- 2021-07-06 02:41:44
- ព័ត៌មាន
ឡានប្រណីត ៤កៅអី ៣ម៉ូដែល ត្រូវម៉ាច់អ្នកចង់បានកម្រិតផាសុកភាពលំដាប់ផ្កាយ៥
- 2021-07-06 02:41:44
- ចំនួនមតិ 0 | ចំនួនចែករំលែក 0
ឡានប្រណីត ៤កៅអី ៣ម៉ូដែល ត្រូវម៉ាច់អ្នកចង់បានកម្រិតផាសុកភាពលំដាប់ផ្កាយ៥
ចន្លោះមិនឃើញ
រថយន្តប្រណីតមានកៅអីអង្គុយតែ ៤ គឺមានច្រើនជម្រើសណាស់នៅលើទីផ្សារបច្ចុប្បន្ន។ ប៉ុន្តែយើងដឹងហើយថាមនុស្សភាគច្រើនចង់បានរថយន្តដែលធន់មិនងាយខូច ដូច្នេះហើយពួកគេតែងតែគិតដល់ម៉ាកយីហោរបស់ជប៉ុន។ ជាក់ស្តែងក្រុមហ៊ុន Toyota និង Lexus ក៏មានរថយន្តប្រណីត ៤ កៅអីដែរ ទោះបីជាខ្លះមិនមែនចេញពីរោងចក្រមកផ្ទាល់ក៏ដោយ។
ខាងក្រោមនេះគឺជារថយន្តប្រណីត ៤កៅអី ៣ម៉ូដែល ដែលត្រូវម៉ាច់ចំពោះអ្នកចង់បានកម្រិតផាសុកភាពលំដាប់ផ្កាយ៥៖
១) Lexus LM
Lexus LM ត្រូវបានបង្ហាញខ្លួននៅលើទីផ្សារប្រទេសកម្ពុជា កាលពីពាក់កណ្តាលឆ្នាំ២០២០ កន្លងទៅនេះ ដែលមានទាំងជម្រើស ៤កៅអី និង ៧កៅអី។ ប៉ុន្តែប្រភេទ ៤កៅអីគឺផ្តល់នូវប្រណីតភាព និងកម្រិតផាសុកភាពខ្លាំងបំផុត ព្រោះតែវាមានបំពាក់កៅអីធំនៅខាងក្រោយ ដែលមានមុខងារក្តៅត្រជាក់ និងម៉ាស្សា ព្រមទាំងសល់ទំហំធំទូលាយ ងាយស្រួលសណ្តូកជើង ខណៈកន្លែងអ្នកបើកបរ និងកៅអីជួរទី២ ត្រូវបានខណ្ឌចែកដោយជញ្ជាំងដែលមានបំពាក់អេក្រង់ដ៏ធំ ទំហំ ២៦អ៊ីញទៀតផង។
មិនតែប៉ុណ្ណោះ នៅប្លុកកៅអីជួរទី២ ក៏មានទូរទឹកកក ចំណុះ ១៤លីត្រ និងប្រព័ន្ធសំឡេង Mark Levinson ដែកជួយឲ្យការធ្វើដំណើរជិតឆ្ងាយរបស់អ្នកមិនជិនណាយ។
២) Lexus LX570 Supersport MBS
តាមធម្មតា Lexus LX570 គឺជា SUV ទំហំធំដែលផ្តល់ជម្រើសកៅអីអង្គុយដល់ ៨ ឬ ៣ជួរ។ ទោះជាយ៉ាងណាក៏ដោយ Lexus LX570 Supersport MBS ទទួលបានការកែច្នៃ ដោយក្នុងនោះបានផ្លាស់ប្តូរកៅអីជួរទី២ ថ្មី និងដកកៅអីជួរទី៣ ចេញ។
ការដកកៅអីអង្គុយចេញមួយជួរ ធ្វើឲ្យកៅអីអង្គុយជួរទី២ កាន់តែមានទំហំធំទូលាយជាងមុន អាចបត់បែនមួយគាប់ចិត្ត។ នៅផ្នែកកណ្ដាលនៃកៅអីអង្គុយខាងក្រោយក៏មានកន្លែងសម្រាប់ដាក់ដៃដ៏ធំ និងមានប៊ូតុងសម្រាប់បញ្ជាមុខងារផ្សេងៗទៀតផង។ អ្វីដែលរឹតតែពិសេស កៅអីខាងក្នុងរបស់វាគឺជាប្រភេទស្បែក German Nappa Leather ជាមួយនឹងថ្នេរដេររាងគ្រាប់ពេជ្រ។ គ្រប់កៅអីសុទ្ធតែមានមុខងារម៉ាស្សា កម្តៅ និង បញ្ចេញខ្យល់ត្រជាក់មកជាមួយផងដែរ។
ថ្វីបើដកកៅអី និងកែប្រែចំណុចមួយចំនួនក្នុងកាប៊ីនខុសពី LX 570 ធម្មតាមែន ប៉ុន្តែរថយន្តប្រភេទពិសេសនេះនៅតែប្រើប្រាស់ម៉ាស៊ីនចំណុះ ៥,៧ លីត្រ ទំហំស៊ីឡាំង ៨ មានកម្លាំង ៣៦៧ សេះ និងប្រើប្រអប់លេខអូតូ ៨ វគ្គដដែល។
៣) Toyota Land Cruiser VXS MBS
រថយន្ត Toyota Land Cruiser VXS MBS ក៏ទទួលបានការកែច្នៃ ស្រដៀងទៅនឹងរថយន្ត Lexus LX570 Supersport MBS ដែរ ដោយដកកៅអីជួរទី៣ ចេញ និងផ្លាស់ប្តូរកៅអីជួរទី២ ថ្មី ធ្វើឲ្យកៅអីអង្គុយជួរទី២ កាន់តែមានទំហំធំទូលាយជាងមុន អាចបត់បែនបានមួយគាប់ចិត្តដែរ។ ជាមួយគ្នានេះដែរ កៅអីទាំង៤ របស់វាសុទ្ធតែមានមុខងារម៉ាស្សា និងបញ្ចេញខ្យល់ក្តៅត្រជាក់ និងជាប្រភេទស្បែក German Nappa Leather។
មិនខុសពី Lexus LX570 Supersport MBS ឡើយ រថយន្ត Toyota Land Cruiser VXS MBS នៅតែប្រើម៉ាស៊ីនដដែល គឺ ចំណុះ ៥,៧លីត្រ ទំហំ ៨ស៊ីឡាំង មានកម្លាំង ៣៨១សេះ ហើយប្រើប្រអប់លេខអូតូ ៨វគ្គ និងប៉ុងពីរ៕