ថ្វីបើមានការពន្យាពេលជាយូរមកក្តី ប៉ុន្តែរថយន្ត Tesla Roadster ជំនាន់ទី២ នឹងបង្ហាញខ្លួនជាផ្លូវការ ក្នុងពេលឆាប់ៗខាងមុខនេះ។ យ៉ាងណាក៏ដោយ វាមិនមែនជារថយន្តអាទិភាពដែល លោក Elon Musk ត្រូវប្រញាប់បញ្ចេញនោះទេ ដោយសារតែវាមានតម្លៃថ្លៃ។

• ចុច Subscribe ឆានែល Telegram របស់ Sabay ដើម្បីទទួលបានព័ត៌មានថ្មីៗទាន់ចិត្ត

គួររំលឹកឲ្យដឹងថា រថយន្ត Tesla Roadster បានបង្ហាញខ្លួនលើកដំបូង កាលពីចុងឆ្នាំ២០១៧។ បន្ទាប់មក លោក Musk បានប្រកាសថា រថយន្តស្ព័រអគ្គិសនីនេះ នឹងមាន Option ពិសេសមួយហៅថា "SpaceX Package” ដែលជួយឲ្យវាអាចបង្កើនល្បឿនចេញដេប៉ាកាន់តែលឿន។

ពីមុនមកគេបានដឹងថា រថយន្ត Tesla Roadster អាចជាន់ស្ទុះពីកុងទ័រ ០ ដល់ ១០០គីឡូម៉ែត្រក្នុងមួយម៉ោង ប្រើពេល ១,៩វិនាទី ដោយមិនមាន Option "SpaceX Package" ឡើយ។ ប៉ុន្តែថ្មីៗនេះគេបានប្រទះឃើញ រថយន្ត Roadster ដែលដាក់តាំងនៅសារមន្ទីរ Petersen Automotive Museum ក្នុងរដ្ឋ California សហរដ្ឋអាមេរិក ដោយក្នុងនោះក៏មានបង្ហាញពីល្បឿនរត់ស្ទុះថ្មីរបស់វាផងដែរ។

តាមរយៈការបញ្ជាក់ពីក្រុមហ៊ុន Tesla រថយន្ត Roadster ដែលបំពាក់ Option ពិសេស SpaceX Package នោះ នឹងអាចរត់ស្ទុះពីកុងទ័រ ០-១០០គីឡូម៉ែត្រក្នុងមួយម៉ោង ប្រើពេលត្រឹមតែ ១,១វិនាទីប៉ុណ្ណោះ។

សូមបញ្ជាក់ថា រថយន្ត Tesla Roadster ត្រូវបានគេរំពឹងថា នឹងមានតម្លៃចាប់ពី ២០០ ០០០ដុល្លារ សម្រាប់ប្រភេទ Base Model ខណៈប្រភេទ Founder's Series មានតម្លៃចាប់ពី ២៥០ ០០០ដុល្លារ។ ទោះជាយ៉ាងណាក៏ដោយ Tesla មិនទាន់បានបង្ហាញឲ្យដឹងពីតម្លៃ Option “SpaceX Package” នៅឡើយទេ៕