- 2020-02-07 07:03:21
- ព័ត៌មាន
កុំឆ្ងល់! បើសិនរកទិញ AirPods និង AirPods Pro មិនបាន
- 2020-02-07 07:03:21
- ចំនួនមតិ 0 | ចំនួនចែករំលែក 0
កុំឆ្ងល់! បើសិនរកទិញ AirPods និង AirPods Pro មិនបាន
ចន្លោះមិនឃើញ
Apple កំពុងតែព្យាយាមបង្កើនទំហំផលិតសម្រាប់កាស AirPods និង AirPods Pro ដ៏ពេញនិយមរបស់ខ្លួន ប៉ុន្តែវាអាចនឹងត្រូវរាំងស្ទះដោយសារការផ្ទុះវីរុសកូរ៉ូណានៅប្រទេសចិន។
តាមការចុះផ្សាយរបស់ Nikkei បានឲ្យដឹងថាក្រុមហ៊ុនផ្គត់ផ្គង់ការដំឡើង AirPods ដ៏ធំរបស់ Apple គឺមាន Luxshare-ICT, Goertek និង Inventec បានបិទរោងចក្ររបស់ខ្លួន ចាប់តាំងពីដើមចូលឆ្នាំចិន ហើយទោះបីជាការដំឡើង AirPods អាចនឹងចាប់ផ្ដើមឡើងវិញនាថ្ងៃចន្ទក្រោយ ក៏គ្រឿងបន្លាស់អាចមិនគ្រប់គ្រាន់ដោយសារតែរោងចក្រទាំងអស់នៅទូទាំងប្រទេសចិន បានបិទដោយសារភ័យខ្លាចនឹងវីរុស។
រោងចក្រដំឡើង AirPods មានគ្រឿងបន្លាស់គ្រប់គ្រាន់សម្រាប់ការផលិត AirPods រយៈពេល ២ សប្ដាហ៍ប៉ុណ្ណោះ សម្រាប់ការផលិតលើសនេះគឺត្រូវរង់ចាំក្រុមហ៊ុនផ្គត់ផ្គង់គ្រឿងបន្លាស់នៅចិនបើកដំណើរការឡើងវិញសិន។
អ្នកដែលជួបនិយាយជាមួយ Nikkei បាននិយាយថាមិនច្បាស់ថាក្រុមហ៊ុនផ្គត់ផ្គង់គ្រឿងបន្លាស់នៅចិន នឹងអាចបន្តការងារដោយរលូនឬយ៉ាងណានោះទេ។ ប្រភពនិយាយដូចនេះថា ៖ "យើងពិតជាត្រូវរង់ចាំមើលស្ថានការណ៍នាសប្ដាហ៍ក្រោយ។ ប្រសិនបើក្រុមហ៊ុនដំឡើង AirPods មិនអាចទទួលបានគ្រឿងបន្លាស់គ្រប់គ្រាន់ក្នុងពេល ២ សប្ដាហ៍ វានឹងជាបញ្ហាធំ។”
ការរឹតត្បិតការធ្វើដំណើរពីតំបន់នីមួយៗនៅចិន ក៏ទំនងជាធ្វើឲ្យមានកង្វះខាតខាងកម្លាំងពលកម្មនៅរោងចក្រផងដែរ ហើយក្រុមហ៊ុនត្រូវគិតគូរលើការចាប់ផ្ដើមសង្វាក់ផលិតកម្មផង ថែមត្រូវបារម្ភថាកម្មករអាចនាំវីរុសមករោងចក្រផង។ រោងចក្រ Foxconn ជាដើម និយាយថាកម្មករដែលត្រឡប់ពីខេត្ត Henan នឹងត្រូវដាក់ដោយឡែករយៈពេល ២ សប្ដាហ៍ ខណៈដែលកម្មករដទៃទៀតនឹងត្រូវនៅដោយឡែក ១ សប្ដាហ៍។
Apple ចង់ផលិត AirPods ឲ្យបាន ៤៥ លានគ្រឿងនៅត្រីមាសដំបូងនៃឆ្នាំ ២០២០ នេះ ប៉ុន្តែស្តុកនៃ AirPods បច្ចុប្បន្នគឺកាន់តែថយចុះ ហើយរក្សាទុកសម្រាប់ហាងរបស់ Apple។ ពេលនេះ AirPods ធម្មតានៅមានក្នុងស្តុក ប៉ុន្តែ AirPods Pro មិនមានលក់ភ្លាមៗនោះទេ ចង់ទិញត្រូវតែរង់ចាំ៕