LG ធ្លាប់យកឈ្នះ Apple នៅទឹកដីអាមេរិក មុនធ្លាក់ដល់តំណែងលេខ ៥

2017-11-18 04:45:23
ប្រវត្តិបច្ចេកវិទ្យា

2017-11-18 04:45:23
ចំនួនមតិ 0 | ចំនួនចែករំលែក 0

ចន្លោះមិនឃើញ

LG Corporation (អតីតឈ្មោះ Lucky-GoldStar) ជាក្រុមហ៊ុនសាជីវកម្មពហុជាតិធំលំដាប់ទី ៤ នៅប្រទេសកូរ៉េខាងត្បូង។ មានការិយាល័យកណ្ដាលនៅអគារភ្លោះ Twin-Tower ក្នុងស្រុក Yeongdeungpo-gu ទីក្រុងសេអ៊ូល ដោយផ្ដោតលើការផលិតឧបករណ៍អេឡិចត្រូនិក, គ្រឿងសារធាតុគីមី, ឧបករណ៍ទូរគមនាគមន៍ និងប្រតិបត្តិការលើក្រុមហ៊ុនសម្ព័ន្ធដទៃទៀតរួមមាន LG Electronics, Zenith, LG Display, LG Uplus និង LG Chem ជុំវិញ ៨០ ប្រទេស។

ដើមកំណើត:

LG Corp. បែងខ្លួនចេញពីក្រុមហ៊ុន Lak-Hui Chemical Industrial Corp. ដំបូងបង្អស់នាឆ្នាំ ១៩៤៧ ដែលជាក្រុមហ៊ុនទី ១ ប្រឡូកចូលឧស្សាហកម្មប្លាស្ទិក។ នៅឆ្នាំ ១៩៥២ បន្តបង្កើតក្រុមហ៊ុន Lucky (បច្ចុប្បន្នជា LG Chem) និងឆ្នាំ ១៩៥៨ មានក្រុមហ៊ុន GoldStar ច្របាច់បញ្ចូលតែមួយទៅជាក្រុមហ៊ុន Lucky-GoldStar។

ដើម្បីប្រជែងក្នុងទីផ្សារលោកខាងលិច ដល់ឆ្នាំ ១៩៩៥ ឈ្មោះ Lucky-GoldStar Corporation ត្រូវបានប្ដូរទៅជាឈ្មោះ LG ដែលអក្សរពីរតួនេះតំណាងឲ្យពាក្យ Life's Good។ ទើបតែឆ្នាំ ២០០៩ ក្រុមហ៊ុន LG បានប្រើប្រាស់ Domain Name ផ្ទាល់ខ្លួនមួយប្រចាំគេហទំព័រ LG.com។

ការសហការរួមគ្នា:

ចាប់តាំងពីឆ្នាំ ២០០១ ក្រុមហ៊ុន LG បានចូលរួមបណ្ដាក់ទុនលើអាជីវកម្មជាមួយក្រុមហ៊ុន ២ រួមមាន Royal Philips Electronics ដែលមាន LG Philips Display និង LG Philips LCD ប៉ុន្តែត្រូវបានលក់ភាគហ៊ុនទាំងមូលនៅចុងឆ្នាំ ២០០៨។ រហូតដល់ឆ្នាំ ២០០៥ ទើប LG បន្តសហការជាមួយ Nortel Network បង្កើតបានក្រុមហ៊ុន LG-Nortel Co. Ltd មកទល់ពេលបច្ចុប្បន្ន។

* ទីផ្សារអន្តរជាតិ:

ថ្វីបើនៅឆ្នាំ ២០១២ ក្រុមហ៊ុន LG បាត់បង់ឱកាសក្ដោបក្ដាប់ទីផ្សារធំនៅទឹកដីអាមេរិក ក្រឡេកទៅឆ្នាំ ២០១៣ គិតត្រឹមថ្ងៃទី ២០ មករា ក្រុមការងារ Counterpoint Research បានប្រកាសជាសាធារណៈ LG យកឈ្នះលើ Apple រហូតក្លាយជាក្រុមហ៊ុនលំដាប់ទី ២ នៅអាមេរិក បន្ទាប់ពីក្រុមហ៊ុន SAMSUNG។

ពេលនោះ LG លក់ដាច់ម៉ូដែល Optimus G បានជាង ១ លានគ្រឿងនៅទីផ្សារអាមេរិកខាងជើង និងបានជាង ១០ លានគ្រឿងនៃ L-Series លើទីផ្សារសកល។ SAMSUNG បានចំណែកទីផ្សារ ៣៣ ភាគរយ ខណៈ LG បាន ១៣ ភាគរយ និង Apple បាន ១២ ភាគរយ។ ប៉ុន្តែជាងកន្លះឆ្នាំក្រោយ ក្រុមការងារ comScore បានចេញរបាយការណ៍ LG ធ្លាក់ដល់តំណែងទី ៥ វិញ នៅខែមិថុនា ឆ្នាំ ២០១៣។

ស្លាកសញ្ញា:

មកទល់សព្វថ្ងៃ LG ប្តូរស្លាកសញ្ញា (Logo) នៃក្រុមហ៊ុនខ្លួនចំនួន ២ ដងគត់ រួមមាន Logo ដំបូងនៅឆ្នាំ ១៩៩៥ ដល់ចុងឆ្នាំ ២០១៤ និង Logo ថ្មីគិតចាប់ពីដើមឆ្នាំ ២០១៥ មកទល់បច្ចុប្បន្ន ដោយខុសគ្នាត្រឹមប្រភេទ Font និងផ្ទៃទម្រង់រូបអក្សរ L និង G ជាស្នាមញញឹម ស្លាកសញ្ញាថ្មីមានពណ៌ក្រហមរាងដិតបន្តិច។

ការចាប់ផ្ដើមលើទីផ្សារទូរទស្សន៍:

LG Electronics បានប្រកាសបង្ហាញ នូវទូរទស្សន៍ប្រើអេក្រង់ OLED ដំបូងបង្អស់ទំហំអេក្រង់ ៥៥ អ៊ីញ នាឆ្នាំ ២០១៣ និងអេក្រង់ ៧៧ អ៊ីញនាឆ្នាំ ២០១៤។ នៅឆ្នាំ ២០១១ ជាពេលដែល LG មានទូរទស្សន៍ឆ្លាតវៃ និងនៅឆ្នាំ ២០១៤ LG បានប្រើនូវប្រព័ន្ធ webOS ជាមួយផ្ទៃ Interface Ribbon បំពាក់លើ Smart TV មួយចំនួន។ ភាពជោគជ័យបានកើតមាន ក្រោយ ៨ ខែនៃការប្រកាសបង្ហាញ LG លក់ដាច់ Smart TV បានជាង ៥ លានគ្រឿងឯណោះ។

អ្វីដែលអស្ចារ្យនៅឆ្នាំ ២០១៦ ទូរទស្សន៍ពិសេសអាចដេញមូស ដោយប្រើរលក Ultrasonic Waves មានសំឡេងស្ងាត់ល្អ និងមិនរំខានដល់មនុស្ស ចេញជាផ្លូវការនៅថ្ងៃទី ១៦ មិថុនា ឆ្នាំ ២០១៦។ ក្រោយៗមកបច្ចេកវិទ្យានោះបានប្រជ្រៀតខ្លួនចូលទៅក្នុងម៉ាស៊ីនត្រជាក់, ម៉ាស៊ីនបោកគក់ រហូតដល់ស្មាតហ្វូន។

ការចាប់ផ្ដើមលើទីផ្សារស្មាតហ្វូន:

LG បានវិវត្តខ្លួនចូលក្នុងទីផ្សារស្មាតហ្វូន Touchscreen ដំបូងបង្អស់នាឆ្នាំ ២០០៧ ស្របពេល iPhone ចេញដំបូង នៅពេលនោះទើបមានម៉ូដែល LG Prada ក្នុងអំឡុង ១៨ ខែលក់ដាច់បាន ១ លានគ្រឿង ធៀបនឹង Apple បានដល់ ៦.១ លានគ្រឿងត្រឹមរយៈពេល ១៥ ខែ។

ក្រោយៗមកក៏វិវត្តចូលដល់ត្រកូល G ខណៈម៉ូដែល G Flex ជាស្មាតហ្វូនដំបូងក្នុងលោកមានរាងកោង បង្ហាញនាថ្ងៃទី ២៧ តុលាឆ្នាំ ២០១៣ ក្រោយមកទើបមានម៉ូដែល G2 ចេញលក់នៅទីផ្សារអាមេរិកនាពិព័រណ៍ CES ឆ្នាំ ២០១៤ រហូតវិវត្តដល់ម៉ូដែល G6 និង V30 នាពេលបច្ចុប្បន្ន ជាស្មាតហ្វូនជំនាន់ក្រោយបង្អស់របស់ខ្លួន។

ការចូលរួមឧបត្ថម្ភ:

LG មានក្រុមកីឡាផ្លូវការចំនួន ២ រវាងក្រុមកីឡា Baseball ឈ្មោះ LG Twins និងក្រុមកីឡាបាល់បោះ Changwon LG Sakers មានមូលដ្ឋានក្នុងប្រទេសកូរ៉េខាងត្បូងទាំងពីរ។ មិនតែប៉ុណ្ណោះ LG ក៏បានចូលរួមឧបត្ថម្ភដល់កីឡាក្រៅស្រុកផ្សេងទៀត ដូចជាការប្រកួត Copa America, ការប្រណាំងរថយន្ត Formula One, កីឡាអូឡាំពិករដូវរងាពិសេសនៅឆ្នាំ ២០១៣, ក្រុមបាល់ទាត់ Manchester City FC, ក្រុម Millonarios Futbol Club និងអត្តពលិក Son Yeon-jae និង Angela Park ជាដើម៕