- 2020-03-31 03:01:00
- ព័ត៌មាន
លើកនេះ iPhone 11 និង Huawei P40 ប្រភេទតម្លៃធូរប៉ះគ្នាវិញម្ដង
- 2020-03-31 03:01:00
- ចំនួនមតិ 0 | ចំនួនចែករំលែក 0
លើកនេះ iPhone 11 និង Huawei P40 ប្រភេទតម្លៃធូរប៉ះគ្នាវិញម្ដង
ចន្លោះមិនឃើញ
Huawei P40 គឺជាប្រភេទ Flagship តម្លៃធូរជាងគេក្នុងចំណោមត្រកូល P40 ដែលទើបប្រកាសចេញ ដោយជាគូប្រជែងខ្លាំងក្លាមួយរបស់ iPhone 11 ដែលវាមានតម្លៃធូរជាងគេក្នុងចំណោមត្រកូល iPhone ជំនាន់ចុងក្រោយ។ តទៅនេះគឺជាការប្រៀបធៀបលក្ខណៈសម្បត្តិរវាង Huawei P40 និង iPhone 11 ៖
១. អេក្រង់
Huawei P40 មានបំពាក់អេក្រង់ OLED ទំហំ ៦,១ អ៊ីញ ដែលមានកម្រិតបង្ហាញ FHD+ មានចោះរន្ធរាងដូចគ្រាប់ថ្នាំលើអេក្រង់សម្រាប់បំពាក់កាមេរ៉ា Selfie មួយគ្រាប់ និងកាមេរ៉ា IR សម្រាប់មុខងារដោះសោដោយប្រើផ្ទៃមុខ។
ចំណែក iPhone 11 មានបំពាក់អេក្រង់ទំហំ ៦,១ អ៊ីញដូចគ្នា ប៉ុន្តែជាប្រភេទ Liquid Retina HD IPS LCD ដែលមានកម្រិតបង្ហាញ HD។ អេក្រង់នេះមានរចនាបថក្បាលឆកសម្រាប់បំពាក់កាមេរ៉ា Selfie មួយគ្រាប់ និងប្រព័ន្ធស្កេនមុខ FaceID ផងដែរ។
២. គ្រឿងក្នុង
Huawei P40 ទទួលបានកម្លាំងពីបន្ទះឈីប Kirin 990 ដែលមានភ្ជាប់មកជាស្រេចនូវ Modem 5G អាចទ្រាំទ្រនូវសេវា 5G និងមាន GPU Mali-G76។ បន្ទះឈីបនេះគឺភ្ជាប់ជាមួយ RAM ទំហំ ៨GB និងអង្គផ្ទុកទំហំ ១២៨GB ដែលមិនអាចពង្រីកទំហំបាននោះឡើយ។
នៅលើ iPhone 11 គឺមានបំពាក់បន្ទះឈីប A13 Bionic ដែលមានភ្ជាប់ជាមួយ RAM ទំហំ ៤GB។ ចំពោះអង្គផ្ទុកទិន្នន័យគឺមានជម្រើសទំហំ ៦៤GB, ១២៨GB និង ២៥៦GB។
៣. ថាមពលថ្ម និងប្រព័ន្ធទំនាក់ទំនង
ចំណុចខុសគ្នាធំមួយរវាងស្មាតហ្វូនទាំងពីរគឺនៅលើប្រព័ន្ធទំនាក់ទំនង។ នៅលើ Huawei P40 គឺទ្រាំទ្រនូវប្រព័ន្ធទំនាក់ទំនង 5G ប្រភេទ Dual-Mode ចំណែកនៅលើ iPhone 11 មានត្រឹម 4G LTE ប៉ុណ្ណោះ។
Huawei P40 មានថ្មទំហំ ៣៨០០ mAh ដែលទ្រាំទ្រការសាកថ្មល្បឿន ២២,៥ វ៉ាត់ ហើយនៅលើ iPhone 11 គឺមានថ្មទំហំ ៣១១០ mAh ដែលទ្រាំទ្រការសាកថ្មល្បឿន ១៨ វ៉ាត់។
៤. ប្រព័ន្ធប្រតិបត្តិការ
និយាយអំពី Software វិញ នៅលើ Huawei P40 គឺមាន EMUI 10.1 ដែលផ្អែកលើ Android 10 ប៉ុន្តែវាប្រើប្រាស់នូវ Huawei Mobile Services ជំនួសឲ្យ Google Mobile Services មានន័យថាមិនមានសេវាកម្ម Google មកជាមួយឡើយ។
iPhone 11 រត់នៅលើ iOS 13.4 ហើយវាមានផ្ដល់នូវជម្រើសកម្មវិធីធំទូលាយជាង បើប្រៀបនឹងប្រព័ន្ធអេកូនៃកម្មវិធីដែលមាននៅលើ Huawei Mobile Services នាពេលបច្ចុប្បន្ននេះ។
៥. កាមេរ៉ា*
កាមេរ៉ាមេរបស់ Huawei P40 មានទំហំ ៥០MP ជាប្រភេទ Ultra Vision មាន Aperture f/1.9 ដែលអាចថតវីដេអូ 4K/60fps។ វាមានគួបផ្សំដោយកាមេរ៉ា Ultra-Wide ទំហំ ១៦MP មាន Aperture f/2.2 និងកាមេរ៉ា Telephoto ទំហំ ៨MP មាន Aperture f/2.4 ហើយទ្រាំទ្រនូវមុខងារ OIS ទៀតផង។ កាមេរ៉ា Telephoto អាចផ្ដល់នូវការ Zoom Optical បាន 3x, Zoom Hybrid បាន 5x និង Zoom Digital បាន 30x។ សម្រាប់កាមេរ៉ា Selfie មានទំហំ ៣២MP ជាមួយ Aperture f/2.0 ដែលអាចថតវីដេអូ 4K/60fps។
ដោយឡែក iPhone 11 គឺមានកាមេរ៉ាមេទំហំ ១២MP មាន Aperture f/1.8 និងកាមេរ៉ា Ultra-Wide ទំហំ ១២MP ដូចគ្នា មាន Aperture f/2.4។ ប្រព័ន្ធកាមេរ៉ានេះគឺមានមុខងារទប់លំនឹងមកជាមួយ ហើយអាចផ្ដល់ការ Zoom Optical បាន 2x និងការ Zoom Digital បាន 5x។ កាមេរ៉ាខាងមុខក៏មានទំហំ ១២MP មាន Aperture f/2.2។ កាមេរ៉ាទាំងមុខទាំងក្រោយគឺសុទ្ធតែមានសមត្ថភាពថតវីដេអូ 4K/60fps។
៦. ការឌីហ្សាញ
Huawei P40 គឺមានការឌីហ្សាញបែប Full-Screen ដែលលើអេក្រង់មានតែរន្ធតូចមួយប៉ុណ្ណោះដែលរំខានភ្នែក។ វាមានជម្រើសពណ៌ចំនួន ៥ ដែលរួមមាន Silver Frost, Blush Gold, Deep Sea Blue, Ice White និង Black។ មានវិមាត្រ 148.9x71.06x8.5 ម.ម និងមានទម្ងន់ ១៧៥ ក្រាម។
iPhone 11 ក៏មានជម្រើសពណ៌ចំនួន ៥ ដែរគឺ Black, Green, Yellow, Purple, Red និង White ហើយវិមាត្រវិញគឺ 150.9x75.7x8.3 ម.ម និងមានទម្ងន់ ១៩៤ ក្រាម។ គួរបញ្ជាក់ថា Huawei P40 មានកម្រិតការពារទឹកនិងធូលីត្រឹម IP53 ចំណែក iPhone 11 មានកម្រិតការពារដល់ IP68 ឯណោះ។
៧. តម្លៃ
Huawei P40 នៅលើទីផ្សារបរទេសមានតម្លៃប្រមាណ ៧៩៩ អឺរ៉ូ (ប្រមាណ ៩៩៩ ដុល្លារ) ចំណែកនៅកម្ពុជាឃើញមានកំណត់តម្លៃលក់ ៦៩៩ ដុល្លារ។ សម្រាប់ iPhone 11 នៅលើទីផ្សារប្រទេសមានតម្លៃចាប់ពី ៦៩៩ ដុល្លារ ហើយនៅកម្ពុជាមានតម្លៃចាប់ពីប្រហែល ៧៣០ដុល្លារ (មានធានាពីហាង) និងតម្លៃចាប់ពី ៨៧៨ដុល្លារ (មានធានាពីក្រុមហ៊ុនផ្លូវការ)។
តាមរយៈការប្រៀបធៀបលើលក្ខណៈសម្បត្តិខាងលើ តើប្រិយមិត្តយល់ថាស្មាតហ្វូនណាដែលលេចធ្លោជាង?