Samsung ទើបបានបញ្ចេញអេក្រង់ ថ្មីចំនួន៣ម៉ូឌែលរបស់ខ្លួនសម្រាប់ឆ្នាំ២០២២ ដែលគ្រោងនឹងប្រកាសជាផ្លូវការក្នុងកម្មវិធី CES 2022 ចាប់ពីថ្ងៃទី៥ ដល់ទី៧ ខែមករា នៅទីក្រុង Las Vegas។

អេក្រង់ដំបូងគេដែល Samsung នឹងដាក់បង្ហាញនោះគឺ Samsung Odyssey Neo G8 ដែលមានទំហំ ៣២អ៊ីញជាប់ឈ្មោះជាអេក្រង់ដែលអាចបង្ហាញបានដល់ 4K 240Hz ដំបូងគេនៅលើពិភពលោក។ អេក្រង់នេះជាប្រភេទអេក្រង់កោង បង្ហាញរូបភាពដោយបច្ចេកវិទ្យា Mini-LED ដែលមានទំហំតូចខ្លាំងដល់ទៅ ១ភាគ៤០ នៃអេក្រង់ LED ធម្មតា។ បូកផ្សំនឹងបច្ចេកវិទ្យា Quantum Matrix និង Quantum HDR 2000 របស់ Samsung ជួយអោយវាមានសមត្ថភាពអាចបញ្ចេញពន្លឺខ្ពស់បំផុតរហូតដល់ ២ ០០០ nits សម្រាប់ការបង្ហាញ HDR ហើយអាចតម្លើង ឬបន្ថយពន្លឺដល់ទៅ ៤ ០៩៦កម្រិត។ Odyssey Neo G8 នេះមានរន្ធ HDMI 2.1 ចំនួនពីរ និងរន្ធ DisplayPort 1.4 ចំនួនមួយ ដែលអាចផ្លាស់ប្តូរប្រភពដោយស្វ័យប្រវត្តិដោយសារវាមានមុខងារ Auto Source Switch+ មិនថាអ្នកប្រើរន្ធHDMI ឬរន្ធDPឡើយ។ ហើយចុងក្រោយគឺមុខងារ CoreSync ដែលមានសមត្ថភាពកែតម្រូវពន្លឺ RGB អោយត្រូវទៅនឹងមាតិកាដែលអ្នកប្រើកំពុងមើល។

ម៉ូដែលបន្ទាប់គឺ Smart Monitor M8 ដែលមានមុខងារ webcam ដែលដំណើរការជាមួយកម្មវិធី Google Duo ដែលមានស្រាប់មកក្នុងអេក្រង់តែម្តង។ ម៉ូឌែលនេះក៏បានភ្ជាប់មកជាមួយនូវកម្មវិធីសម្រាប់ឱ្យអ្នកប្រើអាចប្រែអេក្រង់នេះទៅជាទូរទស្សន៍ឆ្លាតវៃដោយមិនចាំបាច់ភ្ជាប់ទៅប្រភពផ្សេងៗឡើយ។ វាមានទំហំអេក្រង់សរុប ៣២អ៊ីញជាមួយនឹងកម្រិតភាពច្បាស់ UHD ហើយអ្នកក៏ទទួលបានតេលេបញ្ជាឥតខ្សែផងដែរ ដែលស្រដៀងទៅនឹងតេលេទូរទស្សន៍ Samsungនោះដែរ។

ចុងក្រោយគឺ Samsung S8 ដែលត្រូវបានរចនាឡើងសម្រាប់ការបង្កើតមាតិកា។ វាមានទំហំ៣២អ៊ីញ និង២៧អ៊ីញជាមួយនឹងកម្រិតភាពច្បាស់ UHD និងជាម៉ូនីទ័រដំបូងគេលើពិភពលោកដែលត្រូវបានបញ្ជាក់ថាគ្មានពន្លឺចាំង ទទួលស្គាល់ដោយក្រុមហ៊ុន Underwriters Laboratories។ អេក្រង់ S8 មានលក្ខណៈពិសេសអាចបង្ហាញពណ៌ DCI-P3 ដល់ទៅ98% មុខងារ VESA DisplayHDR 600 (សម្រាប់ម៉ូឌែលទំហំ 32អ៊ីញ) និងមានរន្ធសម្រាប់ភ្ជាប់ LANទៀតផង។ វាមានរន្ធ USB-C ដែលអាចប្រើសម្រាប់ភ្ជាប់ទៅកុំព្យូទ័រយួរដៃ ឬដើម្បីបញ្ជូនរូបភាព និងសំឡេងទៅកាន់អេក្រង់ផង សម្រាប់ភ្ជាប់អ៊ីនធឺណិតផង និងសម្រាប់ប្រើជារន្ធសាកថាមពល 90W ពីអេក្រង់ទៅកុំព្យូទ័រយួរដៃផងក្នុងពេលតែមួយ។

គួរបញ្ជាក់ផងដែរថាអេក្រង់ទាំង៣ខាងលើនឹងត្រូវដាក់បង្ហាញជាផ្លូវការនៅដើមឆ្នាំ 2022 នៅក្នុងព្រឹត្តិការណ៍ CES 2022 ដែលមានកាលបរិច្ឆេទថ្ងៃទី៥ ដល់ទី៧ ខែមករា ឆ្នាំ២០២២នៅទីក្រុង Las Vegas៕