ក្រសួង បញ្ជាឲ្យក្រុមហ៊ុនអ៊ឺនធើណិត ត្រូវផ្តល់សេវាល្បឿនលឿនដូចផ្សាយពាណិជ្ជកម្មមែន!

2021-03-31 04:29:20
ព័ត៌មាន

2021-03-31 04:29:20
ចំនួនមតិ 0 | ចំនួនចែករំលែក 0

ចន្លោះមិនឃើញ

កាលពីពេលថ្មីៗនេះ ក្រសួងប្រៃសណីយ៍ និងទូរគមនាគមន៍កម្ពុជា បានចេញសេចក្តីប្រកាសបន្ទាន់មួយស្ដីអំពី វិធានការបង្កើនប្រសិទ្ធភាពនិងពង្រឹងគុណភាពសេវាទូរគមនាគមន៍ ។ សេចក្តីណែនាំនេះមានគោលបំណងលើកកម្ពស់ផលប្រយោជន៍សារធាណៈ និងការធ្វើអាជីវកម្មប្រកបដោយសុចរិតភាពនិងការទទួលខុសត្រូវសង្គម។

ក្រសួង ក៏បាននិងកំពុងខិតខំបញ្ចប់ការរៀបចំលិខិតបទដ្ឋានគតិយុត្តិពាក់ព័ន្ធការពង្រឹងគុណភាពសេវាទូរគមនាគមន៍ ការពិន័យអន្តរការណ៍ និងទណ្ឌកម្មផ្សេងៗចំពោះប្រតិបត្តិករ(ក្រុមហ៊ុនផ្តល់សេវាអ៊ឺនធើណិត) ដែលមិនគោរព ច្បាប់ស្ដីពីទូរគមនាគមន៍ស្ដីពីការផ្តល់សេវាប្រកបដោយគុណភាព។

រូបតំណាង

បច្ចុប្បន្ន ក្រសួងបាននិងកំពុងវាស់ស្ទង់គុណភាពសេវាទូរគមនាគមន៍នៅតាមតំបន់និមួយៗដើម្បីកំណត់ចំណុចខ្សោយ ឬបញ្ហានានាពាក់ព័ន្ធនឹងគុណភាពសេវានេះ ហើយក៏នឹងដាក់ចេញនូវវិធានការជាក់ស្ដែង។ បន្ថែមលើនេះ ក្រសួង ក៏នឹងតម្រូវឲ្យប្រតិបត្តិករ ឬក្រុមហ៊ុនផ្តល់សេវាអ៊ឺនធើណិត វិនិយោគលើហេដ្ឋារចនាសម្ព័ន្ធជាចាំបាច់ ក្នុងន័យ ចូលរួមសហការជាមួយស្ថាប័នពាក់ព័ន្ធដើម្បីសម្របសម្រួលឲ្យមានប្រសិទ្ធភាពខ្ពស់។

ទោះជាយ៉ាងនេះក៏ដោយ ដើម្បីសម្រេចបាននូវផែនការសកម្មភាពអទិភាពនៃកំណែទម្រង់វិស័យទូរគមនាគមន៍ តម្រូវឲ្យមានការចូលរួមពីភាគីពាក់ព័ន្ធដូចមានរៀបរាប់ខាងក្រោម៖ ទី ១ ប្រតិបត្តិករទូរគមនាគមន៍ (ក្រុមហ៊ុនផ្តល់សេវាអ៊ឺនធើណិត) ទី ២ គឺម្ចាស់បុរីនិងអគារខ្ពស់ និងទី៣ គឺប្រជាពលរដ្ឋ។

សម្រាប់ប្រតិបត្តិករទូរគមនាគមន៍ (ក្រុមហ៊ុនផ្តល់សេវាអ៊ឺនធើណិត)៖

-ត្រូវគោរពច្បាប់ស្ដីពីទូរគមនាគមន៍និងលិខិតបទដ្ឋានគតិយុទ្ធឲ្យបានខ្ជាប់ខ្ចួន

-ត្រូវសិក្សានិងអាប់ដែត(ធ្វើបច្ចុប្បន្នភាព) ផែនការសាងសង់ស្ថានីយ៍អង់តែននៅតាមទីតាំងភូមិសាស្រ្ត ឆ្លើយតបនឹងចំនួននៃអ្នកប្រើប្រាស់ ហើយក៏ត្រូវផ្ញើរផែនការនេះមកក្រសួងផងដែរ។

-ត្រូវស្នើសុំការមកក្រសួង មុនសាងសង់ស្ថានីយ៍អង់តែន និងបណ្ដាញទូរគមនាគមន៍ ស្របតាមមាត្រា ១៤ និង ១៧ នៃច្បាប់ស្ដីពីទូរគមនាគមន៍

-ត្រូវស្នើសុំការអនុញ្ញាតនាំចូល-ចេញ ផ្គត់ផ្គង់ចែកចាយនិងវិញ្ញាបនប័ត្រទទួលស្គាល់យថាប្រភេទនៃបរិក្ខារទូរគមនាគមន៍មកកាន់ក្រសួង ស្របតាមមាត្រា ១៤,១៥ និង១៦ នៃច្បាប់ស្ដីពីទូរគមនាគមន៍

-ត្រូវមានថាមពលអគ្គិសនីគ្រប់គ្រាន់ និងមានប្រភពអគ្គិសនីត្រៀមបំរុងតាមស្ថានីយ៍អង់តែននីមួយៗ

-ជៀសវាងការប្រើប្រាស់និងការតំឡើងឧបករណ៍ទូរគមនាគមន៍ដូចជា៖ ឧបករណ៍ក្លូន ឧបករណ៍ចាស់ ឬការតំឡើងផ្ទុយពីស្ដង់ដារបច្ចេកទេស ជាដើម។

-ត្រូវវៀបចំ និងកែសម្រួល Network Architecture ដោយមានសេណារីយ៉ូត្រៀមបំរុងធានាស្ថិរភាពខ្ពស់ពេលផ្តល់សេវា

-ត្រូវពង្រឹងយន្តការថែទាំ តាមដាន ត្រួតពិនិត្យប្រតិបត្តិការរបស់ស្ថានីយ៍ផ្សាយសេវា (BTS/NodeB/ eNodeB) និងបណ្ដាញតភ្ជាប់ជាប្រចាំ ព្រមទាំងត្រូវពង្រឹកសមត្ថភាពនៃស្ថានីយ៍ផ្សាយសេវា និងបណ្ដាញតភ្ជាប់ ជៀសវាងការកាត់ផ្ដាច់ ឬការកកស្ទះជាយថាហេតុ។

-ត្រូវជួសជុលឲ្យបានទាន់ពេលវេលាលើការប៉ះពាល់ដល់ខ្សែកាប្លិ៍អុបទិកក្រោមដី ដែលបណ្ដាលមកពីការស្ថាបនាឬការពង្រីកផ្លូវជាដើម។

-ត្រូវផ្តត់ផ្គង់សេវាអ៊ឺនធើណិតស្របតាមស្ដង់ដាបច្ចេកទេស (Sharing Factor) ទៅឲ្យអ្នកប្រើប្រាស់ដោយមិនត្រូវលើសចំណុះសមត្ថភាពដែលខ្លួនមាន(Capacity)

-ត្រូវបញ្ជាក់ទំហំទិន្នន័យនិងតម្លៃឲ្យបានច្បាស់លាស់ក្នុងពេលផ្សាយពាណិជ្ជកម្ម ដោយឈរលើគោលការណ៍សុចរិតភាពនិងស្មោះត្រង់

-មិនត្រូវផ្គត់ផ្គង់សេវាអ៊ឺនធើណិតដែលមានល្បឿនទាបជាងកញ្ចប់សេវាអ៊ឺនធើណិតដែលខ្លួនបានផ្សព្វផ្សាយពាណិជ្ជកម្មអំឡុងពេលលក់ទៅកាន់អ្នកប្រើប្រាស់។

២.សម្រាប់ម្ចាស់បុរីនិងអគារខ្ពស់

-មិនត្រូវចុះកិច្ចសន្យាផ្តល់សិទ្ធផ្តាច់មុខដល់ប្រតិបត្តិករ(ក្រុមហ៊ុនអ៊ឺនធើណិត) ដើម្បីផ្តល់សេវាទូរសព្ទនិងសេវាអ៊ឺនធើណិតក្នុងទីតាំងបុរី ឬអគារខ្ពស់ ផ្ទុយពីគោលការណ៍ប្រកួតប្រជែងស្មោះត្រង់ ស្មើភាពនិងស្របច្បាប់

-ត្រូវរៀបចំទីតាំងបម្រុងទុកសម្រាប់សាងសង់ស្ថានីយ៍អង់តែនក្នុងបុរី ឬរៀបចំបង្គោលភ្លើងមានលទ្ធភាពបំពាក់ឧបករណ៍ផ្តល់សេវាទូរគមនាគមន៍។

-ត្រូវសហការជាមួយប្រតិបត្តិករ(ក្រុមហ៊ុនអ៊ឺនធើណិត) ដើម្បីបំពាក់ប្រព័ន្ធផ្តល់សេវាក្នុងអគារ (In-builing Solutions)

-ត្រូវចាត់ទុកថា សេវាទូរគមនាគមន៍គឺជាសេវាចាំបាច់ដូចគ្នានឹងសេវាអគ្គិសនីនិងទឹកដែរ។

៣.សម្រាប់ប្រជាពលរដ្ឋ

-មិនត្រូវរារាំងការសាងសង់ស្ថានីយ៍អង់តែនលើទីតាំងរបស់កម្មសិទ្ធករដទៃ ដោយយកហេតុផលប៉ះពាល់សុខភាពមកសំអាងនោះទេ។ ការរារាំងនេះជាអំពើល្មើសច្បាប់ មានចែងក្នុងច្បាប់និងលិខិតបទដ្ឋានគតិយុត្តជាធរមាន

-គួរប្រើប្រាស់ Smrtphone មានគុណភាព ស្ដង់ដារបច្ចេកទេស និងម៉ាកសម្គាល់ច្បាស់លាស់ ដើម្បីធានាដល់ការ តភ្ជាប់សេវាងាយស្រួល និងពុំមានបញ្ហាឬប្រឈមនឹងហានិភ័យដល់សុខភាពនិងអាយុជីវិត។

-គួរពិនិត្យល្បឿនអ៊ឺនធើណិតរបស់ខ្លួនឲ្យបានទៀងទាត់ ដើម្បីប្រាកដថា ចំណុះល្បឿននោះពិតជាត្រឹមត្រូវដូចទៅនឹងកញ្ចប់សេវាដែលខ្លួនបានជាវពីប្រតិបត្តិករ(ក្រុមហ៊ុនអ៊ឺនធើណិត)

-ត្រូវបញ្ឈប់ការដំឡើងនិងការប្រើប្រាស់គ្រឿងសម្ភារៈបរិក្ខារវិទ្យុគមនាគមន៍ទទួល ឬផ្សាយបន្តនិងឧបករណ៍ពង្រឹកសេវាដោយខុសច្បាប់

-អង្គការសុខភាពពិភពលោក(WHO)ក៏បានបញ្ចាក់យ៉ាងច្បាស់ថា រលកប្រេកង់វិទ្យុមិនបង្កឲ្យមានផលប៉ះពាល់ដល់សុខភាពរបស់អ្នករស់នៅជុំវិញទេ។ ការសាយភាយនៃរលកប្រេកង់វិទ្យុពីស្ថានីយអង់តែន មិនមែនជាការសាយភាយរលកវិទ្យុសកម្មនោះទេ។ គ្រប់ប្រទេសលើពិភពលោកក៏បានសាងសង់និងប្រើប្រាស់ស្ថានីយ៍អង់តែន ដើម្បីផ្តល់សេវាទូរគមនាគមន៍ដូចប្រទេសកម្ពុជា ដែរ។ ប្រសិនបើគ្មានអង់តែន ក៏មិនអាចមានសេវាទូរសព្ទចល័តដែរ ដូចនេះប្រសិនបើមានផលប៉ះពាល់ដល់សុខភាព ប្រទេសទាំងអស់នឹងពុំមានអង់តែនទេ។

-ក្នុងនាមជាអ្នកប្រើប្រាស់សេវាទូរគមនាគមន៍ ត្រូវសហការនិងរាយការណ៍ពីបាតុភាពនានាពាក់ព័ន្ធនឹងគុណភាពសេវា មានដូចជា ភាពមិនគ្រប់គ្រាន់នៃវិសាលភាពគ្របដណ្ដប់(ដែនសេវា) នៅតាមទីតាំងនានា ទៅកាន់ភ្នាក់ងារបម្រើសេវាអតិថិជនរបស់ក្រុមហ៊ុនអឺនធើណិត តាមរយៈលេខទូរសព្ទដូចមានក្នុងបញ្ជីជូនជាមួយ។ សម្រាប់ព័ត៌មានបន្ថែមអ្នកប្រើប្រាស់សេវាទូរគមនាគមន៍អាចទាក់ទងមកនិយ័តករទូរគមនាគមន៍កម្ពុជា តាមរយៈលេខ ១២៧២ នៅរៀងរាល់ម៉ោងធ្វើការឥតគិតថ្លៃ។

ចង់ដឹងច្បាស់បន្ថែមសូមអានសេចក្តីណែនាំខាងក្រោម៖