- 2021-01-05 02:15:19
- ព័ត៌មាន
ហេតុផលដែល Facebook ដឹងចិត្តអ្នកប្រើ រឿងពាណិជ្ជកម្មដែលត្រូវបង្ហាញឲ្យឃើញ
- 2021-01-05 02:15:19
- ចំនួនមតិ 0 | ចំនួនចែករំលែក 0
ហេតុផលដែល Facebook ដឹងចិត្តអ្នកប្រើ រឿងពាណិជ្ជកម្មដែលត្រូវបង្ហាញឲ្យឃើញ
ចន្លោះមិនឃើញ
បណ្ដាញសង្គម Facebook ជាទីកន្លែងដ៏ធំបំផុតមួយ ផ្ទុកដោយមនុស្សជាច្រើនទូទាំងពិភពលោក និងបើកឱ្យប្រើបា្រស់ដោយសេរីឥតគិតថ្លៃ។ មិនគិតថ្លៃក៏ពិតមែន ប៉ុន្ដែទិន្នន័យរបស់អ្នកប្រើប្រាស់គ្រប់រូប គឺជាអ្វីដែលពួកគេចង់បាន និងយកទៅច្នៃបន្តក្លាយជាលុយពាន់លានដុល្លារ តាមការផ្សព្វផ្សាយពាណិជ្ជកម្មដ៏ច្រើនសន្ធឹកសន្ធាប់របស់ពួកគេ។
ទិន្នន័យរបស់អ្នកប្រើប្រាស់មានអ្វីខ្លះ និងមានប្រយោជន៍អ្វីខ្លះ ទើប Facebook បង្កើតលុយពីវាបានច្រើនបែបនេះ? អ្នកប្រើបណ្ដាញសង្គមមួយនេះ ត្រូវមានគណនីផ្ទាល់ខ្លួនដើម្បីប្រើប្រាស់បាន ហើយសកម្មភាពរបស់ពួកគេរាល់ថ្ងៃនោះហើយ គឺជាទិន្នន័យដែល Facebook ចង់បាន រួមមានដូចជា៖ ការចុចប៊ូតុង Like, ក្រុម (Group) ដែលពួកគេចូលរួម, ទំនាក់ទំនង (Relationship Status), មុខរបរ ឬសាលារៀនអ្នកធ្លាប់បានរៀន និងផ្ទាំងពាណិជ្ជកម្មដែលពួកគេឧស្សាហ៍ចុចជាដើម។
ប្រភពទិន្នន័យទាំងនេះហើយ ធ្វើឱ្យ Facebook ស្គាល់ និងដឹងពីចំណង់ចំណូលចិត្តអ្នកប្រើប្រាស់កាន់តែច្បាស់ បន្ទាប់មក Facebook នឹងបង្ហាញផ្ទាំងពាណិជ្ជកម្មផ្សេងៗឲ្យត្រូវតាមចំណូលចិត្តអ្នកប្រើប្រាស់ដើម្បីឲ្យការផ្សព្វផ្សាយមានប្រសិទ្ធភាពខ្ពស់។
ដើម្បីដឹងថា Facebook បានសិក្សាពីចំណង់ចំណូលអ្វីខ្លះ និងតាមរបៀបណាពីអ្នក អាចចូលទៅកាន់មុខងារតាម Facebook > Setting > Ads > Ad Preferences ឬចូលតាមតំណរលីង៖ https://www.facebook.com/adpreferences/ad_settings។
ប៉ុន្ដែទិន្នន័យទាំងនេះហាក់មិនទាន់គ្រប់គ្រាន់នោះទេ ដើម្បីឱ្យផ្ទាំងពាណិជកម្មបង្ហាញត្រូវនឹងចិត្តរបស់អ្នកប្រើបំផុត គឺពួកគេត្រូវដឹងបន្ថែមទៀត។ ដូចជា រាល់ថ្ងៃតើអ្នកចូលចិត្តប្រើកម្មវិធីមួយណា ឧស្សាហ៍ទិញអ្វីលើគេហទំព័រ ស្វែងរកអ្វីខ្លះជាប្រចាំ តែងប្រើសេវាកម្មណាមួយឬអត់ក្នុងស្មាតហ្វូនរបស់អ្នក។
អ្នកអាចកត់សម្គាល់ឃើញថា បើប៉ុន្មានថ្ងៃនេះ អ្នកតែងស្វែងរកពីដំណើរកម្សាន្តទៅក្រៅប្រទេសតាមកម្មវិធីដទៃ នោះអ្នកអាចនឹងទទួលផ្ទាំងពាណិជ្ជកម្មពី Facebook អំពីជើងហោះហើរទៅក្រៅប្រទេស ឬកម្មវិធីបញ្ចុះតម្លៃដើរលេងក្រៅប្រទេសអ៊ីចឹងទៅ។
ថ្វីត្បិតថាជាចំណុចល្អ ធ្វើឱ្យអតិថិជនទទួលការផ្សាយពាណិជ្ជកម្មតាមដែលពួកគេចង់បាន តាមការចូលចិត្ត និងចំគោលដៅ ប៉ុន្ដែជាចំណុចរសើបមួយ គឺ Facebook បានតាមដានទិន្នន័យរបស់អ្នកប្រើប្រាស់ហួសពីព្រំដែនរបស់ខ្លួន បើទោះបីជាអ្នកកំពុងបើកកម្មវិធីអ្វីផ្សេង ធ្វើអ្វីនោះ ក៏ក្រុមហ៊ុនមួយនេះបានដឹងផងដែរ។
ដោយរងការរិះគន់ច្រើននោះ Facebook ក៏បន្ថែមមុខងារថ្មីមួយ មានឈ្មោះថា Off-Facebook Activity ដើម្បីឲ្យអ្នកប្រើប្រាស់មានសិទ្ធកាត់ផ្ដាច់ការតាមដានទិន្នន័យហួសព្រំដែននេះ។ អ្នកអាចកំណត់បិទមុខងារ Off-Facebook Activity មិនឱ្យមានការតាមដានទិន្នន័យរបស់អ្នកក្រៅពីកម្មវិធី Facebook បាន ដោយចូលទៅកាន់៖ Setting > Off-Facebook Activity > Turn Off future activity > Manage Future Activity ត្រង់ចំណុច Future Off-Facebook Activity ទាញប៊ូតុងបិទជាការស្រេច។
ប៉ុន្ដែនៅពេលអ្នកបិទមុខងារនេះ អ្នកក៏ត្រូវដឹងមុនថា ផ្ទាំងផ្សាយពាណិជ្ជកម្មរបស់ Facebook នាពេលខាងមុខ នឹងមិនដឹងច្បាស់ពីចំណង់ចំណូលចិត្តរបស់អ្នកដូចមុនទៀតនោះទេ៕