- 2015-09-30 18:45:31
- ព័ត៌មាន
NIPTICT បន្ថែមការសិក្សាតាមប្រព័ន្ធ E-Learning បង្កើនប្រសិទ្ធិភាពនិស្សិតសិក្សាជំនាញបច្ចេកវិទ្យា
- 2015-09-30 18:45:31
- ចំនួនមតិ 0 | ចំនួនចែករំលែក 0
NIPTICT បន្ថែមការសិក្សាតាមប្រព័ន្ធ E-Learning បង្កើនប្រសិទ្ធិភាពនិស្សិតសិក្សាជំនាញបច្ចេកវិទ្យា
ចន្លោះមិនឃើញ
វិទ្យាស្ថានជាតិប្រៃសណីយ ទូរគមនាគមន៍ បច្ចេកវិទ្យាគមនាគមន៍និងព័ត៌មានវិទ្យា NIPTICT ជាគ្រឹះស្ថានរបស់រដ្ឋទើបបង្កើតថ្មីមួយដែលផ្តោតលើការបណ្តុះបណ្តាលជំនាញបច្ចេកវិទ្យាបានបន្ថែមការសិក្សាតាមប្រព័ន្ធ E-Learning ដើម្បីបង្កើនប្រសិទ្ធភាពដល់សិស្សនិស្សិតដែលសិក្សាជំនាញបច្ចេកទេស។
លោក សេង សុភាព ប្រធានវិទ្យាស្ថានជាតិប្រៃសណីយ ទូរគមនាគមន៍ និងបច្ចេកវិទ្យាគមនាគមន៍និងព័ត៌មានវិទ្យាបានឱ្យដឹងថា E-learning ជាប្រព័ន្ធសិក្សាដ៏ទំនើបថ្មីមួយដែលវិទ្យាស្ថានបានដាក់បន្ថែម សម្រាប់ជាជំនួយដល់និស្សិតកំពុងសិក្សាជំនាញបច្ចេកវិទ្យាអាចពង្រឹងសមត្ថភាពនិងប្រសិទ្ធភាពលើការសិក្សាកាន់តែប្រសើរ។
លោកថា ការសិក្សាតាមប្រព័ន្ធ E-Learning និស្សិតអាចសិក្សាតាមវីដេអូ សំឡេងនិងឯកសារនានាពីគ្រប់ទីកន្លែងដែលផ្តល់ភាពងាយស្រួលនៅពេលពួកគេមានចម្ងល់និងចង់ស្វែងយល់ការសិក្សាបន្ថែមទៅលើមេរៀនដែលបានរៀនរួច។ ប្រព័ន្ធបច្ចេកវិទ្យានេះចាប់ផ្ដើមដាក់ឲ្យនិស្សិតសិក្សាបណ្តើរៗតាំងពីឆ្នាំទី១ រហូតដល់ពួកគេឡើងដល់ឆ្នាំបន្តបន្ទាប់។
និស្សិតមួយចំនួនបានស្គាល់រួចមកហើយថាអ្វីទៅជា E-Learning។ E-Learning ជាវិធីសាស្ត្រសិក្សាតាមប្រព័ន្ធអេឡិចត្រូនិកដ៏ទំនើបមួយ សម្រាប់និស្សិតមិនសូវមានពេលវេលាគ្រប់គ្រាន់ អាចរៀនស្វ័យសិក្សាពីចម្ងាយ។ ប្រព័ន្ធអប់រំបច្ចេកវិទ្យាថ្មីនេះក៏កំពុងអនុវត្តយ៉ាងជោគជ័យនៅតាមប្រទេសជឿនលឿនជាច្រើន ហើយកន្លងទៅនេះនៅប្រទេសកម្ពុជាវិទ្យាស្ថានបច្ចេកវិទ្យាកម្ពុជា (សាលាតិចណូ) បានដាក់ឲ្យសិស្សសិស្សិតសិក្សាប្រព័ន្ធបច្ចេកវិទ្យាដ៏ទំនើបនេះ។
លោក សេង សុភាព បានបន្តថា E-Learning ជាប្រព័ន្ធអប់រំដ៏ទំនើបដែលកំពុងអនុវត្តយ៉ាងជោគជ័យនៅតាមប្រទេសជឿនលឿនជាច្រើន។ ការសិក្សាតាម E-Learning ជួយដល់អ្នកដែលរវល់ការងារ មិនសូវមានពេលវេលាគ្រប់គ្រាន់អាចសិក្សាតាមរយៈប្រព័ន្ធអេឡិចត្រូនិក។ ការសិក្សាតាមប្រព័ន្ធនេះក្រៅពីផ្តល់ភាពងាយស្រួល និស្សិតក៏អាចផ្លាស់ប្តូរការសិក្សាទៅវិញទៅមកដើម្បីអភិវឌ្ឍន៍សមត្ថភាពនិងចំណេះដឹងឲ្យកាន់តែប្រសើរ។
អគារសិក្សារបស់វិទ្យាស្ថានជាតិ NIPTICT (ក្បែរទីស្តីការគណៈរដ្ឋមន្ត្រី)
សម្រាប់ឆ្នាំសិក្សាថ្មីនេះ វិទ្យាស្ថានជាតិប្រៃសណីយ ទូរគមនាគមន៍ និងបច្ចេកវិទ្យាគមនាគមន៍និងព័ត៌មានវិទ្យា NIPTICT នឹងផ្ដល់អាហារូបករណ៍ចំនួន ១២០ កន្លែង សម្រាប់សិស្សនិស្សិតដាក់ពាក្យប្រលង។ កាលបរិច្ឆេទឈប់ទទួលពាក្យនឹងផុតកំណត់នៅថ្ងៃទី ១៧ តុលា និងថ្ងៃប្រឡងថ្ងៃទី ២០ តុលាឆ្នាំ ២០១៥។
ដើម្បីលើកទឹកចិត្តដល់និស្សិតស្រីដែលមានបំណងសិក្សាផ្នែកបច្ចេកវិទ្យា វិទ្យាស្ថានជាតិប្រៃសណីយ ទូរគមនាគមន៍ និងបច្ចេកវិទ្យាគមនាគមន៍និងព័ត៌មានវិទ្យា NIPTICT ក៏នឹងផ្ដល់អាហារូបករណ៍ ៥០% ទោះបីមិនបានជាប់អាហារូបករណ៍ក៏ដោយ៕
អត្ថបទ៖ ប៉ែត ផាន់និត
រូបភាព៖ វិទ្យាស្ថានជាតិ NIPTICT
