- 2020-04-20 01:26:37
- ព័ត៌មាន
រៀនតែតាម YouTube សោះ អាចបង្កើតវិបសាយតាមដានជំងឺកូវីដ១៩ មួយថ្ងៃមានអ្នកមើល ២៥លានដង
- 2020-04-20 01:26:37
- ចំនួនមតិ 0 | ចំនួនចែករំលែក 0
រៀនតែតាម YouTube សោះ អាចបង្កើតវិបសាយតាមដានជំងឺកូវីដ១៩ មួយថ្ងៃមានអ្នកមើល ២៥លានដង
ចន្លោះមិនឃើញ
យុវជនវ័យ ១៧ ឆ្នាំ ឈ្មោះ Avi Schiffmann ដែលរស់នៅកោះ Mercer Island ក្បែរទីក្រុង Seattle សហរដ្ឋអាមេរិក គឺជាម្ចាស់វិបសាយតាមដានអំពីសភាពការណ៍ជំងឺកូវីដ១៩មួយ ដែលមានអ្នកចុចមើលជាង ២៥ លានដងក្នុងមួយថ្ងៃ។
Schiffmann ដែលមានសញ្ជាតិអង់គ្លេស-អាមេរិក បានតាមដានជំងឺកូវីដ១៩ តាំងពីពេលដែលជំងឺនេះត្រូវគេរកឃើញដំបូង ពោលនៅអំឡុងចុងឆ្នាំ ២០១៩។ នៅពេលនោះគឺគេតាមដានព័ត៌មានតាមរយៈវិបសាយភាសាចិន។ អំឡុងពេលនោះដែរ Schiffmann មានគំនិតមួយដែលចោទសួរខ្លួនឯងថា ៖ "ហេតុអ្វីខ្ញុំមិនបង្កើតវិបសាយមួយជាភាសាអង់គ្លេស អាប់ដេតលើទិន្នន័យឲ្យមើលទៅមានភាពទាក់ទាញ?”
នៅថ្ងៃទី ២៩ ខែធ្នូ ពេលដែលជនជាតិអាមេរិកមួយចំនួនធំមិនសូវខ្វាយខ្វល់អំពីជំងឺកូវីដ១៩នៅឡើយ Schiffmann បានចាប់ផ្ដើមបង្កើតវិបសាយក្នុងបន្ទប់របស់ខ្លួន។ វិបសាយមានឈ្មោះថា nvoc2019.live ដែលមើលទៅមានភាពសាមញ្ញ និងបង្ហាញព័ត៌មានច្រើនមានដូចជាចំនួនអ្នកឆ្លង, ចំនួនអ្នកស្លាប់, ចំនួនអ្នកជាក្នុងប្រទេសនីមួយៗជាដើម។
វិបសាយដែលធ្វើការអាប់ដេតភ្លាមៗលើករណីជំងឺកូវីដ១៩នេះ គឺត្រូវបាន Schiffmann បង្កើតឡើងដោយពឹងផ្អែកលើចំណេះដឹងផ្នែកសរសេរកម្មវិធីដែលរូបគេរៀនតាមរយៈ YouTube និងអ៊ីនធឺណិតក្នុងរយៈពេល ១០ឆ្នាំកន្លងមកនេះ។ Schiffmann និយាយថា ៖ "ខ្ញុំមិនបានចូលរៀនវគ្គជំនាញសរសេរកម្មវិធីថ្លៃៗ ហើយក៏មិនបានរៀនសរសេរកម្មវិធីនៅសាលាណាដែរ។”
ប្រព័ន្ធដែល Schiffmann បង្កើតឡើងគឺអាចទុកចិត្តបានខ្ពស់ដោយសារបានប្រមូលយកទិន្នន័យពីប្រភពល្បីៗទូទាំងពិភពលោក មានដូចជាអង្គការសុខភាពពិភពលោក ឬ CDC របស់សហរដ្ឋអាមេរិកជាដើម។
ផ្អែកតាមការចុះផ្សាយរបស់ Telegraph បានឲ្យដឹងថាវិបសាយរបស់ Schiffmann មានចំនួនអ្នកចូលទស្សនាជាមធ្យមជាង ២៥ លានដងក្នុងមួយថ្ងៃ ដោយមានពាក់កណ្ដាលមានប្រភពពីសហរដ្ឋអាមេរិក ហើយ ៨០% គឺបើកចូលតាមទូរសព្ទដៃ។
ដោយសារជោគជ័យនៃវិបសាយនេះ មានក្រុមហ៊ុនជាច្រើនចាប់អារម្មណ៍ចង់ដាក់ផ្ទាំងពាណិជ្ជកម្មលើវិបសាយរបស់ Schiffmann។ ជារៀងរាល់ថ្ងៃរូបគេទទួលបានអ៊ីមែលប្រមាណ ៦ពាន់មកពីជុំវិញពិភពលោក ដែលសុំសហការដាក់ផ្ទាំងពាណិជ្ជកម្ម រួមមានសំណើដែលមានតម្លៃស្មើ ៨ លានដុល្លារទៀតផង។
យ៉ាងណាក្ដីយុវជនរូបនេះប្រកែកមិនទទួលដោយនិយាយថា ៖ "ខ្ញុំចង់លេងហ្គេមជាមួយមិត្តភ័ក្ដិ ចង់រីករាយនឹងវ័យរបស់ខ្ញុំ មិនចូលចិត្តសម្ពាធនៃការកាន់កាប់វិបសាយធំមួយក្នុងលោក។ ខ្ញុំអាចចូលនិវត្តន៍បានជាមួយលុយជាច្រើន ប៉ុន្តែខ្ញុំមិនទាន់ចង់នៅឡើយទេ ខ្ញុំចង់រីករាយនឹងវ័យ ១៧ ឆ្នាំរបស់ខ្ញុំ។ ខ្ញុំមិនទាន់ខ្វល់នឹងលុយនៅឡើយទេ៕”
