- 2021-02-10 02:52:19
- ព័ត៌មាន
ឃើញលើ iOS 14 ដូចទំនង Google សម្រេចចម្លងតាមដាក់លើ Android 12
- 2021-02-10 02:52:19
- ចំនួនមតិ 0 | ចំនួនចែករំលែក 0
ឃើញលើ iOS 14 ដូចទំនង Google សម្រេចចម្លងតាមដាក់លើ Android 12
ចន្លោះមិនឃើញ
Google ត្រូវបានគេរំពឹងថានឹងបង្ហាញចេញប្រព័ន្ធប្រតិបត្តិការ Android ជំនាន់ថ្មីគឺ Android 12 នៅក្នុងពេលតែប៉ុន្មានសប្ដាហ៍ទៀតប៉ុណ្ណោះ។ មុន Android 12 បង្ហាញវត្តមាន វិបសាយ XDA Developers បានចែករំលែករូបភាព Screenshot មួយចំនួន ដែលបង្ហាញអំពីចំណុចថ្មីខ្លះៗនៃប្រព័ន្ធប្រតិបត្តិការថ្មី។
តាមរយៈរូបភាព Screenshot អ្នកដែលកំពុងតែប្រើប្រាស់ប្រព័ន្ធប្រតិបត្តិការ iOS 14 អាចនឹងកត់សម្គាល់ចំណុចស្រដៀងគ្នាមួយចំនួនរវាងការអាប់ដេតថ្មីចុងក្រោយរបស់ Apple និងប្រព័ន្ធប្រតិបត្តិការដែលថ្មីដែលត្រៀមបង្ហាញចេញរបស់ Google។
នៅលើ iOS 14 ក្រុមហ៊ុន Apple បានបន្ថែមសញ្ញាចុចតូចមួយទៅក្នុងរបារផ្ដល់ដំណឹងផ្នែកខាងលើ ដើម្បីឲ្យអ្នកប្រើប្រាស់ដឹងពេលដែលរន្ធស្រូបសំឡេង ឬកាមេរ៉ាលើឧបករណ៍របស់ពួកគេបានដំណើរការ ហើយនៅលើ Android 12 មើលទៅដូចមានបន្ថែមចំណុចពិសេសស្រដៀងគ្នានេះមកជាមួយ។
លើ Android 12 នៅពេលដែលកាមេរ៉ា ឬរន្ធស្រូបសំឡេងបានដំណើរការ នឹងឃើញមានរបារពណ៌បៃតងមានរូបសញ្ញាកាមេរ៉ា ឬរន្ធស្រូបសំឡេងនៅផ្នែកលើខាងស្ដាំ ហើយក្រោយមកវានឹងផ្លាស់ប្ដូរទៅជាសញ្ញាចុចពណ៌បៃតង ហើយពេលដែលចុចលើសញ្ញាចុចពណ៌បៃតងនេះ វានឹងបង្ហាញចេញផ្ទាំងមួយដែលបង្ហាញព័ត៌មានលម្អិតបន្ថែមទៀត។
Apple ទំនងជាមិនអន់ចិត្តនោះទេ ពេលដែលឃើញ Google ដើរតាមគន្លងរបស់ខ្លួនក្នុងការផ្ដល់ការបញ្ជាពេញទីលើភាពឯកជនដល់អ្នកប្រើប្រាស់ ដោយសារនាយកជាន់ខ្ពស់របស់ Apple ធ្លាប់និយាយច្រើនលើកមកហើយថា ត្រង់ចំណុចការពារភាពឯកជននេះ Apple រីករាយដែលឃើញគូប្រកួតប្រជែងចម្លងស្នាដៃរបស់ខ្លួន៕
