ជប៉ុនឲ្យឃើញសំណាកមួយថតទៀត ក្នុងប្រអប់ផ្ទុកសំណាកអាចម៍ផ្កាយ

2020-12-28 02:23:56
ព័ត៌មាន

2020-12-28 02:23:56
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រោយពីយានអវកាស Hayabusa2 បានវិលត្រឡប់មកផែនដីវិញ ទីភ្នាក់ងារអវកាសជប៉ុន JAXA បានបង្ហាញអំពីសំណាកមួយចំនួនដែលខ្លួនប្រមូលបានពីអាចម៍ផ្កាយ Ryugu។ សំណាកទាំងនោះគឺចេញពីថត "A” នៃប្រអប់ដាក់សំណាកអាចម៍ផ្កាយ ដែលមានន័យថាវាត្រូវប្រមូលបានក្នុងបេសកកម្មចុះចតលើកដំបូងកាលពីខែកុម្ភៈ ឆ្នាំ ២០១៩។

ថត A និងថត C

នាពេលនេះ JAXA បានបញ្ចេញរូបភាពដែលបង្ហាញអំពីសំណាកនៃថត "C” ដែលពួកគេបានបើកវាចេញកាលពីថ្ងៃទី២១ ខែធ្នូកន្លងទៅ។ JAXA បានឲ្យដឹងថាពួកគេបានបើកមើលទាំងថត B និង C ប៉ុន្តែក្នុងថត B មិនមានសំណាកអ្វីនោះទេដោយសារមិនត្រូវបានប្រើប្រាស់ ប៉ុន្តែថត C ត្រូវបានប្រើប្រាស់ដើម្បីប្រមូលយកសំណាកអំឡុងបេសកកម្មចុះចតលើកទីពីររបស់យាន Hayabusa កាលពីខែកក្កដា ឆ្នាំ ២០១៩។

ក្នុងបេសកកម្មលើកទីពីរ JAXA បានបញ្ចេញកម្លាំងបំផ្ទុះលើអាចម៍ផ្កាយ មុនចុះប្រមូលយកសំណាក ដើម្បីបង្កើតជារណ្ដៅនិងអាចប្រមូលយកសំណាកពីទីជ្រៅជាងមុន។ អ្នកវិទ្យាសាស្ត្រសង្ឃឹមថាសំណាកនៃអាចម៍ផ្កាយ នឹងអាចផ្ដល់តម្រុយបានកាន់តែច្រើនអំពីការកកើតនៃប្រព័ន្ធព្រះអាទិត្យ ។

JAXA បាននិយាយថាបំណែកធំជាងគេមួយនៅក្នុងថត C ដែលមានដាក់សញ្ញាព្រួញចង្អុលចំ គឺជាបំណែកមួយដែលគេមិនទាន់អាចបញ្ជាក់បាននៅឡើយថាវាមានប្រភពចេញពីណា ប៉ុន្តែភ្នាក់ងារនេះជឿថាវាអាចជាបំណែកអាលុយមីញ៉ូមដែលបែកចេញពីយានពេលប្រើប្រាស់កម្លាំងបំផ្ទុះលើផ្ទៃអាចម៍ផ្កាយ Ryugu៕

ប្រភព៖ engadget ប្រែសម្រួល៖ សុខហេង