- 2020-08-28 07:56:21
- ព័ត៌មាន
Facebook ចង់ឲ្យអ្នកប្រើដឹង ប៉ុន្តែ Apple យល់ថាជារឿងមិនចាំបាច់
- 2020-08-28 07:56:21
- ចំនួនមតិ 0 | ចំនួនចែករំលែក 0
Facebook ចង់ឲ្យអ្នកប្រើដឹង ប៉ុន្តែ Apple យល់ថាជារឿងមិនចាំបាច់
ចន្លោះមិនឃើញ
កាលពីដើមខែមេសា Facebook បានប្រកាសពីមុខងារថ្មីមួយដែលអាចឲ្យអ្នកមានឥទ្ធិពលលើ Facebook ឬអាជីវកម្មនានាប្រារព្ធកម្មវិធីនៅលើ Facebook ជាប្រភេទអនឡាញ ដែលអ្នកប្រើប្រាស់ត្រូវបង់លុយដើម្បីចូលរួមបាន។
គួរដឹងថា Apple តែងគិតកម្រៃជើងសារជាធម្មតា ៣០% ចំពោះការចំណាយលុយទាំងអស់តាមរយៈកម្មវិធីលើ iOS ប៉ុន្តែ Facebook សង្ឃឹមថា Apple អាចនឹងលើកលែងចំពោះមុខងារមួយនេះ។ យ៉ាងណាក្ដី Apple មិនអាចលើកលែងឲ្យបាននោះទេ។
កាលពីថ្ងៃព្រហស្បតិ៍ Facebook បានប្រាប់សារព័ត៌មាន Reuters ថាខ្លួនមានបំណងចង់ប្រាប់អ្នកប្រើប្រាស់កម្មវិធី Facebook លើ iOS អំពីការកាត់កម្រៃពីខាង Apple ដើម្បីឲ្យអ្នកចំណាយលុយបានដឹងថាហេតុអ្វីទើបអ្នករៀបចំកម្មវិធីអាចទទួលបានចំណែកត្រឹម ៧០%។ ប៉ុន្តែ Apple បានហាមឃាត់ចំណុចនេះ ដោយចាត់ទុកថាវាជាព័ត៌មានដែលមិនពាក់ព័ន្ធ មិនជាចាំបាច់នោះទេ។
អ្នកនាំពាក្យរបស់ Facebook បាននិយាយថា ៖ "យើងគួរតែមានជម្រើស ឲ្យគ្រប់គ្នាបានយល់ថាលុយដែលពួកគេចង់ចំណាយលើអ្នកមានឥទ្ធិពល ឬអាជីវកម្មនានា ត្រូវបែងចែកទៅណាខ្លះ។ សោកស្ដាយណាស់ដែល Apple ប្រកែកមិនព្រមឲ្យយើងប្រាប់អំពីការកាត់កម្រៃ ៣០% របស់ពូកគេ ប៉ុន្តែយើងកំពុងសិក្សាធ្វើយ៉ាងណាឲ្យព័ត៌មាននេះមាននៅក្នុងកម្មវិធីបាន។”
Facebook បញ្ចេញមុខងារខាងលើនេះសម្រាប់អាជីវកម្មតូចៗ អ្នកមានគំនិតច្នៃប្រឌិត ឬបុគ្គលមានឥទ្ធិពលដែលជួបបញ្ហាក្នុងសម័យកូវីដ១៩ ដែលមានការហាមឃាត់ការជួបជុំគ្នា។ Facebook បានលើកឡើងថាខ្លួននឹងមិនគិតកម្រៃជើងសារលើមុខងារថ្មីនេះ រហូតដល់ឆ្នាំក្រោយ៕
