏មិនចាំបាច់ស្វែងរកឧបករណ៍បំពងសំឡេងពីក្រៅមកដែរ ព្រោះថាវាមានភ្ជាប់មកជាមួយស្រាប់តែម្តង។ មិនតែប៉ុណ្ណោះ លទ្ធភាពបញ្ចេញសំឡេងរបស់វាគឺអាចបាចសាចជុំវិញ ៣៦០ដឺក្រេ ទៀតផង។

លើសពីនេះ Samsung ក៏បានដាក់ប្រព័ន្ធប្រតិបត្តិការទូរទស្សន៍វៃឆ្លាតរបស់ខ្លួនចូលមកក្នុងនេះតែម្តង មានន័យថាអ្នកប្រើប្រាស់ក៏អាចប្រើវាសម្រាប់ការកម្សាន្តដាច់ដោយឡែក មិនចាំបាច់ភ្ជាប់ជាមួយឧបករណ៍ផ្សេងទៀតក៏បាន។

ដោយសារតែវាមានរូបរាងតូច Samsung ក៏បានគិតគូរដល់គ្រឿងបរិក្ខាខាងក្រៅ សម្រាប់បន្ថែមភាពងាយស្រួលដល់អ្នកប្រើប្រាស់។ គ្រឿងទាំងនោះមានដូចជា គម្របលេន​ សម្រាប់បង្កើតបរិយាកាសពន្លឺក្នុងបន្ទប់, ស្រោមការពារជម្រាបទឹក សម្រាប់ពេលយកចេញក្រៅ និង ថ្មជំនួយ សម្រាប់ពេលប្រើប្រាស់នៅទីកន្លែងគ្មានអគ្គិសនីជាដើម។

គួរបញ្ជាក់ផងដែរថា LED Projector នេះនឹងមានដាក់លក់នៅលើទីផ្សារសហរដ្ឋអាមេរិក ក្នុងតម្លៃ ៨៩៩ដុល្លារ តាមរយៈវេបសាយ Samsung ដោយផ្ទាល់៕