- 2020-12-15 07:51:22
- ព័ត៌មាន
ទីបំផុតជប៉ុនបើកហឹបដាក់សំណាកអាចម៍ផ្កាយ ជាលើកដំបូង
- 2020-12-15 07:51:22
- ចំនួនមតិ 0 | ចំនួនចែករំលែក 0
ទីបំផុតជប៉ុនបើកហឹបដាក់សំណាកអាចម៍ផ្កាយ ជាលើកដំបូង
ចន្លោះមិនឃើញ
សំណាកអាចម៍ផ្កាយដែលយានអវកាសជប៉ុនឈ្មោះ Hayabusa2 បានជីកយកពីអាចម៍ផ្កាយឈ្មោះ Ryugu ដែលស្ថិតនៅចម្ងាយប្រមាណ ៣០០លានគីឡូម៉ែត្រពីភពផែនដី ត្រូវបានភ្នាក់ងារអវកាសជប៉ុន JAXA បើកជាលើកដំបូង។
យានអវកាស Hayabusa2 ជាយានដេញតាមអាចម៍ផ្កាយមួយ ដែលបានចំណាយពេល ១៦ខែ ធ្វើដំណើរគោចរជុំវិញអាចម៍ផ្កាយ Ryugu នៅចន្លោះឆ្នាំ ២០១៨ និងឆ្នាំ ២០១៩។ នាចន្លោះពេលនេះយាន Hayabusa2 បានធ្វើការបន្ទាបខ្លួនលើផ្ទៃអាចម៍ផ្កាយចំនួនពីរដង ដើម្បីប្រមូលយកថ្ម និងកម្ទេចពីអាចម៍ផ្កាយ និងរក្សាទុកវាក្នុងហឹបដែលគេឲ្យឈ្មោះថា Tamatebako ដែលមានន័យថាហឹបកំណប់។
ក្រោយមកយាន Hayabusa2 បានដឹកជញ្ជូនហឹបកំណប់មកកាន់ផែនដីវិញនៅថ្ងៃទី៦ ខែធ្នូ ដោយបានចុះចតនៅប្រទេសអូស្ត្រាលី។ អ្នកវិទ្យាសាស្ត្ររបស់ JAXA បានស្វែងរកទីតាំងនៃហឹប និងដឹកជញ្ជូនវាទៅកាន់មន្ទីរពិសោធន៍មួយកន្លែង ដើម្បីស្វែងរកដាននៃឧស្ម័នក្នុងហឹប។ ការពិនិត្យមើលលើកដំបូងឃើញថាក្នុងហឹបមានសំណាកនៃឧស្ម័នមែន ប៉ុន្តែគេមិនច្បាស់ថាវាជាឧស្ម័នមកពីអាចម៍ផ្កាយ Ryugu ឬឧស្ម័នរបស់ផែនដីនោះទេ។
នៅថ្ងៃចន្ទនេះភ្នាក់ងារ JAXA បានបង្ហាញថាឧស្ម័នក្នុងហឹបគឺជាឧស្ម័នមកពី Ryugu ដោយបញ្ជាក់ថាវាមានប្រភពចេញពីលំហអាកាសខាងក្រៅ។ នេះជាលើកដំបូងហើយដែលគេអាចប្រមូលបានសំណាកឧស្ម័នពីលំហអាកាសជ្រៅ។
មិនទាន់អស់នោះទេ ភ្នាក់ងារ JAXA ក៏បានបង្ហាញនូវភ័ស្ដុតាងច្បាស់ៗថាយាន Hayabusa2 ពិតជាជីកបានសំណាកអាចម៍ផ្កាយពិតៗពីអាចម៍ផ្កាយ Ryugu។ អ្នកវិទ្យាសាស្ត្រ JAXA ម្នាក់បានបង្ហាញអារម្មណ៍ភ្ញាក់ផ្អើលពេលបើកហឹបទៅឃើញថាទទួលបានសំណាកដែលមានបរិមាណច្រើនខុសពីការរំពឹងទុក។
អ្នកវិទ្យាសាស្ត្រជាច្រើនបានបង្ហាញការជឿជាក់ថាអាចម៍ផ្កាយបានកកើតឡើងនៅពេលដែលប្រព័ន្ធព្រះអាទិត្យទើបកកើតឡើងដំបូង ហើយសំណាកនៃអាចម៍ផ្កាយប្រហែលជាមានផ្ទុកនូវវត្ថុធាតុដែលអាចឲ្យគេដឹងកាន់តែច្បាស់អំពីការចាប់កំណើតរបស់ជីវិតលើភពផែនដី៕
